Filemón 1 - Quechua Ancash New Testament

¹ Noqa Pablum, Jesukristupa presun i wawqi Timoteu kuyashqa Filemonta, noqakunapa yanapayámaqni,

² i kuyashqa pani Apyata i sirwikiychow yanaqintsik Arkiputa, i wayikichow keykaq iglesyata.

³ Grasya i yamey key qamkunaman, Teytantsik Dyospita i Señor Jesukristupita.

Grasyas qokiy

⁴ Dyosnítam grasyasta qó, mañakiyníkunachow imeypis yarpará qampaq,

⁵ wiyámi kuyakiyniki i kreyikiyniki Señorpaq kapushonqeykita Jesusman i llapan santukunapaq;

⁶ kreyikiynikipa rureynin alli kanampaq llapan alli kaq reqikiy qamkunachow keykaptin Kristu Jesuspa,

⁷ kayápamanmi jatun kushikiy i shoqakiy kuyakiynikichow, qamreykurmi, wawqi, santukunapa shonqunkuna shoqashqa kayarqan.

Onésimupaq rowakiy

⁸ Tseyreykurmi, Kristuchow muneyní kapaman konbyeneqta mandanaqpaq,

⁹ mas byenqa rowaqmi kuyakiypa, kanqánow, Pablu awkinyashqana, i kanannaqa Jesukristupa presun,

¹⁰ rowaqmi tsurí Onésimupaq, presu keynichowmi peyta tsuríkorqá,

¹¹ juk tyempuchowqa pey karqan mana sirweq, peru kananqa qampaq i noqapaqpis báleqmi,

¹² i yapeymi kutitsimú qanman peyta; qam, chaskiyki kikiytanow.

¹³ Noqa munámanmi karqan noqawan keydakunanta, ebangelyupa kawsanreykur presu kashqáchow qampa rantinniki sirwimánampaq;

¹⁴ peru manam imatapis rureyta munátsu manaraq qam ániptiki tseynowpa fabor ruramashqeyki mana obligashqa kanampaq sinowqa boluntánikipita.

¹⁵ Keypaqchi qampita juk tyempupa rakikarqan, wiñeypaq chaskineykipaq;

¹⁶ amana sirwipakoqtanowqa, sinowqa sirwipakoqpitapis masraq, kuyashqa wawqitanow, masran noqapaq, peru qampaqnaqa masraq, eytsachowpis Señorchownow.

¹⁷ Tseymi yanaqikipaq katsimarqa, kikiytanowlla chaskiyki.

¹⁸ I sitsun imachowpis perfisyashorqonki, ó jaqeyki kanman, chureyki kwentáman.

¹⁹ Noqa Pablum qellqá makípa, noqam pagashaq; qampis jaqámi kanki mana ninaqreykur

²⁰ Awmi, wawqi, kapamátsun ima probechúllapis qampita Señorchow: ¡Konsoley shonqúta Señorchow!

²¹ Qellqarqoq wiyakoqkeynikita markákurninmi, nenqaqpita masta ruraneykita musyarnin.

²² Alistey jina posadakunápaq; markákúmi Dyosman mañakiynikikunareykur qamkunaman shamushaq.

Saludukuna i ushey bendisyon

²³ Saludayáshunkim Epafras, presukeyníchow yanaqi Kristu Jesuschow,

²⁴ Markus, Aristarko, Demas i Lukas yanapamaqniykuna.

²⁵ Señornintsik Jesukristupa grasyan espiritíkiwan katsun. Amen.