HEBREOS 1 - Quechua North Bolivian

Dios parlan

¹ Ñaupajka Dios achqha cutita imaymanamanta profetacuna uqhunta abuelonchiscunaman parlamorkan.

² Cunanka cay p'unchaycunapi Churin uqhunta parlamuwanchis. Payninta cay pachata ruwarkan, paymantaj Dios tucuy imacunata kon herenciata jina.

³ Payka Diospaj sumaj glorioso c'anchaynin, Dios quiquinpaj caynin. Payka atiyniyoj palabranwan tucuy imata sumajta purichin. Juchanchiscunamanta limpiochay pasayta, janaj pachapi tiyaycun Diospaj paña ladonpi.

Diospaj Churin curaj, angelcunamanta nejtenka

⁴ Diospaj Churenka astawan curaj, angelcunamanta nejtenka. Herenciata jina astawan sinchi importante sutita jap'ekan angelcunamanta nejtenka.

⁵ Dioska jayc'ajpas ni mayken angelta ninchu: “Kanka Churiy canqui; cunan noka Tatayqui cani” nispaka. Mayken angelmantapas nillantajchu: “Noka paypaj Tatan casaj, paytaj nokapaj Churiy canka” nispa.

⁶ Uj chhicapeka ch'ulla Churinta tucuy cajcunaman ricuchispa, nerkan: “Diospaj tucuy angelnincuna payta adorachuncu.”

⁷ Angelcunamantaka Dios nin: “Dioska angelnincunata wayrata jina ruwan, sirvejnincunatataj nina laurayta jina.”

⁸ Churimantataj nin: “Oh Dios, gobiernoyqueka wiñaypaj, gobernanquitaj cabal justiciawan.

⁹ Sumajcajta munacunqui; mana allincajta chejninqui. Chayraycu Dios, Diosniyqui, ajllasunqui. Cusicuywan junt'achisunqui astawanraj ujcunamanta nejtenka.”

¹⁰ Nillantaj: “Oh Señor, kan kallariymantapacha cay pachata ruwarkanqui; kan quiquiyqui janaj pachata ruwarkanqui.

¹¹ Tucuy cay pachaka tucuconka, kancajtaj wiñaypaj canqui. Tucuy cay pachaka p'acha jina mauc'aconka.

¹² ¡P'achata jina suc'anqui, p'acha mudacoj jina cambianqui! Kancajtaj caskallanpuni canqui; causayniyqueka mana tucuchaconkachu ni jayc'ajpas.”

¹³ Dios jayc'ajpas ninchu mayken angelnincunatapas: “Paña ladoypi tiyacuy, enemigoyquicunata atipaspa chaquiyquiman churanaycama” nispaka.

¹⁴ Tucuy angelcunaka espíritu cancu, Diosta sirvejcuna; salvación herenciata jap'ekajcunata yanapanancupaj cachaska cancu.