Efesios 3 - Teyta Diospa Willakïnin

¹ Tsëmi noqa Pablo, Jesucristupa alli willakïninta qamkunata y wakin mana Israel nunakunatapis willapashqäpita prësu llawirëkar...

Mana Israel nunakunatapis willapänanpaq Pabluta churanqan

² Teyta Dios kuyakuq karmi churamashqa qamkunaman y wakin mana Israel nunakunamanpis alli willakïninta apanäpaq. Tsë willakïtaqa musyayankinam.

³ Alli willakïninta mana musyashqa kayaptinpis Teyta Diosmi käyitsimashqa tsë willakï ima kashqanta. Tsënö käyitsimashqantam kë cartachö willëkäyaq.

⁴ Tsëmi kë cartata leyir käyikuyanki Jesucristupa willakïninta willakushqäta.

⁵ Tsë alli willakïta manam unë nunakuna musyayarqantsu. Kananran santu apostolkunata y profëtakunatapis Espíritu Santu käyitsiyämashqa.

⁶ Tsë willakïqa kënömi nikan: Teyta Diospa alli willakïninta chaskikurmi mana Israel nunakunapis salvacionta tariyanqa. Tsëmi Israel nunakunata Teyta Dios änishqankunata pëkunapis chaskiyanqa. Tsënöpam llapantsikpis tsë castanöllana këkantsik.

⁷ Tsë alli willakïninta willakunäpaqmi Teyta Dios kuyakuq kar poderninwan churamashqa.

⁸ Teyta Diosman llapan markäkuqkunapitapis mana sirwiq këkaptïmi Teyta Dios kuyamar churamashqa Jesucristupa alli willakïninta mana Israel nunakunaman chätsinäpaq. Tsë alli willakïninmanqa manam ima riquëzapis iwalantsu.

⁹ Unëpita mana musyayashqan willakïta pïmëtapis willapänäpaqmi llapantapis kamaq Teyta Dios churamashqa.

¹⁰ Tsënöpam Jesucristuman markäkuqkuna salvakuyaptin supëkunapis y ciëluchö këkaq llapan angelkunapis käyikäyan Teyta Dios alläpa yachëyuq kashqanta.

¹¹ Tsënö käyiyänanpaqmi Teyta Dios unëpita dispunirqan. Tsë dispunishqanqa cumplishqanam këkan Señornintsik Jesucristo noqantsik rëkur wanushqanwan.

¹² Tsëmi Jesucristuman markäkur Teyta Diosta mañakuntsik mana mantsakushpa.

¹³ Jesucristo salvamashqantsikta musyëkarqa mana Israel nunakuna rëkur prësu llawiraptïpis ama llakikuyëtsu. Llakikuyänëkipa rantin salvakuyänëkipaq willayashqaqta kushikuyë.

Jesucristo alläpa kuyamanqantsik

¹⁴ Tsëmi qonqurikur [Señornintsik Jesucristupa] Papänin Teyta Diosta mañakü.

¹⁵ Pëmi kamashqa ciëluchö këkaqkunata y kë patsachö këkaqkunatapis.

¹⁶ Pëtam mañakü gloriachö riquëzankuna kashqanmannö Espïritunwan poderta qoyäshunëkipaq,

¹⁷ Tsënöllam mañakü shumaq markäkuyaptiki Jesucristo shonqïkikunachö täränanpaq. Tsënöpam alli sipiyuq montinö y alli cimientushqa wayinö kar pëpa kuyakïninllachö kawakuyanki.

¹⁸ Kuyakïninchö kawakurmi llapan markäkuq mayintsikkunawan käyikuyanki Jesucristo alläpa kuyamashqantsikta. Pë kuyakuq kashqanqa alläpa anchum, largum, altum y hondum këkan.

¹⁹ Tsëmi Teyta Diosta mañakü kuyakïninta käyikatsiyäshunëkipaq. Tsënöpam Teyta Dios qamkunachö kar pë munashqannö kawayänëkipaq imëpis yanapayäshunki.

²⁰ ¡Teyta Diosta alabëkulläshun! ¡Alläpa puëdiq karmi mañakushqantsikpitapis y yarpashqantsikpitapis masraq yanapamantsik!

²¹ ¡Iglesian kanantsikpaq Jesucristo salvamashqantsikpita llapantsik mana utinëpa imëpis alabëkulläshun! Amén.