TITUMAN 1 - Quechua Ancash New Testament

¹ Noqa Pablum, Dyospa sirweqnin i Jesukristupa apostulnin, Dyospa akrashqankunapa kreyikiyninkunamannow i rasonpa kaqta reqiwan ankupákiymannow,

² wiñey kawey shuyakiychow, tseytam mana ulikoq Dyos, ánikorqan manaraq key tyempu qallaptin,

³ i tyempunchowmi rikátsikorqan palabranta predikasyompa Salbadornintsik Dyospa kamatsikiynimpa qomashqanwan,

⁴ Tituta, rasonpa kaq tsuri kreyikiychow: Grasya, ankupákiy i yamey key, Dyos Yayapita i Señor Jesukristu Salbadornintsikpita.

Imanow awkinkuna kayánanpaq

⁵ Key kawsareykurmi jaqimorqaq Krétachow, mana alli kaqta altsaneykipaq, i churaneykipaq awkinkunata kada markachow, noqa mandashqaqnow;

⁶ mana imapitapis piñapánayoq kaqta, juk warmillapa qowan, i kaputsun tsurinkunapis kreyikoqkuna i ama kayátsuntsu akusashqa lluta kawakiypita i mana wiyakiypita.

⁷ Wananmi obispuqa mana imapitapis piñapashqa kanan, Dyospa mayordomunnow; mana jatuntukoq ni allápa piñakoq, bínu mana upoq, mana liryakoq, ni llutampa ganeyta munaq,

⁸ sinowqa posadatsikoq, alli kaqta kuyaq, alli fisyuyoq, allita ruraq, santu, kikimpa dweñun,

⁹ fyel palabrata tsaraq yachatsishqa kanqannow, tseynow piñapeyta pwedinampaq alli yachatsikiywan kontradiseqkunata konbensitsir.

Mana alli yachatsikoqkunapa kontran

¹⁰ Tseynowqa atskaqmi kayan mana wiyakoqkuna, mana sirweqta parlaqkuna i engañakoqkuna, masran sirkunsidashqakunapita,

¹¹ peykunapa shiminkunata wananmi tsapey; wayikunachow turbatsiyan, lluta ganansyapa yachatsirnin mana konbyeneqta.

¹² Peykunapita juknin, kikinkunapa profetankunam, nerqan: “Kretensikunaqa, imeypis ulikuyanmi, mana alli bestyakuna, i allápa mikoq qelakuna.”

¹³ Key willakiyqa rasonpam; tseyreykur, piñapey sinchi, kreyikiychow sanu kayánanpaq,

¹⁴ Judyukunapa kwentunkunata mana atendishpa, ni rasonpa kaqpita rakikátseq nunakunapa kamatsikiyninkunata.

¹⁵ Llapan imeykakunapis limpyum limpyu kaqkunapaq, korrumpidukunapaqqa i mana kreyikoqkunapaqqa manam imapis limpyutsu; yarpeynin i konsensiyampis korrompishqam.

¹⁶ Dyos reqeq kayan, peru rureyninkunawanqa negayan, i melaneypaq rebeldikuna keykar, kondenashqa llapan alli rureykunapita.