Efesios 6 - Teyta Diospa Willakïnin

Tëtankunawan wamrankuna imanö kawayänanpaq

¹ Wamrakuna, Señornintsik Jesucristuta chaskikushqa këkarqa mamëkita y tëtëkita imëpis cäsukuyë. Tsënö cäsukuyänëkitam Teyta Dios munan.

² Punta kaq mandamientu promësayuq kaqqa kënömi nin: <

³ Tsënöpam kë patsachö atska wata kawanki>>.

⁴ Wamrayuqkuna, wamrëkikunata ama piñatsiyëtsu. Tsëpa rantinqa Señornintsik Jesucristo munashqannö kawayänanpaq shumaq käyitsiyë.

Esclävuwan patrón alli kawakuyänanpaq

⁵ Esclävukuna, kë patsachö këkaq patronnikikunata cäsur mandayäshunqëkita llapan voluntänikiwan rurayë. Jesucristuta cäsuyashqëkinölla patronnikikunatapis cäsuyë.

⁶ Patronnikikuna rikarëkäyäshuptikillaqa ama uryaq tukuyëtsu, sinöqa Jesucristupa sirwiqnin kar llapan voluntänikikunawan uryayë. Tsënöpam Teyta Dios munashqannö rurayanki.

⁷ Patronnikikuna mandayäshushqëkita llapan voluntänikikunawan rurayë. Manam nunakunallapaqtsu uryëkäyanki, sinöqa Señor Jesucristupaqmi rurëkäyanki.

⁸ Esclävu o mana esclävu kashqapis allita rurashqantsikpitam Jesucristo gloriachö premiuta qomäshun.

⁹ Patronkuna, qamkunapis esclävïkikunata shumaq rikäyë. Qayapäyänëkipa rantin gänas gänaslla uryayänanpaq kallpatsayë. Käyikuyë esclävu karpis o patrón karpis ciëluchö këkaq patronpa makinchö këkashqantsikta. Pëqa llapantsiktapis iwalmi rikämantsik.

Supëkunata pärapunantsikpaq käyitsikï

¹⁰ Wawqikuna y panikuna, Señornintsik Jesucristo poderninwan yanapëkäyäshuptikiqa pëman alli markäkur kawakuyë.

¹¹ Diabluta pärapuyänëkipaq Teyta Dios alistamushqan armadürakunata yakakuyë.

¹² Noqantsikqa manam nuna mayintsikwantsu pelyëkantsik, sinöqa puëdiq supëkunawanmi. Pëkunaqa mana rikakuq karpis jinantin patsachömi mana allikunata rurayan.

¹³ Tsënö këkaptinqa Teyta Dios alistamushqan armadürakunata yakakuyë. Alli alistakuyaptikiqa supëkuna shamurpis manam venciyäshunkitsu.

¹⁴ Wachukïkiqa rasun kaqllata parlayashqëkim. Chalëquïkiqa allikunata rurayashqëkim.

¹⁵ Bötasnikiqa Jesucristupa willakïninta willakuyashqëkim.

¹⁶ Escüdïkiqa Teyta Diosman llapan shonqïkikunawan markäkuyashqëkim. Tsë escüduwanmi nina rawrëkaq flëchawannö Satanás atacayäshuptikipis tsapäkuyanki.

¹⁷ Casquïkiqa Teyta Dios salvayäshushqëkim. Espädëkiqa Teyta Diospa palabranmi. Tsëwanmi Espíritu Santu imëpis yanapayäshunki.

¹⁸ Imë hörapis Espíritu Santu käyitsiyäshushqëkinö Teyta Diosta mañakuyë. Mana ajayëpa imëpis rowakuyë. Markäkuq mayikikunapaqpis mana qonqëta mañakuyë.

¹⁹ Noqapaqpis Teyta Diosta mañakïkulläyë willapäkur shumaq parlanäpaq y pitapis mana mantsashpa Jesucristupa alli willakïninta willapänäpaq.

²⁰ Teyta Diospa willakuqnin kar willakïninta willakushqäpitam prësu këchö llawirëkä. Ima kaptinpis Teyta Diosta mañakïkuyë mana mantsakushpa pitapis willapänäpaq.

Cartapa ushanan

²¹ Kuyë wawqintsik Tíquico chämurmi willayäshunki imanö këkashqäta y imata rurëkashqätapis. Pëpis Señor Jesucristupa willakuqninmi këkan.

²² Tsëmi pëta kachëkämü imanö këkashqätapis willayäshunëkipaq. Pëmi kallpatsayäshunki Teyta Diosman shumaq markäkuyänëkipaq.

²³ Teyta Dios y Señor Jesucristo yanapëkulläyäshï pëman markäkur kuyanakur alli kawakuyänëkipaq.

²⁴ Señornintsik Jesucristuta llapan shonqunkunawan kuyaqkunata Teyta Dios ankupar imëpis yanapëkullätsun. [Tsënö katsun.]