Amós 1 - Biblia en Quechua del norte de Conchucos

¹ Kay libruchömi Amós willakunqan qellqashqa kaykan. Payqa Tecoa markachö täkuq üsha mitsikuq runam karqan. Amós willakunqan witsaymi Judá nacionchö Uzías rey kaykarqan y Israel nacionchönam Joáspa tsurin Jeroboam rey kaykarqan. Amós willakunqanpita ishkay watataraqmi alläpa patsa kuyurqan.

² Willakurmi Amós nirqan: <<Dios Yayam Sión lömapita leonnö qayarämun. Jerusalénpita qayakamunqanmi maqakuynöraq wiyakämun. Parlamuptinmi jirkachö qewakuna tsakinqa. Carmelo jirkachö qewakunapis chipyatmi tsakinqa>>.

Siria nación runakunata Dios Yaya juzgananpaq ninqan

³ Dios Yayam nin: <<Damasco markachö täkuq runakunapa jutsankunaqa alläpanam kaykan. Paykunam ërachö trïguta jarutsiqnö Galaad runakunata ushakätsiyashqa. Tsaynö rurayanqanpitam mana llakipaypa castigashaq.

⁴ Tsaymi nina imaykata rupar ushanqannö rey Hazaelpa castankunata y rey Ben-adad shäritsinqan palaciuta ushakätsishaq.

⁵ Damasco markaman yaykuna punkukunatapis llapantam pakishaq. Bicat-avénchö y Bet-edénchö mandakuqkunatapis jankatmi ushakätsishaq. Tsaypitanam contran runakuna shamur Siria runakunata Kir partiman prësu apayanqa>>. Dios Yayam tsaynö nin.

Filisteo runakunata Dios Yaya juzgananpaq ninqan

⁶ Dios Yayam nin: <<Gaza markachö täkuq runakunapa jutsankunaqa alläpanam kaykan. Paykunam juk marka entëruta edomita runakunaman runakunata rantikuyarqan. Tsaynö rurayanqanpitam mana llakipaypa castigashaq.

⁷ Nina imaykata rupar ushanqannömi Gaza markapa murällanta y palaciunkunatapis ushakätsishaq.

⁸ Asdod markachö y Ascalón markachö reykunatapis jankatmi ushakätsishaq. Mana llakipaypam Ecrón markachö täkuq runakunatapis ushakätsishaq. Tsaynöpam filisteo runakuna llapanpis wañuyanqa>>. Dios Yayam tsaynö nin.

Tiro runakunata Dios Yaya juzgananpaq ninqan

⁹ Dios Yayam nin: <<Tiro markachö täkuq runakunapa jutsankunaqa alläpanam kaykan. Paykunam castankunawan shumaq kawakuyänanpaq pactuta rurashqa kaykar juk marka entëruta edomita runakunaman tsay castan runakunata rantikuyarqan. Tsaynö rurayanqanpitam mana llakipaypa castigashaq.

¹⁰ Tsaymi nina imaykata rupar ushanqannö Tiro markapa murällanta y palaciunkunatapis ushakätsishaq>>.

Edomita runakunata Dios Yaya juzgananpaq ninqan

¹¹ Dios Yayam nin: <<Edom nacionchö täkuq runakunapa jutsankunaqa alläpanam kaykan. Paykunam mana llakipaypa castankuna kaykaptin Israel runakunata espädawan wañutsiyarqan. Tsaynö rurayanqanpitam mana llakipaypa castigashaq.

¹² Tsaymi nina imaykata rupar ushanqannö Temán markata y Bosrachö palaciukunatapis ushakätsishaq>>.

Amón nación runakunata Dios Yaya juzgananpaq ninqan

¹³ Dios Yayam nin: <<Amón nacionchö täkuq runakunapa jutsankunaqa alläpanam kaykan. Paykunam chakrankunata qechuyänanpaq Galaadchö täkuq qeshyaq warmikunata espädawan pachankunata qashar wañuskatsirqan. Tsaynö rurayanqanpitam mana llakipaypa castigashaq.

¹⁴ Tsaymi nina imaykata rupar ushanqannö Rabá markapa murällanta y palaciunkunatapis ushakätsishaq. Apäkuy tamyanöraqmi qayaykacharraq tsay markata ushakätsiyanqa.

¹⁵ Mandaqnin reyta y mandäsiqninkunatapis juklä nacionmanmi prësu apayanqa>>. Dios Yayam tsaynö nin.