Lucas 1 - Quechua Ancash New Testament

Qallanan: Teófilupaq dedikashqa

¹ Atskaqmi alli qellqeyta munayashqa noqantsikkunachow tseqeypa rureykuna susedishqanta,

² yachatsimashqantsiknow qallananpita rikáyanqanta, i kayarqan Dyospa palabran yachatsikoqkuna,

³ noqatapis allim nirápumashqa, qallananpita llapan kosaskunata tapupakuríkur, qellqarqoq kuchunpita churar, allápa reqishqa Teófilu,

⁴ rureykunapa rason keyninta alleq reqineykipaq tseykunachowmi yachatsishqa karqonki.

Juanpa yurikiyninpaq willakiy

⁵ Eródispa junaqninkunachowmi karqan, Judeyapa reynin, juk saserdoti Sakariyas jutiyoq, Abiaspa kastan kaq; warminnam karqan Aaronpa tsurinkunapita, i Elisabet jutiyoq.

⁶ Ishkanmi allita ruraq kayarqan Dyospa nowpanchow, puriyarqan mana piñapéyoq Señorpa llapan mandakiyninkunachow i ordenninkunachow.

⁷ Peru wamran kayápurqantsu, Elisabet mana wachakoq kaptin, i tsatsanam ishkanpis kayarqan.

⁸ Sakariyas saserdóti keyninta ordenninmannow Dyospa nowpanchow rureykaptin susedirqan,

⁹ saserdótipa kostumbrinmannow, tokarqan swertipa insyensuta rupatsi, Señorpa santuwaryunman yeykurnin.

¹⁰ I llapan nunakunam keykáyarqan jaqchow Dyosta mañakur insyensu óra.

¹¹ I yuriporqan Señorpa juk angelnin insyensupa altarnin derecha kaqchow sheykar.

¹² I Sakariyas rikeykurna turbakákurerqan, i mantsakeykorqan.

¹³ Angelnam nerqan: —¡Sakariyas, ama mantsakeytsu! Dyosman mañakonqeykim wiyashqa karqon, warmiki Elisabet qeshpikonqa juk wamrata, i jutin churanki Juan.

¹⁴ I kapushunki kushikiynikim, i atskaqkunam kushikuyanqa yurikushqanpita;

¹⁵ Dyospa nowpanchow jatunmi kanqa. Ama uponqatsu bínuta ni sidrata, i Espiritu Santupa juntashqam kanqa, mamanpa pachanpita patsa.

¹⁶ I ruranqam Israyelpa Señor Dyosninman atska tsurinkuna konbertíkuyananpaq.

¹⁷ Eywanqam peypa nowpanta Eliaspa espiritunwan i poderninwan, teytakunapa shonqunkunata tsurikunaman kutitsimunanpaq, i rebeldikunata justukunapa alli fisyunman, alistananpaq juk pwebluta Señorpaq alli alistashqata.

¹⁸ Sakariyas nerqan angelta: —¿Imachowraq keyta reqishaq? Noqaqa awkinnam ká, i warmípis tsatsanam.

¹⁹ Angel yaskirnam, nerqan: —Noqam ká Gabryel, Dyospa nowpanchowmi keyká, i kachamushqam karqó parlapánaqpaq, i alli willakiykunata willanaqpaq.

²⁰ I kananqa múdum tikrarinki i parleyta pwedinkitsu, key rurakanqan junaqyaq, nenqaqta mana kreyishqa kaptiki, tseykunam tinkonqa tyempunchow.

²¹ I pweblunam shuyareykarqan Sakariyasta, yarpakachar santwaryuchow demoraptin.

²² Yarqaramurna, pwederqantsu parlapeyninkunata; i káyiriyarqan santuwaryuchow bisyon rikanqanta. Pey parlaparqan séñasllapa, i múdu keydarerqan.

²³ Ministeryunpa junaqninkuna tinkuriptinna, ewkorqan wayinta.

