Apocalípsis 1 - Teyta Diospa Willakïnin

Librupa qallanan

¹ Kë libruchömi qellqarëkan Jesucristuta Teyta Dios revelashqan. Jesucristum angelninta kachamur tsë revelacionta sirwiqnin Juanta revelarqan. Tsënö revelarmi sirwiqninkunata imapis pasananpaqna kaqkunata käyitsirqan.

² Juannam tsë revelacionta qellqar Teyta Dios nishqankunata, Jesucristo nishqankunata y llapan rikashqankunata qellqashqa.

³ Kushishqam kayanqa kë qellqarëkaqkunata leyiqkuna y leyiyashqanta wiyar cäsukuqkuna. Kë qellqarëkaqkunaqa cumplikänanpaqnam këkan.

Qanchis iglesiakunachö ëllukaq wawqikunata y panikunata napanqan

⁴ Asia provinciachö qanchis iglesiakunachö ëllukaq wawqikuna y panikuna: Noqa Juanmi qamkunaman qellqëkämü. Unëpita kawaq, kananpis këkaq y shamunanpaq këkaq Teyta Dios y trönunpa nöpanchö këkaq qanchis espïritukunapis ankupäyäshurniki alli kawayänëkipaq yanapëkulläyäshï.

⁵ Jesucristupis alli kawayänëkipaq yanapëkuyäshï. Pëmi Teyta Dios munashqannölla willakïninta willakushqa y wanushqakunapitam puntata kawarimushqa. Kë patsachö llapan reykunapitapis mas puëdiqmi këkan. Pëmi kuyamarnintsik yawarninta ramar llapan jutsantsikta paqamushqa.

⁶ Mandamaqnintsik rey karmi makinchö kanantsikpaq ëllumarquntsik. Tsënöllam Teytan Diosta sirwiq sacerdötikuna kanantsikpaq churamarquntsik. ¡Jesucristo imëpis alabashqa këkullätsun! ¡Pë japallan mandamaqnintsik këkullätsun! Tsënö katsun.

⁷ ¡Pukutë jananchömi Jesucristo kutimunqa! Kutimuqtam llapan nunakuna rikäyanqa. Pëta tuksir wanutsiqkunapis rikäyanqam. Kutimuqta rikarmi jinantinchö nunakuna waqayanqa. Tsënömi kanqa. Amén.

⁸ Unëpita kawaq, kananpis këkaq y shamunanpaqna këkaq puëdiq Teyta Diosmi kënö nin: <>.

Jesucristuta Juan rikanqan

⁹ Noqaqa Jesucristuman markäkuq mayikikuna Juanmi kä. Qamkunanöllam Jesucristupa mandakïninchö këkä. Jipatsiyäshushqëkinöllam noqatapis Jesucristuman markäkushqäpita jipëkätsiyäman. Qamkunanöllam pëpa nöpanman chänäpaq mana ajayashpa shuyakïkä. Teyta Diospa willakïninta willakushqäpitam y Jesucristo salvamaqnintsik kashqanta willakushqäpitam Patmos islachö prësu këkä.

¹⁰ Tsëchö këkarmi domingu junaq Espíritu Santupa poderninchö këkar wiyarqä cornëta waqamuqnöraq qepächö kënö nimuqta:

¹¹ <<[Alfa y Omegam noqa kä. Qallanan y ushananmi kä.] Revelacionchö rikätsishqaqkunata juk rölluman qellqarkur apatsi [Asia provinciapa] qanchis markankunachö këkaq iglesiakunaman. Tsë markakunaqa kayan Éfeso, Esmirna, Pérgamo, Tiatira, Sardis, Filadelfia y Laodiceam>>.

¹² Qepächö tsënö parlamuqta wiyarnam tumarqä pï kanqanta rikänäpaq. Tsëchömi rikarqä qoripita rurashqa qanchis candelabrukuna rawrëkäyaqta.

¹³ Tsë candelabrukuna chöpinchömi rikarqä nunapa tsurin rikuq këkaqta. Pëmi chaki puntanyaq ratashnin yakashqa këkarqan. Pëchunpam qoripita rurashqa anchu cintuwan watararqan.

¹⁴ Aqtsanpis yulaq millwanö y rajunö yulaqmi karqan. Nawinnam ninanöraq tillapyäkurqan.

¹⁵ Chakinkunapis rawrëkaq broncinömi chipapäkurqan. Parlashqanpis atska yaku ëwar qapariqnömi karuman wiyakurqan.

¹⁶ Allawka kaq makinchömi qanchis qoyllurkunata tsararëkarqan. Shiminpitanam ishkan lädunpa afilashqa espäda yarqëkämurqan. Qaqllanpis intinöran chipapäkurqan.

¹⁷ Pëta rikëkurmi puntanman wanushqanö ishkirirqä. Tsëmi allawka kaq makinwan yatëkamar nimarqan: <

¹⁸ Wiñëpa wiñënin kawaqmi kä. Tsënö kawanäpaqmi wanutsiyämashqanpita kawarimurqü. [Amén.] Noqam tsararëkä wanushqakunapa almankuna këkäyashqan llävita.

¹⁹ Llapan rikashqëkita qellqë. Kanan pasëkashqanta y pasananpaq këkaqkunatapis llapanta qellqë.

²⁰ <>.