Efesios 5 - Teyta Diospa Willakïnin

Teyta Diospa wamrankuna imanö kawayänanpaq ninqan

¹ Teyta Dios kuyashqan wamrankuna këkarqa pë jutsannaq kashqannö qamkunapis jutsannaq kayë.

² Jesucristo kuyakuq kashqannö qamkunapis kuyakuq kayë. Kuyakuq karmi noqantsik rëkur wanur Teyta Diospaq shumaq pukutaq sacrificiunö kashqa.

³ Qamkunaqa Teyta Dios kuyashqan santu nunankuna këkarqa fornicación jutsata ama rurayëtsu, codiciösu ama kayëtsu, ni ima jutsatapis ama rurayëtsu. Tsëkunapaqqa parlëllapis ama parlayëtsu.

⁴ Llutankunata, manakaqkunata ni llutan yarpëman apakuq brömakunatapis ama parlayëtsu. Tsëpa rantinqa Teyta Diosta imëkapitapis payllä niyë.

⁵ Këkunata shumaq käyikuyë: fornicación jutsata ruraqkuna y ambiciösu kaqkunaqa Teyta Diospa y Jesucristupa mandakïninman manam yëkuyanqatsu. (Ambiciösu kaqkunaqa ïduluta adoraqnömi këkäyan.)

⁶ Mana cäsukur jutsa ruraqkunataqa Teyta Diosmi piñar castiganqa. Tsënö kaptin jutsata rurayänëkipaq pipis kallpatsayäshuptiki ama cäsuyankitsu.

⁷ Wakin nunakuna jutsata rurayaptinpis qamkunaqa ama rurayankitsu.

⁸ Nöpataqa qamkunapis jutsata rurar paqaschö këkaqnömi kawayarqëki. Kananqa Jesucristuta chaskikurmi aktsichöna kawëkäyanki. Tsënö këkarqa Teyta Dios munashqannö waran waran kawakuyë.

⁹ Aktsichöna kawakurqa ankupäkuqmi kayanki, allillatanam rurayanki y rasun kaqllatanam parlayankipis.

¹⁰ Teyta Diospa shonqunpaqnö kawayänëkipaq imëpis yarpakachäyë.

¹¹ Teyta Diosta mana cäsukuq nunakuna llutankunata rurayaptinpis qamkunaqa ama rurayëtsu. Tsëpa rantinqa llutan rurëkunata jaqiriyänanpaq käyitsiyanki.

¹² Pëkuna pakëllapa jutsata rurayashqanqa alläpa penqakïpaqmi këkan. Tsëkunataqa ama ni parlëllapis parlayëtsu.

¹³ Atsikyaptin imapis rikakushqannömi pëkuna jutsata rurakuyashqanpis musyakanqa.

¹⁴ Jutsata ruraqkuna käyikuyänanpaq juk parlapis kënömi nin: <>.

¹⁵ Tsënö këkaptinqa imanö kawëkäyashqëkitapis shumaq käyikuyë. Mana käyikuq nunanö kawayänëkipa rantin shumaq käyïkuq nunanö kawakuyë.

¹⁶ Nunakuna mana allita rurar kawayaptinpis qamkunaqa allikunallata imëpis rurayë.

¹⁷ Mana käyikuq nunanöqa ama kawayëtsu. Tsëpa rantinqa Señornintsik munashqannö kawayänëkipaq shumaq käyikuyë.

¹⁸ Ama machakuyëtsu. Machashqa nunaqa llutankunatam ruran. Tsëpa rantinqa Espíritu Santupa poderninchö kawakuyë.

¹⁹ Salmukunata, himnukunata y qotsukunata llapan shonqïkikunawan qotsur Teyta Diosta alabayë.

²⁰ Ima kaptinpis Señornintsik Jesucristupa shutinchö Teyta Diosta payllä nikuyë.

Casädukuna imanö kawayänanpaqpis

²¹ Jesucristuta mantsakurqa juknintsik juknintsik respetanakur kawakushun.

²² Warmikuna, Señor Jesucristuta cäsukuyashqëkinölla qowëkikunatapis cäsukuyë.

²³ Warmiqa qowanpa munëninchömi këkan. Tsënöllam iglesiapis Jesucristupa munëninchö këkan. Iglesiam pëpa cuerpun y pëmi iglesiapa salvaqnin.

²⁴ Tsëmi Jesucristuta iglesian cäsukushqannö warmipis qowanta cäsukunan.

²⁵ Ollqukuna, iglesiata Jesucristo kuyanqannö warmikikunata kuyayë. Iglesiata kuyarmi wanïmanpis Jesucristo charqan.

²⁶ Tsënö wanurqan pëman markäkuqkuna Teyta Diospa palabranwan paqashqa kar santu kayänanpaqmi.

²⁷ Tsëmi kikinpa nöpanman pushanqa chipapäkïkaqta, mana jutsayuqta, santuta y pë munashqannö këkäyaqta.

²⁸ Pipis warminta kuyaqqa kikinpa cuerpuntapis kuyanmi. Tsëmi cuerpunta kuyashqannölla warmintapis kuyanan.

²⁹ Manam pipis cuerpunta maltratantsu, sinöqa alli mikurmi cuidan. Tsënöllam Jesucristupis iglesianta cuidan.

³⁰ Noqantsikmi Jesucristupa cuerpun, [ëtsan y tullun] këkantsik.

³¹ Teyta Diospa palabranpis kënömi nikan: <>.

³² Tsë qellqarëkaqqa noqantsikwan Jesucristupis juknölla kashqantsiktam käyitsimantsik. Tsënö käyitsimashqantsikqa alläpa espantakïpaqmi.

³³ Tsëmi yapëpis niyaq: Cuerpïkikunata kuyayashqëkinölla warmikikunatapis kuyayë. Warmikunapis qowankunata respetayätsun.