Hebreos 1 - Quechua Ancash New Testament

Paqwepa reqitsikiy Kristuchow

¹ Dyos, parlarqan atska kuti i tukiyláyakunapa uney tyempuchow teytantsikkunata profetakunapa,

² key qepa junaqkunachow parlapámarqontsik Tsurinpa, peytam churashqa llapampa eredérun, peypam rurakashqa mundupis;

³ peymi, gloryampa tsipapeynin kar, kikimpa allikaq retrátun keykar, peymi kawatsin llapan kosaskunata pwedeq key parlakiyninwan, jutsantsikkunata kikin paqarishqana kar, tákurishqam rarachow Dyospa derécha ládunman.

Jesukristu, angelkunapita mas pwedeq

⁴ Angelkunapita mas pwedeq rurashqa, tseynow peykunapita mas allikaq jutita eredashqa.

⁵ Tseymi ¿imeyllaqa Dyos nerqanku meyqan angelkunatapis: Tsurími kanki qam, Noqam tsuríkorqoq kanan, i yapeynam: Noqam peypa Teytan kashaq, i peynam noqapa tsuri kanqa?

⁶ Yapeynam, Japallan Tsurinta munduman yeykaratsimur, nin: Dyospa llapan angelninkuna adorayey.

⁷ Tseqeypam angelkunapita nin: Angelninkunata espiritu ruraq, i ministrunkunata nina rawreykaq.

⁸ Tsurimpaqnam nin: Troníkim, ó Dyos, wiñeypa wiñeynimpa; reyníkichow alli mandakuneyki bará.

⁹ Kuyarqonkim justisyata, i chikirqonki mana allita, tseyreykurmi Dyos unjishurqunki, qampa Dyosniki, kushikiy asétiwan, yanaqikikunapitapis mas.

¹⁰ I: Qanmi, Señor, qallananchow patsata rurarqeyki, i syelukunatapis makikikunapa rureyninmi.

¹¹ Peykunaqa ushakayanqam, qamqa tsarakunkim; i llapankunam awkisyáyanqa juk bestidunow,

¹² bestidutanowmi pitukacharkunki, i trokashqam kayanqa; qamqa kikikillam kanki, i wateykikunapis manam ushakanqatsu.

¹³ ¿Meyqan angelkunatataq Dyos nerqan imeyllaqa: Derecháman táki, chikishoqnikikunata chakikikuna jarunanman churamonqáyaq?

¹⁴ ¿Manaku llapan kayan sirwikoq espiritukuna, kachamushqa llapan salbasyon eredaqkunata sirwiyánanpaq?