Apocalípsis 1 - Biblia en Quechua del norte de Conchucos

Librupa qallanan

¹ Kay libruchömi qellqashqa kaykan Dios Yaya Jesucristuta revelanqan. Jesucristum angelninta kachamur tsay revelacionta serviqnin Juanta revelarqan. Tsay revelacionwanmi serviqninkunata imapis päsananpaqna kaqkunata tantiyatsirqan.

² Juannam tsay revelacionta qellqar Dios Yaya ninqankunata, Jesucristo ninqankunata y llapan rikanqankunata qellqashqa.

³ Alläpam kushikuyanqa kay qellqashqakunata liyiqkuna y liyipuyaptin wiyar cäsuqkunapis. Kay qellqashqa kaykaqkunam cumplinanpaqna kaykan.

Qanchis iglesiakunachö qorikaq wawqikunata y panikunata saludanqan

⁴ Asia provinciachö qanchis iglesiakunachö qorikaq wawqikuna y panikuna: Noqa Juanmi qamkunaman qellqamü. Unaypita kawaq, kanan kaykaq y shamunanpaq kaq Dios Yaya y trönunpa puntanchö kaykaq qanchis espïritukunapis llakipäyäshurniki alli päsakuychö kawakuyänaykipaq yanapaykuyälläshuy.

⁵ Jesucristupis alli kawakuyänaykipaq yanapaykuyälläshuy. Paymi Dios Yaya munanqannölla willakuyninta willakushqa y wañushqakunapita puntata kawamushqa. Kay patsachö llapan mandakuq reykunapitapis mas poderösum. Paymi alläpa kuyamarnintsik yawarninta jichar llapan jutsantsikta mayllamashkantsik.

⁶ Mandamaqnintsik rey karmi poderninchö kanapaq qorimashkantsik. Tsaynöllam Taytan Dios Yayata serviq sacerdötikuna kanapaq churamashkantsik. ¡Jesucristo imaypis alabashqa kaykullätsun! ¡Pay japallan mandamaqnintsik kaykullätsun! Amén.

⁷ ¡Pukutay jananchömi Jesucristo kutimunqa! Kutimuqtam llapan runakuna rikäyanqa. Payta tuksir wañutsiqkunapis rikäyanqam. Kutimuqta rikarmi maytsaychö runakuna waqayanqa. Tsaynömi kanqa. Amén.

⁸ Unaypita kawaq, kanan kaykaq y shamunanpaq kaq poderösu Dios Yayam nin: <<Alfa y Omegam kä. [Qallanan y ushananmi kä]>>.

Jesucristuta Juan rikanqan

⁹ Noqaqa Jesucristuman confiakuq majiki Juanmi kä. Qamkunanöllam Jesucristupa mandakuyninchö kaykä. Sufritsiyäshunqaykinöllam noqatapis Jesucristuman creyikunqäpita sufritsiyäman. Qamkunanöllam paypa puntanman chänäpaq mana ajayaypa shuyaykä. Dios Yayapa willakuyninta willakunqäpita y Jesucristo salvamaqnintsik kanqanta willakunqäpitam Patmos islachö prësu kaykä.

¹⁰ Tsaychö kaykarmi domingu junaq Espíritu Santupa poderninwan cornëta waqaqnöraq qepäpita nimuqta wiyarqä:

¹¹ <<[Alfa y Omegam kä. Qallanan y ushananmi kä.] Revelacionchö rikätsinqaqkunata juk rölluman qellqarkur apatsiy [Asia provincia] qanchis markakunachö iglesiakunaman. Tsay markakunam kayan Éfeso, Esmirna, Pérgamo, Tiatira, Sardis, Filadelfia y Laodicea>>.

¹² Qepäpita tsaynö parlamuqta wiyarmi pï kanqanta rikänäpaq tumaykurqä. Tumaykurmi qoripita rurashqa qanchis candelërukunachö nina rupaykaqta rikarqä.

¹³ Tsay candelërukunapa chawpinchömi runapa tsurinnö kaykaqta rikarqä. Paymi chaki puntanyaq llatapashqa karqan. Pëchunpam qoripita rurashqa wachukuwan watashqa karqan.

¹⁴ Aqtsanpis yuraq millwanö y jankanö yuraqmi karqan. Ñawinnam imayka ninanöraq chipakyarqan.

¹⁵ Chakinkunapis alli pulishqa broncinöraqmi chipakyarqan. Parlanqanpis atska yaku aywar qayaraqnöraqmi karuman wiyakarqan.

¹⁶ Derëcha kaq makinchömi qanchis qoyllurkunata katsirqan. Shiminpitam ishkan lädunpa afilashqa espäda yarqamurqan. Qaqllanpis rupaynöraqmi chipakyarqan.

¹⁷ Payta rikaykurmi puntanman wañushqanö shikwaskirqä. Tsaymi derëcha kaq makinwan yataykamar nimarqan: <<Ama mantsamaytsu. Noqam qallanan y ushanan kä.

¹⁸ Imayyaqpis kawaqmi kä. Imayyaqpis kawanäpaqmi wañutsiyämanqanpita kawamushkä. [Amén.] Noqam katsï wañuqkunapa almankuna kayanqan llävita.

¹⁹ Llapan rikanqaykita qellqay. Kanan päsaykanqanta y päsananpaq kaqkunatapis llapanta qellqay.

²⁰ <<Kananmi tantiyatsishayki derëcha kaq makïchö rikanqayki qanchis qoyllurkuna y qoripita qanchis candelërukuna ima kanqanta. Qanchis qoyllurkuna rikanqaykim kayan tsay qanchis iglesiakunapa angelninkuna. Qanchis candelërukuna [rikanqaykim] kayan tsay qanchis markakunachö iglesiakuna>>.