SALMOS 1 - Diospa Simin Qelqa

Ñawpaqkaq t'aqa ( 1–41 ) SALMO 1 Cheqaq kusisamiyoq kanamanta

¹ Kusisamiyoqmi millay runakunaq yuyaychayninta mana hap'ikuqqa, huchasapakunaq purinanpipas mana puriysikuqqa, Diosta asipayaqkunawanpas mana tiyaysikuqqa.

² Payqa Señor Diospa kamachikuy siminwanmi kusikun, chaytan tutapas p'unchaypas yuyaymanan.

³ Payqa mayu patapi sach'a hinan, tiempollanpi ruruq sach'a hinan, raphinpas q'omerllapunin kashan. ¡Imapas ruwasqanqa allillanpunin!

⁴ Millay runakunaqa manan chay hinachu kanku, paykunaqa wayraq apasqan ñut'u paja hinan kanku.

⁵ Chaymi paykunaqa juicio p'unchaypi huchachasqapuni kanqaku, huchasapakunaqa manan chanin runakunawan rikhurinqakuchu,

⁶ Señor Diosqa chanin runakunaq puriynintan waqaychan, millay runakunaq puriyninmi ichaqa chinkapunqa.