Daniel 1 - Biblia en Quechua del norte de Conchucos

Amïgunkunawan Babiloniachö Daniel kanqan

¹ Judá nacionchö kimsa watana Joacim rey kaykaptinmi Babilonia nacionpa mandakuqnin rey Nabucodonosor soldädunkunawan Jerusalénman chaykur tumat tsapaskiyarqan.

² Dios Yayam permïtirqan rey Joacimta Nabucodonosor prësu apananpaq y Diospa templunchö wakin kaq manëjukunatapis apananpaq. Tsaykunatam Babiloniaman apaykur diosninkunapa templunchö kaq almacén cuartuman churarqan.

³ Tsaypitanam eunucukunapa mandakuqnin Aspenazta Nabucodonosor mandarqan prësu apayämunqan wakin Israel jövinkunata palaciuman pushananpaq. Wakin jövinkunaqa reypa castankunam kayarqan y wakinnam Israelchö rïcu runakunapa castan kayarqan.

⁴ Tsay akrayanqan jövinkunam kayarqan sänu, kuyakuypaq, yachayyuq, yachatsiyaptin sas yachakuq y alli yachaq. Tsaymi paykuna alli kayarqan reypa palaciunchö serviyänanpaq, Babilonia runakuna qellqayanqankunata estudiayänanpaq y parlayanqan idiömata yachakuyänanpaq.

⁵ Rey Nabucodonosormi ordenarqan palaciuchö kusinayanqan mikuykunata tsay jövinkuna waran waran mikuyänanpaq y vïnuta upyayänanpaq. Tsaynöllam ordenarqan kimsa wata shumaq yachakuskir palaciuchö payta serviyänanpaq.

⁶ Tsay akranqan jövinkunachömi Judá nacionpita Daniel, Ananías, Misael y Azarías kayarqan.

⁷ Paykunapa shutinkunatam Aspenaz cambiatsir churarqan Danielpa shutinta Beltsasarta, Ananíaspa shutinta Sadracta, Misaelpa shutinta Mesacta y Azaríaspa shutintana Abed-neguta.

⁸ Danielmi impüru kayta mana munar yarpachakurqan reypa mikuyninta mana mikunanpaq y vïnuntapis mana upyananpaq. Tsaymi Aspenazta rugakurqan tsay mikuykunata mana qarananpaq.

⁹ Dios Yaya yanapaptinmi Danielqa Aspenazwan mas alli confianza kayarqan.

¹⁰ Tsaynö rugaptinmi Aspenaz nirqan: <<Peru reypitam mantsakü. Paymi nimashqa qamkunata alli mikuyta y alli vïnuta qarayänaqpaq. Wakin kaq jövinkuna werayaqta rikarmi qam uyuqta rikar wañutsimanqa>>.

¹¹ Tsaynam cuidaqnin runatana Daniel rugakurqan. Tsay runatam mandaq Aspenaz churarqan Danielta, Ananíasta, Misaelta y Azaríasta cuidananpaq. Rugakurmi Daniel nirqan:

¹² <<Taytay, rugakuyälläshayki. Verdürallata y yakullata chunka junaq qaraykayämay.

¹³ Tsay chunka junaq päsaskiptin reypa mikuyninta mikuq jövinkunaman iwalatsiyämanki imanö kaykäyanqäta rikäyämänaykipaq. Paykunapita mas alli kayaptïqa mañakuyanqaqnölla qaraykayämanki>>.

¹⁴ Tsaymi cuidaqnin runa äniskir mañakuyanqannölla chunka junaq qararqan.

¹⁵ Chunka junaq cumpliskiptinnam rey alistapanqan mikuykunata mikuqkunapitapis mas sänu y allish chölu kayarqan.

¹⁶ Tsaymi jövinkunata cuidaq runaqa reypa mikuyninta y vïnunta tsay jövinkunata qararqannatsu. Tsaypa rantinmi verdürallatana qararqan.

¹⁷ Tsay chuskun jövinkunata Dios Yaya yachayta qararmi Babilonia runakuna qellqayanqan röllukunata liyiyänanpaq y yachatsiyanqankunata alli yachakuyänanpaq yanaparqan. Tsaynöllam Danielta yanaparqan pipis revelación chaskinqanta tantiyananpaq y runakuna imapaq sueñuyanqantapis musyananpaq.

¹⁸ Rey Nabucodonosor ninqannölla kimsa wata yachaskatsirmi reypa puntanman tsay jövinkunata Aspenaz pusharqan.

¹⁹ Danielwan, Ananíaswan, Misaelwan y Azaríaswan parlaskirnam rey tantiyarqan llapan jövinkunapitapis mas yachayyuq kayanqanta. Tsaymi yanapaqnin kayänanpaq paykunata churarqan.

²⁰ Mayjina aja kaqkunata rey tapuptinmi maytsaychö brüjukunapita y suerti qatiqkunapita chunka kuti mas tantiyayarqan.

²¹ Tsaynöpam Daniel Babiloniachö täkurqan rey Ciro punta kaq wata mandakunqan witsayyaq.