Números 1 - Teyta Diospa Willakïnin

Israel nunakunata Sinaí jirkachö censayanqan

¹ Israel nunakuna Egiptupita yarqayämunqan juk wata y juk killa pasariptinmi Sinaí chusyaq jirkachö këkäyarqan. Tsë junaqmi Tinkuna Tolduchö parlapar Moisésta Teyta Dios kënö nirqan:

² <

³ Censarnin ishkë chunka (20) watayuqpita witsëpa shutinkunata apuntayë. Tsë nunakunaqa poqushqanam këkäyan guërraman ëwayänanpaq. Aarónmi censar yanapashunki.

⁴ Tsënölla cada trïbupita juk mandakuqta churanki censar yanapashunëkipaq.

⁵ Pëkuna kayanqa: Rubén trïbupita Sedeurpa tsurin Elisur,

⁶ Simeón trïbupita Zurisadaipa tsurin Selumiel,

⁷ Judá trïbupita Aminadabpa tsurin Naasón,

⁸ Isacar trïbupita Zuarpa tsurin Natanael,

⁹ Zabulón trïbupita Helónpa tsurin Eliab,

¹⁰ Efraín trïbupita Amiudpa tsurin Elisama, Manasés trïbupita Pedasurpa tsurin Gamaliel (Efraínwan Manasésqa Josépa tsurinkunam kayarqan),

¹¹ Benjamín trïbupita Gedeonipa tsurin Abidán,

¹² Dan trïbupita Amisadaipa tsurin Ahiezer,

¹³ Aser trïbupita Ocránpa tsurin Pagiel,

¹⁴ Gad trïbupita Reuelpa tsurin Eliasaf

¹⁵ y Neftalí trïbupita Enánpa tsurin Ahira>>.

¹⁶ Teyta Dios ninqannöllam cada trïbupita tsë mandakuq nunakunata Moisés akrarqan censar yanapayänanpaq.

¹⁷ Tsë akranqan nunakunawan Moisés y Aarón ëllukärirmi

¹⁸ llapan Israel nunakunata qayatsiyarqan. Tsë junaq karqan ishkë kaq killa qallëkunan junaqmi. Tsëchömi Israel nunakunata castanpa castanpa familianpa familianpa censayarqan. Tsënö censarmi ishkë chunka (20) watapita witsëpa ollqu kaqkunapa shutinkunatapis apuntayarqan.

¹⁹ Teyta Dios ninqannöllam Sinaí chusyaq jirkachö llapan ollqu kaqkunata Moisés censatsirqan.

^20-21 Llapanpa shutinkunata apuntar castanpa castanpa y familianpa familianpam censayarqan. Tsënö censarirnam musyayarqan ishkë chunka (20) watayuqpita witsëpa ëkaq ollqu nunakuna kayanqantapis. Tsë nunakunaqa guërraman ëwayänanpaq poqushqanam kayarqan. Israelpa wamaqshu tsurin Rubén trïbupitam chusku chunka joqta waranqa pitsqa pachak (46,500) nunakuna kayarqan.

^22-23 Simeón trïbupitam pitsqa chunka isqun waranqa kima pachak (59,300) nunakuna kayarqan.

^24-25 Gad trïbupitam chusku chunka pitsqa waranqa joqta pachak pitsqa chunka (45,650) nunakuna kayarqan.

^26-27 Judá trïbupitam qanchis chunka chusku waranqa joqta pachak (74,600) nunakuna kayarqan.

^28-29 Isacar trïbupitam pitsqa chunka chusku waranqa chusku pachak (54,400) nunakuna kayarqan.

^30-31 Zabulón trïbupitam pitsqa chunka qanchis waranqa chusku pachak (57,400) nunakuna kayarqan.

^32-33 Josépa tsurin Efraín trïbupitam chusku chunka waranqa pitsqa pachak (40,500) nunakuna kayarqan.

^34-35 Josépa tsurin Manasés trïbupitam kima chunka ishkë waranqa ishkë pachak (32,200) nunakuna kayarqan.

^36-37 Benjamín trïbupitam kima chunka pitsqa waranqa chusku pachak (35,400) nunakuna kayarqan.

^38-39 Dan trïbupitam joqta chunka ishkë waranqa qanchis pachak (62,700) nunakuna kayarqan.

^40-41 Aser trïbupitam chusku chunka juk waranqa pitsqa pachak (41,500) nunakuna kayarqan.

^42-43 Neftalí trïbupitam pitsqa chunka kima waranqa chusku pachak (53,400) nunakuna kayarqan.

⁴⁴ Pëkunatam Moisés, Aarón y chunka ishkë mandakuq Israel nunakuna censayarqan. Tsë mandakuq nunakunaqa cada trïbupitam juk karqan.

⁴⁵ Pëkunaqa nunakunata censayarqan ishkë chunka (20) watayuqpita witsëpam. Censayanqan nunakunaqa guërraman ëwayänanpaq poqushqanam kayarqan.

⁴⁶ Castanpa castanpa censayanqan nunakunaqa joqta pachak kima waranqa pitsqa pachak pitsqa chunka (603,550) nunakunam kayarqan.

Levitakunata mana censayanqan

⁴⁷ Israel nunakunata censar levitakunataqa manam censayarqantsu.

⁴⁸ Tsënö mana censayänanpaqqa Teyta Diosmi Moisésta kënö nirqan:

⁴⁹ <

⁵⁰ Pëkunataqa churanki Pactu Tolduta y tsëchö inshinakunata shumaq rikäyänanpaqmi. Mëpa ëwayaptikipis Sagrädu Toldutawan llapan inshinakunata pëkunallam apayanqa. Tsënöllam Sagrädu Toldu tumariq toldunkunatapis sharkatsiyanqa.

⁵¹ Mëpa ëwayaptikipis pëkunallam Sagrädu Tolduta paskarir apayanqa. Mëman chäyaptikipis Sagrädu Tolduta pëkunallam sharkatsiyanqa. Mëqanpis levita mana këkar Sagrädu Tolduman witiq kaqqa wanunqam.

⁵² Wakin trïbu Israel nunakunaqa bandërankuna kaqchömi tröpa tröpa toldunkunata sharkatsiyanqa.

⁵³ Levitakunaqa Pactu Toldu tumariqmi toldunkunata sharkatsiyanqa. Tsënöpam täpayanqa pipis lluta mana yëkuyänanpaq. Lluta yëkukuyaptinqa piñarmi Israel nunakunata castigashaq>>.

⁵⁴ Moisésta Teyta Dios ninqannöllam Israel nunakunaqa llapanta rurayarqan.