Joel 1 - Teyta Diospa Willakïnin

Murukïkunata pintiq kurukuna chipyëpa ushariyanqan

¹ Teyta Dios revelashqantam Petuelpa tsurin Joel willakur nirqan:

² Anciänukuna, kanan niyashqaqta shumaq wiyayämë. Judá nacionchö täraq nunakunapis, kanan willakushqäta wiyayämë. Kë castïgutanöqa ¿imëllapis rikäyarqunkitsuraq? Tëtëkikuna tiempuchö kënö mantsaripaq castïgu ¿imëllaqa kashqatsuraq?

³ Kë castïgu imanö kashqantapis tsurikikunata willayanki. Tsurikikunapis tsurinkunata willapäyanqa. Tsënölla willkëkikunapis tsurinkunata willapäyanqa.

⁴ Jatusaq pintiq kurukuna katuyashqantapis akapa pintiq kurukunam ushakurkuyashqa. Akapa pintiq kurukunapita quedaqninllatapis mallunya kurukunam mikukurkuyashqa. Tsëpita sobraqninllatapis wisuq kurukunam ushakurkuyashqa.

⁵ Upyallachö kakuq nunakuna, käyikuyë. Machashqalla purikuq nunakuna, waqakuyë. Pintiq kurukuna üvasta ushakurkuyashqa kayaptinmi vïnupis kannatsu upuyänëkipaq.

⁶ Yupëtapis mana puëdipaq soldädukunanömi tsë pintiq kurukuna markantsikman chäkarayämushqa. Colmillu kirunkunapis leonpanöran fïnu këkan.

⁷ Llapan üvaskunatapis chakrëpam ushayashqa. Hïgustapis pasëpam ushakurkuyashqa. Yurantapis rämankunatapis tullunllatam jaqiriyashqa.

⁸ Imëka casakunanpaq änishqan jövin wanukuptin doncëlla novian lütu ratashta yakakurkur waqashqannö jiktsuyanqëkiyaq waqakuyë.

⁹ Sacerdötikunapis waqakïkäyanmi tsaki mikï ofrendata ni vïnuta Teyta Diospa templunman pipis manana apaptinmi.

¹⁰ Trïgupis manam kannatsu. Üvaspa yurankunapis tsakishqam këkäyan. Olïvu montikunapis ushakashqam këkäyan. Llapan chakrachöpis pasëpam mana imapis kallantsu.

¹¹ Chakrachö uryaqkuna, üvasta cosechaqkuna, makillëkikunata choqpakurkur waqakuyë. Trïgutapis cebädatapis manakaqllapaqmi muruyarqunki.

¹² Üvaspa yurankunapis tsakiriyashqanam. Hïguskunapis ushakäyashqanam. Granadïllapa, palmërapa, manzänapa montinkunapis y llapan plantakunapis tsakishqanam këkäyan. Tsëmi alläpa mantsakashqa kayan.

¹³ Teyta Diosta altarchö sirwiq sacerdötikuna, lütu ratashta yakakurkur waqakuyë. Tsaki mikïpis ni vïnupis Teyta Diosnintsikpa wayinman apayämunanpaq manam kannatsu.

¹⁴ Anciänukunata y llapan nunakunata Teyta Diosnintsikpa wayinman ëllukäyänanpaq qayatsiyë. Teyta Diosta mañakur llapëki ayunayë.

¹⁵ ¡Allaw noqantsik, Teyta Dios juzganan junaq chëkämunnam! Tsë junaq chämuptin ¡imanöraq nunakuna jipalläyanqa! Tsë junaqllam llapanpaq poderyuq Teyta Dios tsëtsika nunakunata ushakätsinqa.

¹⁶ Mikïnintsik ushakäriptin alläpa muchïchönam këkantsik. Tsëmi Teyta Diosnintsikpa templunman ëwarpis kushikuntsiknatsu.

¹⁷ Murushqantsik trïgupis manam jeqamushqanatsu. Mikïkuna churaräkunan wayikunachöpis vientullam purikan.

¹⁸ Qewata mëchöpis mana tarirmi wäkakunapis pasëpa ankupëpaq waqakïkäyan. Tsëmi üshakunapis chiwakunapis wanur ushakëkäyan.

¹⁹ ¡Teyta Dios, yanapëkalläyämë! Jirkachö qewatapis, montitapis y qorakunatapis ninam usharishqa.

²⁰ Uranpa ëwaq yakupis tsakirishqam. Chusyaq jirkachö qewakunatapis ninam usharishqa. Tsëmi jirka animalkunapis rowakur waqapëkäyäshunki.