Mateo 1 - Quechua Ancash New Testament

Jesukristupa uney kastankuna

¹ Jesukristupa uney kastankunapa libru, Dabidpa tsurin, Abrahampa tsurin.

² Abraham tsuriykorqan Isakta, Isaknam Jakobta, i Jakobnam Judáta i wawqinkunata.

³ Judá tsuriykorqan Tamarchow Fáresta i Sarata, Fáresnam Esromta, i Esromnam Aramta.

⁴ Arannam tsuriykorqan Aminadabta, Aminadabnam Naasonta, i Naasonnam Salmonta.

⁵ Salmonnam tsuriykorqan Rahabchow Boosta, Boosnam tsuriykorqan Rutchow Obedta i Obednam Isaíta.

⁶ Isaínam tsuriykorqan rey Dabidta, i rey Dabidnam tsuriykorqan Salomonta Uriaspa warmin kashqa kaqchow.

⁷ Salomonnam tsuriykorqan Roboamta, Roboamnam Abiasta, i Abiasnam Asata.

⁸ Asanam tsuriykorqan Josafatta, Josafatnam Joramta, i Joramnam Usiasta.

⁹ Usyasna tsuriykorqan Jotamta, Jotamna Akasta, Akasna Esekiasta.

¹⁰ Esekiasna tsuriykorqan Manasesta, Manasesnam Amonta, i Amonnam Josiasta.

¹¹ Josiasnam tsuriykorqan Jekoniasta i wawqinkunata, Babiloniyaman presu apey tyempuchow.

¹² Babiloniyaman presu apeypitanam, Jekonias tsuriykorqan Salatielta, i Salatielnam Sorobabelta.

¹³ Sorobabelnam tsuriykorqan Abiudta, Abiudnam Eliakimta, i Eliakimnam Asorta.

¹⁴ Asorna tsuriykorqan Sadokta, Sadoknam Akimta, i Akimnam Eliudta.

¹⁵ Eliudnam tsuriykorqan Eliasarta, Eliasarnam Matanta, Matannam Jakobta;

¹⁶ i Jakobnam tsuriykorqan Joséta, Maryapa qowan, peypitam Jesús yurirqan, Kristu jutiyoq.

¹⁷ Keynowpam key llapan kastakuna Abrahampita Dabidyaq kayan chunka chusku; Dabidpita Babiloniyaman qarqushqa kayashqanyaq, chunka chusku; i Babilonyaman qarqushqa kayanqanpita Kristu jutiyoq yurenqankama, chunka chusku.

Jesukristupa yurikiynin

¹⁸ Jesukristupa yurikiynin keynowmi karqan: Maman Marya Joséwan kasakuyánanpaq áninakushqa keykar, manaraq juntakáyaptin, Espiritu Santupita qeshyaqna kanaq.

¹⁹ Qowan José, justu karnin, i penqakatsita mana munar, jaqirita munarqan pakeyllapa.

²⁰ I keypaq pey yarpakacheykaptin, kaq key Señorpa juk angelnin sweñíninchow yuriporqan i peyta nerqan: “José, Dabidpa tsurin, ama mantseytsu chaskita warmiki Maryata, peychow tsuriykushqa kaqqa, Espiritu Santupitam.

²¹ I juk wamratam qeshpikonqa, i jutin churanki JESUS, pweblunta jutsankunapita pey salbanan kaptin.”

²² Key llapanmi susederqan profetapa Señor nenqan kumplikánanpaq, nenqannow:

²³ Kaq keymi, juk donsilla qeshyaqyanqa i qeshpikonqa juk wamrata, i jutin churanki Emanuel, keymi ninan: Dyos noqantsikwan.

²⁴ I José riyarkurnam, rurarqan Señorpa angelnin ninqannow, i warminta chaskerqan.

²⁵ Peru manam juntakáyarqanraqtsu wawanta qeshpikunqanyaq i jutin churarqan Jesús.