2 Corintios 1 - Quechua Ancash New Testament

¹ Noqa Pablum, Jesukristupa apostulnin Dyospa muneyninpa, i wawqi Timoteu, Korintuchow Dyospa iglesyan keykaqta, Akáyachow llapan santukunawan keykaqkunata:

² Grasya i yamey key qamkunaman, noqantsikpa Teytantsik Dyospita i Señor Jesukristupita.

Grasyas qokiy jipakiykunachow

³ Benditu katsun Dyos i Teytan Señornintsik Jesukristupa, ankupákiykunapa Teytan i llapan shoqakiykunapa Dyosnin,

⁴ peymi shoqamantsik llapan jipakiynintsikkunachow, noqantsikpis shoqanantsikpaq wakinkunata jipakiychow keykaqkunata, tsey shoqanakiywan Dyosnintsik noqantsikta shoqamashqantsikwan.

⁵ Imanowmi noqantsikchow atskayan Kristupa llakikiyninkuna, tseynowmi shoqakiynintsikpis atskayan kikin Kristupa.

⁶ Sitsun kayáshaq jipakushqakuna, tseyqa qamkunapa shoqeynikikunapaq i salbasyonnikikunapaqmi; sitsum kayáshaq shoqashqakuna, tseyqa qamkunapa shoqeynikikuna i salbasyonnikikunam, keyqa rurakan jipakiychow i llakikiykunachow noqakunapis jipayanqánow.

⁷ Noqakunapa shuyakiyníkuna qamkunapaq sinchim, musyantsikmi llakikiykunachow yanaqíkuna kayanqeykita, tseynowmi kayanki shoqakiychowpis.

⁸ Tseymi wawqikuna, munayámi musyayáneykita Asyachow jipayashqáta; kayarqá allápa nitipukashqa kallpákunapitapis masraq, tseynowpam oqrariyarqá kaweyníkuna katsita.

⁹ Peru kayápamarqan kikiykunachow wanípa sentensyan, kikiykunachow mana markákuyanápaq, sinowqa wanushqakunata kawaritsimoq Dyoschow;

¹⁰ peymi librayámarqan, i librayáman, peychowmi shuyarayá librayámánanpaq, keyláya jatun waniypita;

¹¹ yanapeykayamankim noqakunapa faborniykuna Dyosta mañakurnin, tseynowpa atskaq nunakunapa grasyas nishqa kanampaq noqakunapa fabornikuna noqakunata qarey qoyámashqanta atskaqkunapa.

Pablupa sinseru keynin

¹² Keymi key sumeyníkuna: konsensiyantsikpita willakiynin, Dyospa sensillu i sinseru keyninwan, manam nunapa yacheyninwantsu, sinowqa Dyospa grasyanwan, puriyarqó key munduchow, i masran qamkunawan.

¹³ Tseynowqa manam leyiyanqeykipeq, ó juk kosaskunatatsu qellqayarqoq, káyiyanqeykipita; i shuyarámi ushéyaq káyiyaneykita;

¹⁴ imanowmi wakinta káyiyarqonki noqakuna sumeyníkikuna kayanqáta tseynow qamkunapis noqakunapaq, Señor Jesuspa junaqninpaq.

Pablu willakun Korintuman eywananta

¹⁵ Key markákiniywanmi munarqá shamíta qamkunaman puntata, kayápushuneykipaq ishkey kaq grasya,

¹⁶ i qamkunapam pasashaq Masedonyaman, i Masedonyapita yapey kutimushaq qamkunaman, i qamkunapam pushashqa kashaq Judeaman.

¹⁷ Tseymi, keykunata yarparnin; ¿kisáchi apurádulla rurarqá? ¿Key rureyniyta yarparnin yarpá eytsachownollaku, noqachow kanampaq “Omi” i “Mana”?

¹⁸ Imanowmi Dyos fyel, parlénikuna qamkunapaq manaku “Omi” i “Mana”.

¹⁹ Dyospa Tsurinqa, Jesukristu, qamkunachow predikashqam karqon noqakunapa, noqapa, Silbanupa i Timoteupa, manam karqontsu “Omi” i “Mana”; mas karqon “Omi” peychow;

²⁰ tseynowmi Dyospa llapan ánikiyninkuna peychow “Omi”, i peychow “Amen”, noqantsikpa, Dyospa gloryanpaq.

²¹ I patsakátsimaqnintsikqa qamkunatawan Kristuchow, llushimaqnintseqqa, Dyosmi,

²² peymi sellamarqontsik, i qomarqontsik Espiritupa séñanta noqantsikpa shonquntsikkunachow.

²³ Mas noqaqa mañakú Dyosta almápa testígunpaq, qamkunapaq alli karnin pasamorqáraqtsu Korintuman.

²⁴ Manam mandakoqtsu kayá qamkunapa kreyikiykunachow, sinowqa yanapayaqmi qamkunapa kushikiynikikunapaq; tsey kreyikiypam sinchi keykayanki.