Judas 1 - Quechua Ancash New Testament

¹ Noqa Judas, Jesukristupa sirweqnin, i Jakobupa wawqin, qayashqakunaman, santifikashqakuna Teyta Dyoschow, i Jesukristuchow wardaraqkuna:

² Ankupákiy i yamey key i kuyakiy atskayashqa kayápushiy.

Lluta yachatsikoqkunapa kondenasyonnin

³ Kuyashqakuna, allápa muneyní kapamaptin qellqayánaqpaq llapantsikpa salbasyonnintsikkunapita, piñapáyeynikita munar pelyayáneykipaq santukunapa kreyikiynin juk kuti qoshqana kashqanreykur.

⁴ Wakin nunakuna pakeyllapa yeykayamushqa, uneypitana destinashqa kayarqan kondenasyonpaq, mana kreyikoq nunakuna, lluta libri keyman tikratsiyan Dyosnintsikpa qareyninta, i negayan japallan pwedeq Dyosta i Señornintsik Jesukristuta.

⁵ Munámi yarpátsiyeynikita, musyayarqeykinam, Señorqa, pwebluta salbarikur Egiptupita jorqurirnin, tseypita ushakáratserqan mana kreyeqkunata.

⁶ I onorninta mana wardaq angelkunata, sinowqa jaqiriyarqan kikinkunapa wayinkunata, wardashqa ampeqchow, mana imeypis ushakaq prisyonchow, jatun fisyu junaqpaq;

⁷ Sodoma i Gomorranow, i besínun markakunatanow, taqeykunanowlla, lluta wátanakurnin i kamashqakunapa kontran bisyukunachow kawayarqan, churashqa kayarqon ejemplupaq, jiparnin mana ushakaq ninapa kastiguta.

⁸ Jina tseynowllam, key sweñukoqkunapis eytsata rakchatayan, pwedeq keyta rechasayan i rarachow pwedeqkunapa kontran rimayan.

⁹ Peru arkangel Miguel dyabluwan pelyar, Moysespa kwerpunreykur liryarnin, fisyupaq maldisirnin manam almiterqantsu, peypa kontran sinowqa nerqan: “Señor piñapáshi.”

¹⁰ Peru keykunaqa maldisiyan atska kosaskuna mana reqiyashqanta; kamashqanchowpis reqikar, mas antsápukuyan yarpeyninnaq animalkunanow.

¹¹ ¡Allaw taqeykuna! Kayinpa náninta qatishqa karnin, Balaamnow qelleyrekur pantakiyman ishkiyarqan, i wanuyarqan Korénow rebeldikeyninkunachow.

¹² Keykunam kayan rakchakuna qarakiynikikunachow, mana penqakushpa mikiykar qamkunawan mitsinakuyan kikinkunachow; yakunnaq pukuteykuna, byentukunapa wakpa keypa apashqa; mana tyempunchow wayíninnaq montikunanow, ishkey kuti wanushqa i jawampin sutarishqa;

¹³ lamarpa chukaru laqcheqseynin, kikinkunapa penqakiyninkunata poshoqarnin; purikoq qoyllurkuna, peykunapaqmi shuyareykan mana ushakaq paqas ampikuna.

¹⁴ Keykunapitam Enokpis profetisarqan, Adanpita qanchis, nishpa: “Keymi key, Señor shamorqan atska chunka waranqeypa santunkunawan,

¹⁵ fisyuta ruranampaq llapankunapa kontran, i llapan mana kreyeqkunata kondenanampaq llapan mana alli rureyninkunapita mana kreyikiyninkunawan rurayashqanta, mana kreyikoq jutsasapakuna mana allikunata parlayarqan peypa kontran.”

¹⁶ Keykunam kayan penqapákoqkuna, waqallishukuna, puriyan kikinkunapa muneyninkunachow, shiminpis parlan sumákiypa, jukkunata adulayan probéchunkuna jorquyánampaq.

Piñapánakiykuna i willapánakiykuna

¹⁷ Peru qamkunaqa, kuyashqakuna, yarpáyey Señornintsik Jesukristupa apostulninkuna uney niyanshqanta;

¹⁸ peykunam niyáshorqeyki: “Shamoq tyempuchow kanqam burlakoqkuna, keykunam puriyanqa lluta muneyninkunachow.”

¹⁹ Keykunam rurayan rakikeykunata; eytsapa muneyninta ruraqkuna, Espirituta katsiyantsu.

²⁰ Peru qamkunaqa, kuyashqakuna, winatsinakuyey santisimu kreyikiynikikunachow, Espiritu Santuchow mañakurnin,

²¹ kuydakuyey Dyospa kuyakiyninchow, Señor Jesukristupa wiñey kaweypaq ankupákiyninta shuyarar.

²² Meyqankunatapis anawaqkunata, káyitsiyey.

²³ Jukkunatana salbayé, ninapita qochirnin; i ankupákiynikikuna kayápushiy wakinkunapaq mantsakiywan, eytsampa muyashqa bistíduntapis chikirnin.

Usheychow alabansa

²⁴ I Dyos llapan pwedeq wardeykuyashuneykipaq mana ishkeqta, i cháratsiyáshuneykipaq manchannaqta, gloryampa nowpanman allápa kushikiywan,

²⁵ japallan i yachaq Dyosta, noqantsikpa Salbadornintsik gloryan i majestánin katsun, pwedeq keynin i llapan markakuna mandakiynin, kanan i wiñeykunapa. Amen.