RUT 1 - Diospa Simin Qelqa

Elimelecpa Moab suyuman ripusqan

¹ Uma qollanakuna Israel suyupi kamachikushaqtinmi yarqay karqan, chaymi Judapi kaq Belén llaqtamanta huk runa warmintin, iskaynin churinkunapiwan Moab suyuman ripurqanku, chaypi tiyarimunankupaq.

² Chay runaq sutinmi Elimelec karqan, warminpataq Noemí, churinkunataq Mahlón, Quelión, paykunan karqanku Judapi kaq Belén Efrata ayllumanta. Moab suyuman chayaspankutaq chaypi qhepakurqanku.

³ Ichaqa Elimelecmi wañukapurqan, hinan Noemiqa iskaynin churinkunallantin qhepakapurqan.

⁴ Paykunan Moab suyu warmikunawan casarakurqanku, hukninpa sutinmi karqan Orfa, hukninpa sutintaq Rut. Chunka watata hina chaypi tiyashaqtinkutaq,

⁵ Mahlonpas Quelionpas wañukapullarqankutaq, hinan Noemiqa qheparqan mana qosayoq mana churiyoq.

Noemí Rutpiwan kutimpusqan

⁶ Moab suyupitaq Noemiqa uyarirqan Señor Diosqa llaqtanta yuyarimuspa mikhuy qomusqanta, chaymi Moab suyumanta iskaynin qhachuninkunapiwan puririrqanku.

⁷ Tiyasqanku cheqasmanta qhachuninkunantin lloqsispa, Judá suyuman kutipushaspataq,

⁸ Noemiqa qhachuninkunata nirqan: –Ripuychis, kutikapuychis sapankaykichis mamaykichispa wasinman, Señor Diosmantan mañakuni imaynan wañukapuqkunapaqpas ñoqapaqpas ruwasqaykichisman hina khuyapayanasuykichispaq.

⁹ Señor Diosña wakmanta casarachisunkichis, qhepa qosaykichiswan allillan kanaykichispaq, nispa. Hinaspan Noemiqa paykunata much'aykurqan. Paykunataq khuyayta waqaykuspa,

¹⁰ nirqanku: –¡Manan kutiykumanchu! Ñoqaykuqa qanwanmi llaqtaykita ripusaqkupuni, nispa.

¹¹ Noemitaq kutichirqan: –Kutikapuychis, ususiykuna, ¿imamantaq ñoqawan riwaqchis? Manañan wawakunata wachakuymanñachu qosaykichis kananpaq.

¹² Kutikapuychis, ususiykuna, ripuychis. Ñoqaqa payañan kani casarakunaypaq. Wachakusaqraqmi nispachus niyman, kunan tutataq qosawan puñuyman, qhari wawakunataña wachakuyman chaypas,

¹³ ¿qankunaqa wiñanankukama suyakuwaqchischu? ¿Chayraykuchu manaqa casarakapuwaqchis? Manapunin, ususiykuna, Señor Diosmi muchuchishawan, chayraykun llakikuni ñoqawan kuska muchushasqaykichismanta, nispa.

¹⁴ Hinan paykunaqa wakmanta khuyayta waqaykurqanku, chaymantataq Orfaqa suegranta much'aykuspa ripurqan, Rutmi ichaqa suegranwan qhepakurqan.

¹⁵ Chaymi Noemiqa nirqan: –Qhawariy, qhachunmasiykin kutikapun llaqtanman diosninmanwan, qanpas kutikapullaytaq, nispa.

¹⁶ Rut-taq kutichirqan: –Amaña “saqepuway, t'aqakuway” niwayñachu, maytachus qan rinki, chaytan ñoqaqa risaq, maypichus tiyanki, chaypin ñoqaqa tiyasaq. Llaqtaykin llaqtay kanqa, Diosniykin Diosniy kanqa.

¹⁷ Maypichus qan wañupunki, chaypin ñoqapas wañupusaq, chaypitaqmi p'ampasqapas kasaq. Señor Dios anchata muchuchiwachun, manachus wañuyllaña t'aqawasun chayqa, nispa.

¹⁸ Chaymi Noemiqa paywan ripunanpaq Rutpa yuyaykukusqanta reparaspa, manaña rimapayarqanñachu.

¹⁹ Hinan paykunaqa rispanku Belenman chayarqanku. Paykuna haykuqtinkutaq llaqtallantin kuyurirqan, warmikunataq nirqanku: –¿Manachu kayqa Noemí? nispa.

²⁰ Noemitaq paykunaman kutichirqan: –Ama Noemí niwaychischu, aswanpas Mara niwaychis, anchatapunin Tukuy-atiyniyoq Diosqa muchuchishawan.

²¹ Kaymantaqa imaymanantinmi rirqani, Señor Diosmi ichaqa mana imayoqta kutichimpuwan. ¿Imanaqtintaq Noemí niwankichis, Tukuy-atiyniyoq Dios huchachawaspa llakichishawaqtinqa? nispa.

²² Chay hinatan Noemiqa Moab suyumanta kutimpurqan qhachunin Moab suyu warmi Rutwan kuska. Belenmanmi chayarqanku cebada ichhuy qallariyta.