Filemón 1 - Teyta Diospa Willakïnin

Apóstol Pablo napakunqan

¹ Willapäkuq mayï kuyë Filemón: Noqa Pablum, Jesucristupa willakïninta willakushqäpita carcelchö këkar Timoteuwan kë cartata cartakayämü.

² Panintsik Apiata, willapäkuq mayintsik Arquiputa y wayikichö ëllukëkur Teyta Diosta alabaq wawqikunata y panikunatapis napëkullë.

³ Yayantsik Teyta Dios y Señor Jesucristo ankupäyäshurniki alli kawayänëkipaq yanapëkulläyäshï.

Markäkuq mayinkunawan Filemón alli kawanqan

⁴ Wawqi Filemón, Teyta Diosta imëpis mañakurmi qampaq pëta payllä nï.

⁵ Señornintsik Jesucristuman markäkushqëkitam y markäkuq mayintsikkunawan kuyanakur këkäyashqëkitam willayämashqa.

⁶ Tsëmi mañakïkä Jesucristuman markäkunëkipaq y noqantsik rëkur wanushqanpita alli kaqkunata ruranëkipaq.

⁷ Wawqi Filemón, kuyakuq kar markäkuq mayintsikkunata kallpatsëkashqëkita musyarmi noqapis alläpa kushikü.

Onésimuta Filemón chaskinanpaq Pablo rowanqan

^8-10 Wawqi Filemón, Jesucristupa willakïninta willakushqäpitam awkin kënïchö llawirëkä. Prësu këkanqäman esclävïki Onésimo chämuptin alli willakïta willapaptïmi Jesucristuta chaskikushqa. Tsëmi kananqa tsurïnöna këkan. Tsëmi qamta rowaq Onésimuta kachamuptï chaskinëkipaq. Jesucristupa apostolnin karninmi qamta obliguënikita puëdï. Tsënö këkaptinpis manam obliguënikita munätsu, sinöqa kuyakuq kaptikim Onésimuta chaskïkunëkipaq rowakuq.

¹¹ Esclävïki karpis nöpataqa manam shumaqtsu yanapashurqëki. Kananqa Jesucristuta chaskikushqana karmi ishkantsikta shumaqna yanapamäshun.

¹² Tsëmi alläpa llakikarpis Onésimuta yapë kutitsimü. [Pëta kikïtanö chaskïkullë.]

¹³ Alli willakïta willakushqäpita llawirëkaptï rantiki atiendimänanpaq quedatsikuptïpis allim kanman.

¹⁴ Tsënö kaptinpis esclävïkitaqa manam tsararäkümantsu, sinöqa kikikiran yanapamänanpaq o mana yanapamänanpaqpis ninëki.

¹⁵ Itsapis Teyta Dios permitishqa Onésimo juk tiempulla qampita yarqamunanpaq. Tsëmi kananqa Jesucristuta chaskikushqana kar imëyaqpis wawqikina kanqa.

¹⁶ Kananpita mananam esclävïkillanatsu kanqa, sinöqa kanqa kuyë wawqintsiknam. Tsënö këkaptinqa noqa kuyashqänölla makikiman kutimuptin qampis kuyanki.

¹⁷ Tsëmi markäkuq mayï kaptiki rowaq noqata chaskikamaqnö pëtapis chaskïkunëkipaq.

¹⁸ Esclävïki Onésimo imëkitapis suwakushqa kaptinqa o jaqëki kaptinqa paganaqpaq willëkamë.

¹⁹ Paganaqpaq kaqtaqa kikïmi qellqëkämü. Tsënö kaptinpis ama qonqëtsu Jesucristupa alli willakïninta willapashqaqpita qampis jaqä kashqëkita.

²⁰ Wawqi Filemón, markäkuq mayï kaptikim rowaq kë nishqäta ruranëkipaq. Rowakushqaqta ruraptikiqa kushikushaqmi.

²¹ Kë cartata cartakayämü imatapis nishqänö ruranëkipaq kashqanta musyarmi. Y nishqäpita mastaraq ruranëkipaq kashqantapis musyämi.

²² Teyta Diosta mañakushqëkinö carcelpita yarqamurqa watukaqniki shamushaqmi. Tsëpaq posädallä alistarëkë.

Cartapa ushanan

²³ Epafrasmi napashunki. Pëpis Jesucristupa alli willakïninta willakushqanpitam noqawan llawirëkan.

²⁴ Tsënöllam wawqintsik Marcuspis, Aristarcupis, Demaspis y Lucaspis napayäshunki. Pëkunam llapanchöpis yanapëkäyäman.

²⁵ Señor Jesucristo ankupäyäshurniki imëpis yanapëkushï. [Tsënö katsun.]