Efesios 4 - Teyta Diospa Willakïnin

Juk shonqulla kawanantsikpaq ninqan

¹ Tsënö këkaptinqa Jesucristupa willakïninta willakushqäpita prësu llawirarpis qamkunatam rowayaq Teyta Dios munashqannö imëpis kawayänëkipaq. Tsënö kawakuyänëkipaqmi Teyta Dios qayayäshurqunki.

² Mana yachaq tukushpa kawakuyë, pïmëpaqpis alli shonqu kayë y kuyanakur pacienciakuyë.

³ Espíritu Santu yanapayäshushqëkinölla markäkuq mayikikunawan juk shonqulla alli kawakuyë.

⁴ Jesucristuman markäkuq kaqqa llapantsikmi juk cuerpulla këkantsik. Jukllëllam Espíritu Santupis. Juk salvacionllata chaskinantsikpaqmi Teyta Dios qayamashqantsik.

⁵ Jukllëllam Señornintsikpis. Jukllëllam markäkïnintsik. Jukllëllam bautismu.

⁶ Jukllëllam Teyta Diospis. Pëmi llapantsikpa Teytantsik, llapantsiktam makinchö tsarëkämantsik, llapantsiktam yanapëkämantsik y llapantsikwanmi këkan.

⁷ Juk cuerpulla kashqapis juknintsik juknintsiktam Jesucristo kuyakuq kar churamarquntsik pëta sirwinantsikpaq.

⁸ Tsëmi Teyta Diospa palabranpis kënö nikan: <>.

⁹ Witsanqanta niptinmi käyintsik Jesucristo puntata kë patsaman urämushqanta.

¹⁰ Kë patsaman uräramurmi ciëluman kutikushqa. Y imëkapitapis mas puëdiq karmi llapantapis makinchö tsararëkan.

¹¹ Pëmi wakinta churashqa apóstol kayänanpaq, wakintana profëta kayänanpaq, wakintana alli willakïninta willakuyänanpaq y wakintana pastor kar yachatsikuq kayänanpaq.

¹² Pëkunatam Jesucristo churashqa markäkuqkunata kallpatsar yachatsiyänanpaq. Tsënö yachatsiyaptinmi listuna këkäyanqa Teyta Dios munashqanta rurar Jesucristupa cuerpun iglesiata llapanchöpis yanapayänanpaq.

¹³ Tsënö kaptinqa llapantsik juk shonqulla kar y Teyta Diospa Tsurinman markäkur Jesucristo kawashqannö noqantsikpis kawashun.

¹⁴ Tsënö kawarqa manam pishi wamranönatsu kashun pipis mana allikunata yachatsimarnintsik creyitsimänapaq. Tsënöllam päjata vientu wakman këman apashqannönatsu kashun.

¹⁵ Tsëpa rantin juknintsik juknintsik kuyanakur rasun kaqllata imëpis parlashun. Tsënöpam Jesucristo kawashqannö noqantsikpis kawashun. Jesucristo peqantsik kaptin

¹⁶ y noqantsik cuerpun kashqam juknintsik juknintsik yanapanakunantsikpaq churamantsik. Tsëmi moquntsikkuna tsararänakushqannö yanapanakur kuyanakunantsikpaq käyikushun.

Mushuq kawëta chaskikunqantsik

¹⁷ Tsënö kaptinmi Señornintsik Jesucristupa apostolnin kar qamkunata käyitsiyaq Teyta Diosta mana chaskikuq nunakunanö mana kawayänëkipaq. Pëkunaqa yarpëninkunapis upapa yarpënin kaptinmi

¹⁸ manakaqkunata yarpakachäyan. Juiciunnaq karmi y shonqunkuna chukruyashqa kaptinmi Teyta Dios munashqannötsu kawayan.

¹⁹ Pëkunaqa shonqunkuna munashqanllata rurayaptinmi penqakïninkunapis kantsu. Jukwan jukwan kakurmi tukïläya melanëpaq jutsakunata rurakuyan.

²⁰ Qamkunaqa manam tsënö kawayänëkipaqtsu Jesucristupa willakïninta yachakuyarqunki.

²¹ Jesucristupa alli willakïninta rasunpa chaskikushqa këkarqa y pë munashqannö kawayänëkipaq yachakïkarqa

²² nöpata kawayashqëkinö amana kawayënatsu, sinöqa makwa ratashta jitariqnö unë kawayashqëkita jitariyë. Nöpataqa allita rurayashqëkita yarparmi llutan rurëkunaman churakashqa kayarqëki.

²³ Kananqa Espíritu Santu käyitsiyäshushqëkinöllana kawakuyë.

²⁴ Teyta Dios kashqannö qamkunapis kayänëkipaqmi mushuq kamashqan nunana këkäyanki. Tsënö këkarqa Teyta Dios munashqannö jutsannaq kawayänëkipaq mushuq kawëchöna kayë.

²⁵ Ama ulipänakuyëtsu. Llapëkipis juk castanölla këkarqa rasun kaqllata parlayë.

²⁶ Piñakurpis ama jutsata rurayëtsu. Qanyasninpiqa ama piñashqalla kayëtsu.

²⁷ Piñashqalla karqa shonqïkikunatam diablupaq kichëkäyanki.

²⁸ Nöpata suwakushqa karpis amana suwakuyënatsu. Suwakuyänëkipa rantin uryayë. Tsënöpam imëkikunapis kanqa waktsakunata yanapayänëkipaq.

²⁹ Ama imatapis llutankunata parlayëtsu. Tsëpa rantinqa nuna mayikita kallpatsayänëkipaq alli kaqkunallata parlayë.

³⁰ Llutankunata rurar Espíritu Santuta ama llakitsiyëtsu. Pëmi shonqïkikunata sellamushqa Jesucristo kutimunan junaq salvashqa kayänëkipaq.

³¹ Ama chiki kayëtsu, piñakuq kayëtsu ni qayapäkuq kayëtsu. Ama wasarima kayëtsu ni manakaqkunata parlayëtsu.

³² Tsënö kawakur jukniki juknikipis ankupänakur kawakuyë. Jesucristo wanushqanpita Teyta Dios perdonayäshushqëkinölla perdonanakuyë.