Hechos 1 - Quechua Ancash New Testament

Espiritu Santuta ánikun

¹ Kuyashqa Teófilo, punta kaq libruchowmi, parlarqá Jesús llapan kosaskunata yachatsir i rurar qallanqanta,

² rarachow chaskishqa kanqan junaqyaq, Espiritu Santupa kamatsikiyninkunata akrashqan apostulkunata qorirna;

³ peykunatapis, jipanqanpita, yuripurqan kaweykar atska mana anawey prwebakunawan, chusku chunka junaqninpin yuriparninkuna i Dyospa reynunta parlapáyarnin.

⁴ Juntu keykayarnin, mandarqan Jerusalenpita mana ewkuyánampaq, sinowqa Teytapa ánikiyninta shuyayánampaq, tseyta, “wiyayarqeykinam noqa niyanqaqta.

⁵ Juanqa tseqeypam bawtisarqan yakuwan, keypita wallka junaqtanam qamkuna bawtisashqa kayanki Espiritu Santuwan.”

Jesús syeluman ewkun

⁶ Tseynam purwakashqa keykaqkuna tapuyarqan, nishpa: —Señor ¿kanan tyempuchowtsuraq kutitsinki reynun Israyelta?

⁷ Nirqannam: —Qamkunata manam tokayáshunkitsu tyempukuna i órakuna musyey, Teyta churashqan japallan pwedeq keyninchow;

⁸ peru chaskiyankim poderta, Espiritu Santu qamkunaman shamuptin, i willakoqními kayanki Jerusalenchow, jinantin Judeyachow, Samaryachow, i patsa kuchunyaq.

⁹ Key kosaskunata nirirnam; peykuna rikareykayaptin, pallarishqa karqan, pukutey chaskir tsaparerqan nawinkunapeq.

¹⁰ Peykuna syeluta rikareykáyaptin, pey ewkureykaptin, kaq key peykunaman yurirkurqan ishkey ollqukuna luyaq bestishqa,

¹¹ i niyarqan: —Galileyo ollqukuna, ¿imanirtaq syeluta rikareykáyanki? Key kikin Jesusmi, qamkunapita apashqa kashqa syeluman, imanowmi syeluman eywaqta rikáyarqonki tseynowllam shamonqa.

¹² Tseynam kutiyarqan Jerusalenman Olibar nishqan jirkapita, keymi Jerusalenman amánu, juk jamakiy junaq eywey.

¹³ Yeykurirnam, lloqayarqan altusman, Pedru i Jakobo, Juan, Andres, Felipe, Tomas, Bartolomé, Mateu, Jakobo Alfeyupa tsurin, Simon Selote i Judas Jakobupa wawqin yachayanqanman.

¹⁴ Key llapankunam tsarakuyarqan juknowlla Dyos mañakiychow, i rowakiychow, warmikunawan, i Jesuspa maman Maryawan, i wawqinkunawan.

Matias akrashqa chunka ishkeychow

¹⁵ Tsey junaqkunachow Pedru sharkorqan wawkikunapa chowpinchow (ellukayashqakuna kayarqan pachak ishkey chunkanowmi), i nerqan:

¹⁶ “Wawqikuna, wanarqanmi Eskritúra tinkunan Espiritu Santupa uney parlarqan Dabidpa shiminpa Judaspaq, peymi karqan Jesús tsareqkunapa pushaqnin,

¹⁷ i yupashqa karqan noqantsikkunawan, i key sirwikiychow partin kaporqan.”

¹⁸ Keymi, lluta rureyninpa págunwan ranterqan juk chakrata, i peqapa jeqarpur pullanpa pashtarirqan i llapan aqishninkuna ramakárerqan.

¹⁹ I musyariyarqan llapan Jerusalenchow yachaqkuna, tseynowmi taqey chakra kikinpa parleyninchow Aseldama jutiyoq, key ninanmi, Yawar chakra.

²⁰ “Salmu librukunachowmi qellqashqa keykan: Wayin tsunyaq rurakashqa katsun, pipis katsuntsu tseychow yachaq; i jukna chaskitsun rurananta.

²¹ Wananmi key nunakunapita noqantsikwan juntu kashqakuna llapan tyempu Señor Jesús yeykur i yarqur noqantsikkunachow,

²² Juanpa bawtismunpita qalleykur noqantsikpita raraman chaskishqa junaqkama, juk willakoq katsun noqantsikkunawan, kawarimiyninpita.

²³ I akrayarqan ishkaqta: Barsabas jutiyoq Joséta, shuney jutin karqan Justu, i Matiasta.

²⁴ Dyosman mañakur, niyarqan: “Qam Señor, llapanpa shonqunkuna reqeq, rikátsi ishkanpita meyqantataq akrarqonki,

²⁵ key sirwikiyta i apostul keyta chaskinanpaq, keypitam Judas ishkirqan jutsanpa, ewkunampaq kikimpa sityunman.”

²⁶ I swertitam jitayarqan, i swertinam ishkirqan Matiasman; i yupashqa karqan chunka juk apostulkunawan.