Juan 1 - Quechua Ancash New Testament

Palabra eytsa rurakashqa

¹ Qallananchow Palabra karqan, i Palabranam Dyoswan karqan, i Palabraqa Dyosmi karqan.

² Keymi qallananchow Dyoswan karqan.

³ Llapan imeykakunapis peypam rurashqa karqan, i mana peywanqa rurakashqapita manam imapis rurakashqatsu.

⁴ Peychowmi kawey karqan, i kaweynam nunakunapa aktsin karqan.

⁵ Aktsiqa ampikunachowmi atsikyan, i ampikuna manam pwediyashqatsu peywan.

⁶ Juk nunam karqan Dyos kachamushqan, jutinnam karqan Juan.

⁷ Peymi shamorqan willakiypa, aktsipaq willakunampaq, peypa llapan kreyikuyanampaq.

⁸ Manam peytsu aktsi karqan, sinowqa aktsipaq willakoqmi.

⁹ Taqey rasonpa aktsi, llapan nunata aktseq, key munduman shamiykarqan.

¹⁰ Munduchowmi karqan, i munduqa peypam rurashqa karqan; peru mundunam reqerqantsu.

¹¹ Kikinpamanmi shamurqan i kikimpa kaqkuna chaskiyarqantsu.

¹² Llapan chaskeqninkunataqa, i peypa jutinman kreyeqkunataqa, qoshqam podernin Dyospa tsurinkuna kayánanpaq;

¹³ peykunaqa manam yuriyashqa yawarpitatsu, ni eytsapa muneynimpatsu, ni ollqu muneynimpatsu, sinowqa Dyospitam.

¹⁴ I taqey Palabra eytsa rurakarqan, i yacharqan noqantsikchow (i gloryanta rikarqantsik, Teytapa japallan tsurimpa gloryantanow), juntashqa grasyapa i rasonpa kaqwan.

¹⁵ Juan willakorqan peypaq, i qayakorqan nishpa: “Keymi key noqa peypaq nenqá: Noqapa qepá shamoqqa, noqapa puntámi, noqapita punta kaqmi.”

¹⁶ Llapan keyninpitam tsarintsik llapantsik, grasyawan grasyata.

¹⁷ Leyqa Moysespam qoshqa karqan, peru grasyaqa i rasonpa kaqqa shayámorqan Jesukristupam.

¹⁸ Dyostaqa manam pí rikashqatsu imeypis; japallan Tsurim, Teytapa rurinchow keykaqmi, peymi reqitsikushqa.

Juan Bawtistapa willakiynin

¹⁹ Keymi key Juanpa willakiynin, judyukuna kachayarqan Jerusalenpita saserdotikunata i lebitakunata tapuyanampaq: —¿Pitaq qam kanki?

²⁰ Willakorqanmi, i negarqantsu, sinowqa nerqanmi: —Manam noqatsu ká Kristu.

²¹ I tapuriyarqan: —¿Imanowtaq key? ¿Eliasku kanki qam? Nerqan: —Manam noqatsu. —¿Profetaku kanki? I yaskerqan: —Manam.

²² Niyarqannam: —¿Pitaq kanki? kachayamaqnikunata willayanápaq. ¿Imataq ninki kikikipeq?

²³ Nerqan: Noqaqa ká chusyaqchow juk qayakoqpa bosninmi: “Derechayey Señorpa náninta,” profeta Isaias nenqannow.

²⁴ I kachasqa kaqkuna farisewkunapitam kayarqan.

²⁵ Tapuyarqan i niyarqan: —Mana Kristu, ni Elias, ni profeta keykar, ¿imanirtaq bawtisanki?

²⁶ Juannam yaskerqan nirnin: —Noqa bawtisá yakuwanmi; mas qamkunapa chowpikikunachowmi keykan, peytam qamkuna reqiyankitsu.

²⁷ Peymi key qepáta shamoq, noqapita mas uneykaq, peypa llanqinpa watunllatapis paskeyta manam merisitsu.

²⁸ Key kosaskunam susederqan Betábarachow, Jordanpa wak tsimpanchow, tseychowmi Juan bawtiseykarqan.

