Esdras 1 - Teyta Diospa Willakïnin

Israel nunakuna nacionninkunaman kutiyänanpaq rey Ciro mandakunqan

¹ Persia nacionchö Ciro rey këta qallashqan watam Ciruta Teyta Dios yarpëta qorqan Israel nunakunata nacionninkunaman kutitsinanpaq. Tsënö kutitsirmi profëta Jeremías willakushqan cumplikärirqan. Tsëpitanam Ciruqa pregonëpapis y cartapapis jinantin mandakushqan nacionpa kënö willakatsirqan:

² <

³ Tsëmi Teyta Diosman markäkuq nunakuna mëqanpis ewkïta munaptin ordenä Jerusalénman chëkur Teyta Diospa templunta sharkatsiyänanpaq. Pëqa Israel nunakunata kuyaq Dios karmi Jerusalénchö këkan. Ëwayaptin mana jaqita yanapëkullätsun.

⁴ Tëkäyashqanpita Jerusalénman ëwaqkunata këchö quedaq Israel mayinkuna yanapayätsun qellëwan, qoriwan, wätakunawan y ofrendakunawanpis. Tsënö yanapëkuyätsun Teyta Diospa templunta Jerusalénchö sharkatsiyänanpaq>>.

⁵ Rey Ciro nishqannö templuta shäritsiyänanpaqmi wakin Israel nunakunata Teyta Dios shonqunkunachö käyitsirqan. Tsëmi Benjamín trïbupa y Judá trïbupa mandakuqninkuna, sacerdötikuna y levitakunapis Jerusalénman ëwayarqan.

⁶ Ewkuyaptinmi nöpankunachö llapan täraqkuna yanapayarqan qellëwan, qoriwan, mikïkunawan, wätakunawan chaniyuq kuyëllapaq kaqkunawan y ofrendakunawanpis.

⁷ Tsënöllam Teyta Diospa templunpita Nabucodonosor apakunqan inshinakunata rey Ciro qoykurqan Jerusalénman kutitsiyänanpaq. Tsë inshinakunaqa Nabucodonosor adorashqan diosninkunapa templunchömi churarëkäyarqan.

⁸ Jerusalénman kutitsiyänanpaqmi tesorëru Mitrídatesta rey Ciro qoykurqan. Pëmi yupaparqan Sesbasarta. Sesbasarqa Judáman ëwaqkunapa mandakuqninmi karqan.

⁹ Yupapar qoykuptinmi inshinakuna karqan: qoripita kima chunka (30) tazonkuna, qellëpita juk waranqa (1,000) tazonkuna, ishkë chunka isqun (29) cutsillukuna,

¹⁰ qoripita kima chunka (30) täsakuna, qellëpita chusku pachak chunka (410) täsakuna y juk waranqa (1,000) tukïläya inshinakuna.

¹¹ Qoripita y qellëpita chaskiyashqan llapan inshinakuna karqan pitsqa waranqa chusku pachakmi (5,400). Llapan tsëkunatam Israel mayinkunawan ëwar Babiloniapita Jerusalénman Sesbasar kutitsirqan.