Colosenses 1 - Quechua Ancash New Testament

¹ Noqa Pablum, Jesukristupa apostulnin Dyospa muneynimpa, i wawqi Timoteu,

² Kolosachow santu i Kristuchow sinchi keykaq wawqikunata: Grasya i yamey key katsun, qamkunapaq Teytantsik Dyospita i Señor Jesukristupita.

Grasyasta qokiy i rowakiy

³ Grasyastam qoyá Dyosta, Señor Jesukristupa Teytanta, qamkunapaq kadalla mañakur.

⁴ Kristu Jesuschow kreyikiynikikunapita, i wiyashqa karnin kuyakiynikikuna kanqanta llapan santukunapaq,

⁵ shuyakiyreykur qamkunapaq syeluchow wardashqa kanqanreykur, wiyashqanam kayanki ebangelyupa rasonpa kaq palabrata,

⁶ qamkunamanpis chámusqam, imanowmi apeykan wayininta i wineykan jinantin markachow, tseynowllam qamkunachowpis winanqa wiyayanqeyki junaqpita kayiyarqonki tseqeypa Dyospa qareyninta,

⁷ kuyashqa sirwikoq mayintsik Epafraspita yachakuyashqeykinow peymi Kristupa fyel sirwikoqnin qamkunapaq,

⁸ peypis willayamashqam espirituchow kuyakiynikikunapita.

⁹ Tseymi noqakunapis, wiyayanqá junaqpita, manam jamayátsu qamkunapaq Dyosman mañakur i rowakur, yacheywan juntashqa kayáneykipaq muneyninchow llapan yacheywan i espiritwal káyikiychow,

¹⁰ Señorpaqnow shumaq puriyaneykipaq llapanchow kushitsirnin wayíta apar llapan alli rureychow, i Dyosta reqichow winar;

¹¹ kallpatsishqa llapan pwedeq keywan, gloryoso poderninmannow, llapan pasensiyapaq i sinchiyeypaq;

¹² kushikiywan Teytata grasyasta qornin, alli ruramashqantsikta aktsichow santukunapa erensyanta chaskinapaq;

¹³ peymi libramarqontsik ampeqpa pwedeq keynimpita, i apamarqontsik kuyey Tsurimpa reynunman,

¹⁴ peychowmi kapamantsik redensyonnintsik yawarnimpa, jutsakunapa perdonnin.

Kristu kamashqakunapita punta kaq

¹⁵ Peyqa mana rikakoq Dyospa retratunmi, llapan kamashqakunapa punta kaqnin.

¹⁶ Peychowmi rurashqa karqon llapan imeykakunapis, syelukunachow i patsachowkaqkuna, rikakoq i mana rikakoq; tronukunapis, mandakoqkunapis, prinsipádukunapis, pwedeqkunapis llapanpis peypam rurakashqa i peypaqmi.

¹⁷ I peymi puntakaq llapan imeykakunapitapis, i peychowmi llapanpis kayan;

¹⁸ I peymi iglesyapa peqan, i peymi qallanan, wanushqakunapa wamaqshun, i pey llapanchow mandakoq kanampaq;

¹⁹ tseymi Teytata gustarqan peychow yachanampaq llapan pwedeq keynin,

²⁰ peywan amish tashqa kayánanpaq patsachow i syelukunachow llapan kosaskuna kaqkunapis yamey keyta rurar kruschow yawarninwan.

²¹ I qamkunatapis juk tyempuchow rakikashqa i chikikoq kayarqeyki yarpeynikikunachow mana allita rurarnin, kananqa amistatsiyashorqonki.

²² Eytsa kwerpuchowqa wanínimpa, santukunata limpyuta mana piñapánayoqta cháratsiyashuneykipaq peypa nowpanman;

²³ rasonpatsun patsakashqa i sinchi kayanki kreyikiychow, wiyayashqeyki ebangelyupa shuyakiynin mana kuyurishpa, keytam jinantin kamashqachow willakuyan syelupa uraninchow. Key ebangelyupaq noqa, Pablum, ministru rurashqa karqó.

Pablu, ebangelyupa ministrun

²⁴ Kananqa kushikúmi qamkunapaq jipanqáta, i eytsachowmi kumpliy Kristupa llakikiyninta kwerpun iglesyapaq.

²⁵ Peypaqmi noqa ministru rurashqa karqó Dyospa mayordómun qamkunachow kanápaq, Dyospa palabranta kumplir willakunápaq.

²⁶ Dyospa pakaraq misteryun, tyempukuna i kastakuna qallananpita, kananqa rikátsishqanam santunkunata,

²⁷ peykunatam Dyos munarqan reqitsita key misteryunta, gloryanchow kapoqninkunata gentilkunachow, keymi Kristu qamkunachow, gloryan shuyakiy,

²⁸ peypaqmi willakuyá llapan nunakunata piñaparnin, i yachatsirnin, llapan yacheywan, Kristu Jesusman chátsiyanápaq llapan nunakuna alliyashqata;

²⁹ keypaqmi noqa uryá, sinchikiykuryan peypa pwedeq keyninmannow noqachow rurakaptin.