Efesios 6 - Quechua Ancash New Testament

¹ Tsurikuna, wiyakuyey teyteykikunata Señorchow, keyqa allim.

² Onrey teyteykita i mameykita keymi puntakaq mandamyentu ánikiyoq;

³ alli eywapushuneykipaq, atska wata kawaneykipaq key patsachow.

⁴ Qamkunapis, teytakuna, ama qallapayeytsu piñeyman tsurikikunata, sinowqa wátayey yachatsir Señorpa willapeyninwan.

⁵ Sirwikoqkuna, wiyakuyey key patsa patronnikikunata mantsakiywan mantsakur, shonqiykikunapa qollmi keyninwan Kristutanow

⁶ ama sirwitsu rikareykáshuptikillaqa, nunakunata kushitsi munaqkunanow, sinowqa Kristupa sirweqninkunanow, shonquwan Dyospa muneyninta rurar;

⁷ alli muneywan sirwir, Señortanow i ama nunakunatanowqa,

⁸ musyayankinam kada únu allita ruranqanpita, chaskinqa Señorpitam, sirwikoq karpis ó libri karpis.

⁹ I qamkunapis, patronkuna, rurayey peykunawan tseynowlla, mana jurapashpa, qamkunapa i peykunapa Señornin syeluchow kanqanta musyeykar, i peypaq manam kantsu jukláya nunakuna.

Dyos churashqan armakuna

¹⁰ Tseykunapita, wawqikuna, sinchi kayey Señorchow i pwedeq kallpanchow.

¹¹ Bistikuyey Dyospa llapan armankunawan, sinchi kayáneykipaq dyablupa engáñunkunapa kontran.

¹² Manam pelyantsik yawarpa i eytsapa kontrantsu, sinowqa apukunapa kontranmi, pwedeqkunapa kontran, key kaweychow ampeqkunapa gobernadorninkunapa kontran, rarakunachow mana alli espiritukunapa tropankuna kontran.

¹³ Tseymi, Dyospa llapan armaduranta tsariyey, mana alli junaqchow tsarakuyaneykipaq, llapanta usharir, sinchi kayey.

¹⁴ Sinchi kayey, tseqlleykikunata alleq watayey rasonpa kaqwan, i bistikuyey justisyapa korásanwan,

¹⁵ listu keykáyey ebangelyu willakoq yarquyaneykipaq.

¹⁶ Llapanpita, tsariyey kreyikiy eskúduta, keywanmi upitsiyanki dyablupa llapan rawraq dardunta.

¹⁷ I tsariyey salbasyon kaskuta, i Espiritupa espadanta, keymi Dyospa palabran;

¹⁸ llapan tyempuchow Dyosman mañakur llapan mañakiywan i Espirituchow rowakur, i tseychow riyakur mana jamashpa i rowakur llapan santukunapaq;

¹⁹ i noqapaq, shimiy parlaptin palabra qomashqa katsun balorwan reqitsinápaq ebangelyupa pakaraqninta,

²⁰ tseypaqmi kachamarqon keyreykurmi kadenashqa ká; balorwan peypaq parlanápaq.

Ushanan

²¹ Qamkunapis notisyákunata musyayaneykipaq, i rurashqáta, llapantam musyatsiyashunki Tíkiku, kuyashqa wawqi i fyel ministru Señorchow,

²² keypaqmi peyta kachamurqá qamkunaman, noqakunapita musyayáneykipaq, i shonqiykikunata shoqamunampaq.

²³ Yamey katsun wawqikunaman, i kuyakiy kreyikiywan, Teyta Dyospita i Señor Jesukristupita.

²⁴ Grasya katsun Señor Jesukristupa llapan kuyakoqkunawan mana trokakaq kuyakiywan. Amen.