Santiago 1 - Quechua Ancash New Testament

¹ Noqa Santyagum, Dyospa i Señor Jesukristupa sirweqnin, chunka ishkey kastakuna ramakashqakunata: Saludayaq.

Kreyikiy i yachey

² Wawqikuna, kushikinikikuna katsun tukiy prwebakunachow keykarpis,

³ musyeykar qamkunapa kreyikiynikikunapa prwebanqa yuritsin tsarakiytam.

⁴ Tsarakiynikikunapa, rureynin tinkukátsun, alli i justu kayáneykipaq, imeykikunapis mana pishipuyáshurniki.

⁵ Qamkunachow si meyqampapis pishin yacheynin, Dyosta mañatsun, peyqa qon atskapam llapantapis mana ima nishpa, i qoshqam kanqa.

⁶ Peru mañatsun kreyikiywan, mana imatapis anawashpa; anawaqqa lamarpa laqcheqseyninnowmi, byentupa apashqa i wakman keyman jitalishqa.

⁷ Tsey ruraqqa ama yarpátsuntsu Señorpita imallatapis chaskita.

⁸ Ishkey yarpéyoq nunaqa manam tsarakuntsu llapan náninkunachow.

Waktsayey i rikuyey

⁹ Qollmi kaq wawqiqa, sumákutsun pallarikeyninchow;

¹⁰ peru kapoqyoq, úshukiyninchow; peyqa pasarenqa qorapa weytannowmi.

¹¹ Inti yarqaramuptin allápa achacheywan, qora tsakirin, weytan ishkirin, i shumaq rikeynin ushakárin, tseynowmi riku ñukturenqa llapan negosyunkunachow.

Tentasyonkuna i qareykuna

¹² Kushikiyoqmi tentasyonta awantaq nuna; prwebachow tsarakorqa, chaskenqa kawey koronatam, Dyos ánishqa kuyaqninkunata.

¹³ Pipis tentashqa karqa, ama nitsuntsu “Dyospitam tentashqa ká”; Dyosqa manam tentashqatsu kanman mana allipa, ni peyqa manam pitapis tentantsu.

¹⁴ Sinowqa jukpayan tentashqa kayan, kikimpa munapákiyninwanmi tsaritsikun i tentatsikun.

¹⁵ Tseynam mana alli munapákiy, qeshyaq tukurir, qeshpikurin jutsata; i jutsanam, poquriykur qeshpikurin waníta.

¹⁶ Kuyashqa wawqikuna, ama pantakuyétsu.

¹⁷ Llapan alli qokiy, llapan alli qarey urámun rarapitam, aktsikunapa Teytampita, peychowqa manam kantsu trokakey ni wánipa kuyíkacheynin.

¹⁸ Peyqa, muneyninpitam, yuritsimarqantseq tseqey palabranpa, punta kaq wamrankuna kanapaq.

Dyospa palabran wiyaq i ruraq

¹⁹ Keyreykurmi, kuyashqa wawqikuna, llapan nuna listu katsun wiyanampaq, unátsunraq parlanampaq, unátsunraq piñakunampaq;

²⁰ nunapa piñakiyninqa manam ruran Dyospa justisyantatsu.

²¹ Tseyreykur, llapan rakcha kaqkunata i atska malisyakunatapis jaqirikur, chaskiyey manshu keywan murushqa palabrata, keymi pwedin salbeyta almeykikunata.

²² Palabra nenqanta ruraqkuna kayey, ama wiyakoqkunallaqa, kikikikunallachow pantatsikurnin.

²³ Si meyqampis palabranta wiyar i nenqanta mana ruraqqa, keyqa espejuchow qaqllanta rikákoq nunanowmi.

²⁴ Peymi rikákurir eywakun i qonqarin imanow kanqanta.

²⁵ Pim rikanqa káyishpa alli leychow, librikeychow, i tsarakun tseychow, wiyanqanta mana qonqashpa, sinowqa rureykunata ruraq, keymi kushikiyoq kanqa ruranqanchow.

²⁶ Si meyqampis religyosu tukun qamkunachow, i qallunta mana tsarantsu, sinowqa pantatsin shonqunta, peypa religyonninqa sirwintsu.

²⁷ Dyos Teytapa nowpanchow tsuya i rakchannaq religyonqa keymi: Wakchakunata watukey i biwdakunata jipeyninkunachow, i mundupa rakchankunapita rakikey.