Efesios 2 - Teyta Diospa Willakïnin

Ankupämarnintsik Teyta Dios salvamanqantsik

¹ Nöpataqa qamkuna jutsëkikuna rëkur imëka wanushqanömi kayarqëki.

² Wakin nunakunanömi Teyta Diosta mana cäsukur Satanáspa makinchö kawayarqëki.

³ Tsënöllam llapantsikpis mana allikunata munapar y mana allikunata yarpar kawakurqantsik. Tsënö kawakushqantsikpitam wakin nunakunatanö Teyta Dios castigamänantsikpaq këkarqan.

⁴ Tsënö këkashqapis Teyta Dios ankupäkuq karmi alläpa kuyamarquntsik.

⁵ Tsëmi jutsantsik rëkur wanushqanö këkashqapis Jesucristuta wanushqanpita kawaritsimur noqantsiktapis wanushqanö kashqantsikpita kawaritsimarquntsik. Ankupäkuq këninwanmi salvamarquntsik.

⁶ Jesucristuwan kawaritsimashqantsiknömi gloriachö pëwan tätsimarquntsik.

⁷ Tsënö tätsimarquntsik Jesucristuchö kashqa alläpa ankupämashqantsikta shamuq watakunachö pïmëpis käyiyänanpaqmi.

^8-9 Teyta Dios ankupäkuq karmi Jesucristuman markäkushqa salvacionta qaramashqantsik. Manam kikintsikpitatsu ni allita rurashqantsikpitatsu salvacionta tarirquntsik, sinöqa Teyta Diospitam. Tsëmi pipis alabakunqatsu: <> nir.

¹⁰ Jesucristuchö kashqam allikunata rurar kawanantsikpaq mushuq kawëta Teyta Dios qomarquntsik. Tsënö kawanantsikpaqqa unëpita patsam destinamarquntsik.

Israel nunakunata y mana Israel nunakunatapis Jesucristo amishtatsinqan

¹¹ Nöpata imanö kayashqëkitapis ama qonqayëtsu. Israel nunakunaqa señalakushqa karmi mana señalakuyashqëkipita manakaqpaq churayäshurqëki.

¹² Jesucristupa willakïninta manam musyayarqëkitsu. Israel nuna mana kayaptikim Teyta Dios äninqanta chaskiyänëkipaq rurashqan pactukunapis qamkunapaqtsu karqan. Kë patsachö Diosninnaq oqrakashqam kawayarqëki.

¹³ Teyta Diospita karuchö kashqa karpis Jesucristuchö karnam yawarninta ramashqanpita Teyta Diospa nöpanchöna këkäyanki.

¹⁴ Jesucristo tsënö salvayäshurqunki alli kawëta qomaqnintsik karmi. Mana rikänakunapaq tsaparaq perqata juchuratsiqnömi Israel nuna o mana Israel nuna kashqapis juk castanölla kanantsikpaq ëllumarquntsik.

¹⁵ Tsënö ëllumarquntsik Israel nunakunapa leyninkunata, mandamientukunata y reglamentukunata ushakätsirmi. Jesucristuchö mushuq nuna kanantsikpaqmi Israel nunakunatapis y mana Israel nunakunatapis ëllumarquntsik.

¹⁶ Cruzchö wanurmi Teyta Dioswan amishtatsimarquntsik mana chikinakushpa shumaqna kawakunapaq.

¹⁷ Kë patsaman Jesucristo shamurmi Teyta Diospa makinchö alli kawanantsikpaq kaq willakïta willakurqan. Tsë willakïqa Teyta Diospita karuchö këkaq mana Israel nunakunapaq y pëpa nöpanchö këkaq Israel nunakunapaqwanmi.

¹⁸ Tsëmi Israel nuna kashqapis mana Israel nuna kashqapis Teyta Diosta imë hörapis mañakunantsikpaq Jesucristo rëkur Espíritu Santu yanapëkämantsik.

Teyta Dios täkunan templu kanqantsik

¹⁹ Tsënö kaptinqa mana Israel nunakuna karpis mananam forastërunatsu këkäyanki, sinöqa Teyta Diospa wamrankunana karmi llapan salvashqan kaqkunawan tsë castallana këkäyanki.

²⁰ Alli cimientushqa shäritsishqa wayinömi këkäyanki. Tsë wayipa cimientunqa apostolkuna y profëtakuna yachatsiyashqankunam këkan. Jesucristunam wayipa esquïnanchö mas allin kaq maestra rumi këkan.

²¹ Jesucristuman markäkushqam perqata rumiwan shumaq perqaqnö noqantsiktapis perqëkämantsik Teyta Diospa sagrädu templun kanantsikpaq.

²² Qamkunapis Jesucristuman markäkurmi templu perqashqan ruminö këkäyanki. Tsë templuchömi Teyta Diospa Espïritun tëkan.