Juan Bawtista willakun Jesuspaq

²⁹ Waránin junaqnam Juan rikarqan Jesús peyman shamoqta i nerqan: —¡Kaq keymi key, Dyospa Achkasnin, mundupa jutsan jorqoq!

³⁰ Keymi key peypaq noqa nenqá: “Noqapa qepátam shamun juk ollqu, keymi noqapita uneykaq, peyqa noqapa puntámi karqan.”

³¹ Noqa manam reqerqátsu; peru masqa Israyelman rikakashqa kanampaqmi, keypaqmi noqa shamorqá yakuwan bawtisarnin.

³² Juan willakorqanmi nishpa: —Espiritutam rikarqá syelupita palumanow urámoqta, i peychowmi karqan.

³³ I noqa manam reqerqátsu; yakuchow bawtisaq kachamaqniymi nimarqan: “Pipa jananmanmi Espiritu urámoqta rikanki i peychow kaqta peymi Espiritu Santuwan bawtisaqqa.”

³⁴ I noqam rikarqá i willakorqómi pey Dyospa Tsurin kanqanta.

Puntakaq disípulukuna

³⁵ Tsey waráninmi yapey keykarqan Juan ishkaq disípulunkunawan.

³⁶ I Jesusta tseypa purikaqta rikárirnam, nerqan: —¡Kaq keymi Dyospa Achkasnin!

³⁷ Wiyariyarqan parlaqta ishkan disípulukuna i Jesusta qatiyarqan.

³⁸ I Jesús tumeykurnam, qatiyashqanta rikárir, nerqan: ¿Imatataq ashiyanki? Peykunanam niyarqan: “Rabi, (Keymi ninan Mayestru), ¿meychowtaq yachanki?”

³⁹ Nerqanmi: —Shayámi i rikáyey. Eywayarqan i rikáyarqan meychow yachanqanta, i peywan keydakuyarqan tsey junaq, chunka óranowna kaptin.

⁴⁰ Andres, Simon Pedrupa wawqin, ishkampita juknin, wiyayashqa karqan Juanta, i Jesusta qatiyarqan.

⁴¹ Peynam puntata tarerqan, wawqin Simonta, i nerqan: —Tariyarqó Mesiyastam (Key ninanmi, Kristu).

⁴² I Jesusman apamorqan. Rikeykurnam Jesús, nerqan: —Qammi Simon kanki, Jonaspa tsurin, qampa jutikim kanqa Sefas (key ninanmi, Pedru).

⁴³ Waránin junaq Jesús eyweyta munarqan Galileyata, i tarerqan Felipita i nerqan: —Qatimey.

⁴⁴ Felipe karqan Betsaydapita, Andrespa i Pedrupa markanpita.

⁴⁵ Felipina tarirerqan Natanaelta, i nerqan: —Tariyarqó Moyses leychow peypaq qellqashqanta i tseynow profetakunapis: Nasaretpita, Josépa tsurin, Jesusta.

⁴⁶ Natanaelnam nerqan: —¿Nasaretpita ima alliqa yarqunmantsuraq? Felipinam nerqan: —Shamiy i rikey.

⁴⁷ Jesús Natanaelta peyman witeqta rikeykurnam, peypaq nerqan: —¡Kaq keymi rasonpa Israyelitaqa, peychow manam ulikiy kantsu!

⁴⁸ Natanaelnam nerqan: —¿Meypitataq reqimanki? Jesús yaskirnin nerqan: —Manaraq Felipe qayashuptikim igus yura chakinchow keykaptiki rikarqaq.

⁴⁹ Natanaelnam yaskirnin nerqan: —Rabi, ¡qamqa Dyospa Tsurinmi kanki! ¡Qammi Israyelpa Reynin kanki!

⁵⁰ Jesusnam yaskirnin nerqan: —¿Igus yura chakinchowmi rikarqoq nipteqku kreyinki? ¡Keykunapita mas jatun kosaskunatam rikanki!

⁵¹ I nerqan: —Tseqeypa tseqeypam niyaq: Kananpita witseypam rikáyanki syelu kichareykaqta, i Dyospa angelninkunata Nunapa Tsurinman witsaqta i uraqta.