Salmo 1 - Teyta Diospa Willakïnin

Libru 1 Salmo 1—41 Salmo 1 Teyta Dios munanqannö kawaq nuna y jutsasapa nuna imanö kanqan

¹ Kushishqam kawakun Teyta Dios munashqannö kawaq nunaqa. Tsë nunaqa llutan käyitsikïkunata manam chaskintsu. Wakin nunakuna jutsata rurayaptinpis pëqa manam jutsata rurantsu. Llutankunata parlayaptinpis pëqa manam llutanta parlantsu.

² Tsëpa rantinqa Teyta Diospa leyninkunata kushishqam cäsukun. Paqaspapis y junaqpapis tsë leykunallapaqmi yarparëkan.

³ Tsë nunaqa këkan mayu kuchunchö plantashqa montinömi, tiempunchö alli wayuq montinömi, y raprankunapis mana qarwashyëta moqllallëkaqnömi. Llapan rurashqankunapis allillam këkan.

⁴ Jutsa rurëchö kawaq nunakunaqa manam tsënötsu kawëkäyan. Pëkunaqa vientu apashqan tsaki päjanömi këkäyan.

⁵ Pëkunataqa Teyta Diosmi juzganqa. Manam kuyashqan nunatsu kayanqa.

⁶ Cäsukuqkunataqa Teyta Diosmi yanapan alli kawayänanpaq. Jutsata ruraqkunataqa jutsa rurëllachö kakïkaqtam ushakätsinqa.