Efesios 1 - Teyta Diospa Willakïnin

Apóstol Pablo napakunqan

¹ Éfeso markachö salvashqa kaqkuna: Noqa Pablo, Jesucristupa apostolnin kanäpaq Teyta Dios akramashqa kaptinmi qamkunaman kë cartata cartakämü. Jesucristo munashqannö kawarmi Teyta Diospana këkäyanki.

² Yayantsik Teyta Dios y Señor Jesucristo ankupäyäshurniki alli kawakuyänëkipaq yanapëkulläyäshï.

Teyta Diosta payllä nikunqan

³ ¡Señor Jesucristupa Teytan Dios alabashqa këkullätsun! Jesucristuchö kashqam gloriachö këkaq tukïläya bendicionninkunata qomarquntsik.

⁴ Kë patsata manaraq kamarmi Jesucristuman churamarnintsik Teyta Dios akramarqantsik pëpa nöpanchö jutsannaq y santu kanantsikpaq.

⁵ Y kuyamarnintsikmi kikin munashqannö destinamarqantsik Jesucristo rëkur wamran kanantsikpaq.

⁶ Kuyë Tsurin rëkur ankupäkuq këninwan destinamashqantsikpitam imëpis pëta alabashun.

⁷ Ankupäkuq karmi Tsurinpa yawarninwan rantimarnintsik llapan jutsantsikkunapita perdonamarquntsik.

⁸ Alläpa kuyamarnintsikmi y yachëta qomarnintsikmi

⁹ nunakuna mana musyayashqanta Teyta Dios musyatsimarquntsik.

¹⁰ Tsëmi musyatsimarquntsik ciëluchö kaqkunatapis y kë patsachö kaqkunatapis pë nishqan junaq Jesucristupa makinman llapanta churananpaq kashqanta.

¹¹ Kikin yarpashqannö llapantapis ruraq karmi noqantsiktapis Jesucristuchö këkashqana Teyta Dios destinamarquntsik herenciata chaskir salvashqa kanantsikpaq.

¹² Pëmi permitishqa Israel nunakuna Jesucristuman puntata markäkur pëta alabayänanpaq.

¹³ Qamkunapis alli willakïninta wiyëkurmi Jesucristuman markäkur salvakuyarqunki. Tsënöpam änikushqan Espíritu Santuwan Teyta Dios shonqïkikunata sellamushqa.

¹⁴ Espíritu Santuta qomarnintsikmi Teyta Dios musyatsimantsik herenciantsikta qomänantsikpaq kashqanta y wamran kanantsikpaq rantimashqantsikta. Tsënö salvamashqantsikpitam imëpis pëta alabashun.

Wawqikunapaq y panikunapaq Teyta Diosta mañakunqan

¹⁵ Tsëmi Señor Jesucristuman shumaq markäkur wawqikunawan y panikunawan kuyanakuyashqëkita musyar

¹⁶ Teyta Diosta qamkunapaq mañakurmi imëpis pëta payllä nikä.

¹⁷ Tsënöllam Señornintsik Jesucristupa Tëtan poderyuq Teyta Diosta mañakü Espíritu Santuwan käyikatsiyäshuptiki pëta reqiyänëkipaq.

¹⁸ Shonqïkikunachö tsënö käyitsiyäshuptikim musyayanki Teyta Dios qayayäshurniki imapaq salvayäshunqëkita, alläpa alli herenciata chaskiyashqëkita

¹⁹ y pëman markäkuqkunata poderninwan shumaq yanapashqanta.

²⁰ Tsë poderninwanmi Jesucristuta wanushqanpita kawarirkatsimur gloriachö allawka kaq lädunman tätsishqa.

²¹ Tsënöpam Jesucristuta Teyta Dios churashqa kë vïdachö y wak vïdachöpis poderyuq kananpaq. Tsëmi angelkunapitapis, supëkunapitapis y llapanpitapis puëdiq këkan.

²² Tsënö poderyuq kaptinmi llapantapis pëpa poderninman Teyta Dios churashqa. Iglesiata kuyarmi pëta churashqa llapanpapis mandakuqnin kar peqan kananpaq.

²³ Noqantsiknam iglesian kar cuerpun këkantsik. Tsëmi imëpis yanapëkämantsik munashqannö kawanantsikpaq. Pëpa makinchömi llapan imëkapis këkan.