Efesios 1 - Biblia en Quechua del norte de Conchucos

Apóstol Pablo saludakunqan

¹ Éfeso markachö salvashqa kaqkuna: Noqa Pablo, Jesucristupa apostolnin kanäpaq Dios Yaya akramashqa kaptinmi qamkunaman kay cartata cartakamü. Jesucristo munanqannöna kawarmi Dios Yayapana kaykäyanki.

² Taytantsik Dios Yaya y Señor Jesucristo llakipäyäshurniki alli päsakuychö kawakuyänaykipaq yanapaykuyälläshuy.

Dios Yayata agradëcikunqan

³ ¡Señor Jesucristupa Taytan Dios Yaya alabashqa kaykullätsun! Jesucristuchö kashqam gloriachö kaykaq imaykaläya bendicionninkunata qaramashkantsik.

⁴ Kay patsata manaraq kamarmi Jesucristuman Dios Yaya churamarnintsik paypa puntanchö jutsannaq y santu kanapaq akramarqantsik.

⁵ Kuyamarnintsikmi kikin munanqannö destinamarqantsik Jesucristo rayku wamran kanapaq.

⁶ Kuyay Tsurin rayku kuyakuq kayninwan destinamanqantsikpitam imaypis payta alabashun.

⁷ Llakipäkuq karmi Tsurinpa yawarninwan rantimarnintsik llapan jutsantsikkunapita perdonamashkantsik.

⁸ Alläpa llakipämarnintsik y yachayta qaramarnintsikmi

⁹ runakuna mana musyayanqanta Dios Yaya musyatsimashkantsik.

¹⁰ Tsaynö musyatsimashkantsik ciëluchö kaqkunata y kay patsachö kaqkunatapis pay destinanqan junaq Jesucristupa poderninman llapanta churananpaq kanqanta.

¹¹ Kikin yarpanqannö llapantapis ruraq karmi noqantsiktapis Jesucristuchö kashqa Dios Yaya destinamashkantsik herenciata chaskir salvashqa kanapaq.

¹² Paymi permïtishqa Israel runakuna Jesucristuman puntata creyikur payta alabayänanpaq.

¹³ Qamkunapis alli willakuyninta wiyarmi Jesucristuman creyikur salvakäyashkanki. Tsaynöpam prometinqan Espíritu Santuwan Dios Yaya shonquykikunata sëllayäshushkanki.

¹⁴ Espíritu Santuta qaramarnintsikmi Dios Yaya tantiyatsimantsik herenciantsikta qaramänapaq kanqanta y wamran kanapaq rantimanqantsikta. Tsaynö salvamanqantsikpitam imaypis payta alabashun.

Creyikuqkunapaq Dios Yayata mañakunqan

¹⁵ Tsaymi Señor Jesucristuman shumaq creyikur wawqikunawan y panikunawan kuyanakuyanqaykita musyar

¹⁶ Dios Yayata qamkunapaq mañakur imaypis agradëcikü.

¹⁷ Tsaynöllam Señornintsik Jesucristupa Taytan poderyuq Dios Yayata mañakü Espíritu Santuwan tantiyatsiyäshuptiki payta reqiyänaykipaq.

¹⁸ Shonquykikunachö tsaynö tantiyatsiyäshuptikim musyayanki Dios Yaya qayashurniki imapaq salvayäshunqaykita, alläpa alli herenciata chaskiyanqaykita

¹⁹ y payman creyikuqkunata poderninwan shumaq yanapanqanta.

²⁰ Tsay poderninwanmi Jesucristuta wañunqanpita kawaskatsimur gloriachö derëchu kaq lädunman jamatsishqa.

²¹ Jesucristutam Dios Yaya churashqa kay vïdachö y wak vïdachöpis poderösu kananpaq. Tsaymi angelkunapita, supaykunapita y pïmaypitapis mas poderyuq kaykan.

²² Tsaynö poderyuq kaptinmi llapan imaykata paypa poderninman Dios Yaya churashqa. Iglesiata kuyarmi payta churashqa llapanpapis mandakuqnin kar uman kananpaq.

²³ Noqantsiknam iglesian kar cuerpun kantsik. Tsaymi pay munanqannö kawanapaq imaypis yanapaykämantsik. Paypa poderninchömi llapan imaykapis kaykan.