Gálatas 1 - Quechua Ancash New Testament

¹ Noqa Pablum, apostul (manam nunakunapitatsu ni nunapatsu, sinowqa Jesukristupam i Teyta Dyospa wanushqakunapita kawaritsimoqpam),

² i llapan noqawan keykaq wawqikuna, Galasya iglesyakunaman:

³ Grasya i yamey key katsun qamkunaman, Teyta Dyospa i Señornintsik Jesukristupita,

⁴ pim qokurqan kikin jutsantsikkunapeq libramánantsikpaq key mana alli kaweypita, Dyos i Teytantsikpa muneyninmannow,

⁵ peypaq glorya katsun wiñeypa wiñeyninpa. Amen.

Japallan ebangelyu

⁶ Allápa almirashqam keyká imanow rasllam witikuriyarqonki qayayáshoqniki Kristupa grasyanpita, jukláya ebangelyuta qatiyaneykipaq.

⁷ Manam juk kaptintsu, sinowqa kayanmi wakinkuna turbatsiyáshoqniki i Kristupa ebangelyunta perditsita munayan.

⁸ Si noqakunapis, ó syelupita juk angel, willayáshunkiman jukláya ebangelyuta willayashqaqpita, maldítu katsun.

⁹ Uney niyanqánow, kananpis yapeymi nimú: Si meyqanpis predikayáshunkiman jukláya ebangelyuta chaskiyashqeykipita, maldítu katsun.

Pablu defendin ebangelyunta

¹⁰ Tseyqa, ¿kanan ashí nunakunapa fabornintaku, ó Dyospataku? ¿Ó nunakunata kushitsitaku muná? Si nunakunataraq kushitsita munáman, manachi Kristupa sirweqnintsu káman.

¹¹ Musyatsiyaqmi, wawqikuna, noqapa willakushqá ebangelyoqa, manam nunapatsu,

¹² manam noqa chaskerqó ní yachakorqó ni meyqan nunapitatsu, sinowqa Jesukristupa rikátsikiyninpam.

¹³ Wiyayarqonkinam noqapa portakiynípita juk tyempu judaysmuchow, allápa qatikacharqá Dyospa iglesyanta, i ushakátsita munarqá;

¹⁴ i judaysmuchow llallerqá atskaq winey mayíkunata markáchow, teytákunapa kostumbrinkunapa allápa sélakoq karnin.

¹⁵ Peru imeymi Dyos, mamápa pachanpita patsa rakimarqon, i qayamarqon grasyanpa,

¹⁶ noqachow Tsurinta rikátsir, gentilkunachow noqa predikanápaq, manam tseyllatsu taporqá eytsawan i yawarwan,

¹⁷ ni witsarqátsu Jerusalenman noqapa puntakaq apostulkunaman; sinowqa eywarqá Arabyatam i yapey kutimorqá Damaskuman.

¹⁸ Tseypitanam, kima wata pasariptin, witsarqá Jerusalenta Pedruta rikánápaq, i peywannam karqá chunka pitsqa junaq;

¹⁹ manam rikarqátsu ni meyqan apostulkunata, sinowqa Señorpa wawqin Jakobullatam.

²⁰ Key qellqayanqaqchow, kaq keymi Dyospa nowpanchow manam ulikútsu.

²¹ Tseypitanam eywarqá Sirya i Silisya markakunapa,

²² Judea iglesyakunapa manam reqishqatsu karqá rikeyninkunapa, Kristuchow keykaqkunapa;

²³ wiyayarqanllam niyanqanta: “Taqey juk tyempuchow qatikachámaqnintsikmi, kananqa predikan juk tyempuchow kreyikiy ushakátsi munanqanta.”

²⁴ I noqachow Dyosta glorifikáyarqan.