²⁴ Tsey junaqpitanam warmin Elisabet qeshyaqyárerqan, i wayinpita yarqukorqanatsu pitsqa killanpin, nishpa:

²⁵ —Keynowmi Señor rurashqa noqawan munanqan junaqkuna nunakunachow penqapashqa keyniyta jorqur.

Jesuspa yurikiyninpaq willakiy

²⁶ Joqta killatana angel Gabryel kachasqa karqan Dyospa, Galileyapa juk markanman, Nasaret nishqaman,

²⁷ watukananpaq Marya jutiyoq donsillata. Pey kasakunanpaq parlashqana keykaptin José jutiyoq ollquwan, Dabidpa wayinpita.

²⁸ I angel, pey keykanqanman yeykurirna nerqan: —¡Salbe, allápa estimashqa! Señormi qanwan; bendíta qam llapan warmikunachow.

²⁹ Pey, rikeykurnam, mantsakeykurqan palabrankunapa, i yarpakacharqan ima saludakiy kashqanta.

³⁰ Tseynam angel nerqan: —¡Marya, ama mantsakeytsu! Tarerqonkim grasyata Dyospa nowpanchow.

³¹ I kananmi, qeshyaqyanki, i qeshpikunki juk wamrata, i jutin churanki JESUS.

³² Keymi kanqa jatun, i kanqa jutitsashqa Altísimupa Tsurin; Señor Dyosmi qonqa teytan Dabidpa trónunta;

³³ i reynanqa Jakobpa wayinchow wiñeypa, i reynunpa usheynin kanqatsu.

³⁴ Tseynam Marya nerqan angelta: —¿Imanowraq kanqa key? Manaran ollquta reqíraqtsu.

³⁵ Yaskirnam angel nerqan: —Espiritu Santum shamonqa qanman, i Altísimupa podernin wáninwan tsaparishunkiy tseyreykurmi Santu Yureqpis, jutitsishqa kanqa Dyospa Tsurin.

³⁶ Keymi key kasteyki Elisabet, peypis qeshyaqnam tsatsayeyninchow; kananmi joqta killanna peypaq, mana wachakoq niyanqan;

³⁷ manam imapis kantsu sasa Dyospaqqa.

³⁸ Tseynam Marya nerqan: —Keymi key Señorpa sirweqnin; rurakátsun noqawan palabreykimannow. I angelnam ewkorqan nowpanpita.

Marya watukan Elisabetta

³⁹ Tsey junaqkunachow, Marya sharkur, ewkorqan weyralla jirkata, Judápa juk markanman;

⁴⁰ i yeykurerqan Sakariyaspa wayinman, i saludarerqan Elisabetta.

⁴¹ I susederqan Maryapa saludakiyninta Elisabet wiyariptin, wamra salteykorqan pachanchow, i Elisabetna karqan Espiritu Santuwan juntashqa,

⁴² i qaparíkorqan sinchipa, i nerqan: —¡Bendita qam warmikunachow, i bendítu pacheykichow wamra!

⁴³ ¿Imanirtaq keyta qoman noqata, Señornípa maman noqaman shamunanpaq?

⁴⁴ Raslla saludakiyniki rinríkunaman cháramuptin, llullu wamra kushikiyta salteykorqan pacháchow.

⁴⁵ Kushíkiyoqmi kreyikoqqa, tinkurenqam Señor nishqan.

Maryapa kantakiynin

⁴⁶ Tseynam Marya nerqan: —Almámi alaban Señorta;

⁴⁷ i espiritúmi kushikun Dyos Salbadorníchow.

⁴⁸ Rikarqonmi sirweqninpa qollmi keyninta; keymi key, kananpitam niyámanqa kushikiyoqnam llapan kastakuna.

⁴⁹ Poderósum noqachow rurashqa jatusaq kosaskunata; jutinqa Santum,

⁵⁰ i ankupákiynenqa kastakunapita kastankunayaq llapan mantsakoqninkunapaq.

