2 Timoteo 1 - Quechua Ancash New Testament

¹ Noqa Pablum, Jesukristupa apostulnin Dyos muneyninpa, kaweypa ánikiyninmannow Kristu Jesuschow,

² Timoteuman, kuyashqa tsuri: Grasya, ankupákiy i yamey key, Teyta Dyospita i Señornintsik Jesukristupita.

Ama penqakiytsu testifikeyta

³ Dyostam grasyasta qó, peytam sirwi mayorniykunapita patsa alli konsensiyawan, mana jamashpam yarpá qanpaq Dyosman mañakiniykunachow paqaspa i junaqpa;

⁴ rikeynikita munar, weqikikunapita yarpar, kushikiypa juntashqa kanápaq;

⁵ yarparnin mana ulikiywan apamur mana kreyikiyniki qamchow kaptin, keymi puntata karqan awileyki Loydachow, i mameyki Eunisichow, i markákúmi qamchowpis kanqanta.

⁶ Tseymi willapaq kawatsi Dyospa qareynin qamchow keykaqta makiykuna churamunqápa.

⁷ Dyosqa manam qomarqontsik mantsakoq espíritutatsu, sinowqa pwedeq keytam, kuyakoqta i kikinchow sujetakoqta.

⁸ Tseymi, ama penqakiytsu Señornintsikpaq willakiyta, ni noqapita, peypa présun sinowqa jipey ebangelyupaqreykur llakikiykunata Dyospa pwedeq keyninmannow,

⁹ peymi salbamarqontsik i qayamarqontsik santu qayakiypa, manam rureynintsikkunamannowtsu, sinowqa kikinpa muneyninmannow i grasya qomashqantsiknow Kristu Jesuschow nowpata manaraq tyempukuna qallaptin,

¹⁰ peru kananqa rikátsikamushqa Salbador Jesukristupa yurimíninwan, peymi waniyta qochirqan i jorqorqan kaweyta aktsiman i ebangelyupa mana waniyta,

¹¹ tseypaqmi nowqa churashqa karqó predikador, apostul i yachatsikoq gentilkunapaq.

¹² Tseynowpam keyta jipá, peru manam penqakútsu, musyámi piman kreyenqáta, i segúrum ká pwedeq kaq markákamanqanta wardamánanpaq tsey junaqpaq.

¹³ Alli palabrakunata tsarey imanow kanqanta noqapita wiyanqeykiyta, kreyikiychow i kuyakiychow Kristu Jesuschow.

¹⁴ Tsarey alli yachakonqeykita Espiritu Santupa noqantsikchow yachaqta.

¹⁵ Keyta musyankinam, Asyachow llapan keykaqkunam jaqirayamarqon, tseykunapitam kayan Figelo i Hermógenes.

¹⁶ Señor ankupátsun Onesíforupa wayinta, atska kutim kallpatsimarqan, i manam penqakorqantsu kadenákunapitapis,

¹⁷ sinowqa Rómachow keykarmi ashimarqan alleqpa, i tarimarqan.

¹⁸ Señor qoykutsun ankupákiyta tarinanpaq Señorpa nowpanchow tsey junaq. I imanowmi yanapamarqantsik Efesuchow, qammi alleq musyanki.