CANTARES 1 - Diospa Simin Qelqa

¹ Salomonpa aswan munay takin.

Ñawpaqkaq taki Warmin nin:

² Much'aykuwanaykitan munaykushani, munaykukuyniykiqa vinomantapas aswan misk'iraqmi,

³ hawinaykikunaq q'apayninmantapas aswan sumaqraqmi. Sutiykita uyariyqa q'apaq hawinata muskhiykuy hinaraqmi. ¡Chaychá sipaskunaqa munakusunkiku!

⁴ Pusakuway, ¡phawasunchis! Reyniymi kanki, wasiykiman pusakuway. Qanwanmi q'ochukusaqkupas kusikusaqkupas, munakuyniykitaqa vinomantapas aswantaraqmi yuyarisaqku. ¡Chaychá munakusunkiku!

Takiqkunan ninku: Warmin nin:

⁵ Jerusalén warmikuna, yanachan kakuni, ichaqa munaychallañan, ch'inneqpi tiyaq Cedar runakunaq karpan hina yanacha, Salomonpa karpanpi cortinakuna hina munayllañan.

⁶ Ama qhawaykuwaychischu yanacha kakuqtiy, intiq q'aspasqan kakuqtiy. Turaykunan ñoqapaq phiñakurqanku, hinaspan uvas chakrakuna qhawaqta churaykuwarqanku, ñoqaq chakraytataq mana yuyarikurqanichu.

⁷ Willaway, sonqo rurulláy, ¿maypin michishanki? ¿Maypin chawpi p'unchayta ovejakunata puñurachishanki? Paqtan uywakunaq qayllanpi purishaqtiy michiq-masiykikuna yanqa purikuq warmita hina qhawawankuman.

Takiqkunan nin:

⁸ Qanqa llapa warmikunamantapas aswan munaychallañan kanki, maypichus michishasqanta mana yachankichu chayqa, ovejakunaq yupinta qatipay, hinaspa michiqkunaq ch'ukllan qayllapi cabrachaykikunata michikamuy.

Qharin nin:

⁹ Munakusqalláy, qanqa ñoqaqpunin kanki, rey Faraonpa carretan aysaq china caballon hina munaychallañan kanki.

¹⁰ ¡Ima munaymi uyaykiqa k'achanchasqa simp'akuna ukhupi rikhurin! ¡Ima munaymi kunkaykiqa walqanakunawan sumaqchasqa rikhurin!

¹¹ Lliphipinanpaq qolqewan chawpinasqa, qori simp'akunatan ruwachipusqaykiku.

Warmin nin:

¹² Tiyananpi rey k'iraykusqa kashaqtinmi q'apaq nardo hawinay q'aparirqan.

¹³ Munakusqayqa q'apaq mirra khipucha hinan ñoqapaqqa, qhasqollaypin payqa samakushanpas.

¹⁴ En-gadi uvas chakrakunamanta apamusqa alheña t'ika mayt'u hinan munakusqayqa kapuwan.

Qharin nin:

¹⁵ Munakusqalláy, ¡ima munaymi kanki! ¡Ima sumaq rikch'ayniyoqmi kanki! ¡Ñawiykipas iskay urpi hinan!

Warmin nin:

¹⁶ Munakusqalláy, ¡ima munaymi kanki! ¡Sumaq sonqo suwan kanki! Puñunanchisqa munay q'omer q'achu hinan,

Qharin nin:

¹⁷ cedromantan wasinchispa kurkunkunaqa, cipresmantan wasi pata k'aspikunapas.