⁵¹ Jatusaq rureykunata rikranwan rurarqan; witsikacharkorqan shonqunkunapa yarpeyninkunachow wasqitupákoqkunata.

⁵² Pwedeqkunata jorqurqan tronukunapita, i manshukunata pallarkorqan.

⁵³ Mallaqaqkunata allikunawan llishmarqan, kapoqyoqkunata jineyllata qarqorqan.

⁵⁴ Yanaparqan sirweqnin Israyelta, ankupákiyta yarparnin.

⁵⁵ Keykunapitam parlaparqan teytantsikkunata, Abrahampaq i kastankunapaq wiñeypa.

⁵⁶ I keydakorqan Marya peywan kima killanow; tseypitana kutikorqan wayinta.

Juan Bawtistapa yurikiynin

⁵⁷ Elisabetpa qeshpikiy tyempun tinkuriptin, qeshpikorqan juk wamrata.

⁵⁸ Besínunkuna i kastankuna Dyos peywan ankupákiyninta jatunyátsishqanta, wiyarirnam kushikuyarqan peywan.

⁵⁹ Puwaq junaqtam wamra sirkunsidaq shayámorqan; i jutitsiyarqan papáninpa jutinwan, Sakariyas;

⁶⁰ mamáninnam yaskir, nerqan: —¡Manam! Juanmi jutinqa kanqa.

⁶¹ Niyarqannam: —¿Imanir? Manam pipis kantsu tsey jutiyoq kasteykichow.

⁶² Tseynam teytanta tapuyarqan séñaspa, imanow jutitsinanta.

⁶³ I tablillata mañarkur, qellqarqan, nishpa: “Juanmi jutin.” I llapankunam almirakuyarqan.

⁶⁴ Tseyllanam shimin yapey parlarqan i qallunpis paskakárerqan, i parlarqan Dyosta bendisirnin.

⁶⁵ I llapan besínunkunanam mantsakákuyarqan; i Judea jirkakunachow musyakárerqan key llapan kosaskuna.

⁶⁶ I llapan wiyaqkuna wardayarqan shonqunkunachow, nishpa: —¿Piraq, kanqa key wamra? I Señorpa podernin peywan karqan.

Sakariyaspa kantakiynin

⁶⁷ I teytan Sakariyas Espiritu Santuwan juntashqa karqan, i profetisarqan, nishpa:

⁶⁸ —Bendítu katsun Señor, Israyelpa Dyosnin, watukarqon i reskatarqon pweblunta.

⁶⁹ I sháritsimorqon juk pwedeq Salbadorta sirweqnin Dabidpa kastanchow,

⁷⁰ qallananpita santu profetankunapa shiminpa parlanqannow:

⁷¹ Chikimaqnintsikpita salbamáshun, i llapan melanámaqnintsikkunapa makinpita,

⁷² teytantsikkunawan ankupákiyta rurananpaq, I santu paktunpita yarparnin.

⁷³ Teytantsik Abraham juramentu rurashqanta, qománantsik kanqanta,

⁷⁴ chikimaqnintsikkunapita librashqa karnin, sirwishwan mana mantsashpa,

⁷⁵ peypa nowpanchow santidáchow i justisyachow, llapan junaqnintsikkunachow.

⁷⁶ I qam, wamra, Altísimupa profetan nishqam kanki; Señorpa nowpantam eywanki, náninkunata alistaneykipaq;

⁷⁷ markanta salbasyon reqikiyta qoneykipaq, jutsankunapita perdonashqa kayánanpaq;

⁷⁸ Dyosnintsikpa allápa kuyakiy ankupákiyninpa, rarapita watukamarqontsik qoya qoya,

⁷⁹ ampeqchow i wanípa wáninchow yachaqkunata aktsin qonanpaq; chakintsikkunata pushananpaq yamey key nánipa.

⁸⁰ I wamra winarqan, i kallpakoq espirituchow; i karqan tsunyaqkunachow Israyelman rikátsikonqan junaqyaq.