1 Corintios 1 - Quechua Ancash New Testament

¹ Noqa Pablum, qayashqa Jesukristupa apostulnin kanampaq Dyospa muneyninpa, i wawqi Sostenes,

² Dyospa iglesyan Korintuchow keykaqta, Kristu Jesuschow santuyashqakunata, qayashqa santu kayánanpaq i llapan meychowpis Señor Jesukristupa jutinta qayakoqkunawan, peykunapa Señornin i noqantsikpa:

³ Grasya i yamey key qamkunata, Dyospita noqantsikpa Yayantsik i Señor Jesukristupa. Alli key i trankilu key Teytantsik Dyospita i Señor Jesukristupita.

Agradesikiy Kristuchow kapoqnimpa

⁴ Grasyastam qó Dyosniyta wiñeypa qamkunapaq, Dyospa grasyanpa qoyáshorqonki Kristu Jesuschow;

⁵ llapan kosaskunachowmi kapoqyoq kayanki peychow, llapan palabrachow i llapan yachaq keychow;

⁶ Kristupaq willakiy patsakashqanam karqon qamkunachow,

⁷ tseynowpa manam pishipuyashunkitsu ni meyqan qarey, Señornintsik Jesukristupa rikakámiyninta shuyar;

⁸ peymi patsakatsiyashunki ushakeykama, piñapeyninnaq kayaneykipaq Señor Jesukristupa junaqninchow.

⁹ Dyosqa fyelmi, peypam qayashqa kayarqonki juknowlla kayaneykipaq Tsurin Señornintsik Jesukristuwan.

Liryakikuna iglesyachow

¹⁰ Rowayaqmi, wawqikuna, Señornintsik Jesukristupa jutimpa, parlakuyey juk kósallata, i katsuntsu rakikeykuna qamkunachow, sinowqa keykayey eyllukashqa juk yarpeyllachow i juk muneyllachow.

¹¹ Willayamashqam qamkunapita, wawqikuna, Kloépa kaqkuna, qamkunachow liryakiy kanqanta.

¹² Munámi niyeynikita qamkunapita kada únum nin: “Noqaqa Pablupam ká”, i “noqa Apóluspam”, i “noqaqa Sefaspa”, i “noqa Kristupa”.

¹³ ¿Akasu Kristu rakikashqaku keykan? ¿Pabluku krusifikashqa karqan qamkunapaq? ¿O Pablupa jutinchowku bawtisashqa kayarqonki?

¹⁴ Grasyastam qó Dyosta mana meqeykikunata bawtisayanqaqta, sinowqa Krisputa i Gáyuta,

¹⁵ pipis mana ninampaq jutíchow bawtisayanqaqta.

¹⁶ Bawtisarqámi Estefanaspa kastankunatapis mas wakinkunata bawtisanqátaqa manam musyátsu.

¹⁷ Kristuqa manam kachamashqa bawtisanápaqtsu, sinowqa ebangelyuta predikanápaqmi; manam yachey parleykunawantsu, Kristupa krusnin mana sirweq rurakánampaq.

Kristum: Yachey i Dyospa podernin

¹⁸ Kruspita willakiyninqa lókuyeymi oqrakaqkunapaq; peru salbakoqkunapaqqa, keymi key, noqantsikpaq, Dyospa podernin.

¹⁹ Qellqashqam keykan: Yachaqkunapa yacheyninta ushakáratsishaqmi, káyikoqkunapa káyikiyninta chaskishaqtsu.

²⁰ ¿Meychowtaq keykan yachaq? ¿Meychowtaq keykan ley yachatsikoq? ¿Meychowtaq keykan key tyempupa liryaqnin? ¿Manaku Dyos lókuyatsishqa key mundupa yacheyninta?

²¹ Dyospa yacheyninchowqa, mundu manam Dyosta reqerqantsu yacheywan, Dyosta gustarqan kreyentikunata salbey lókuyey predikasyonpa.

²² Judyukunaqa mañakuyan señalkunata, i griegukuna ashiyan yacheyta;

²³ peru noqantsikqa predikantsik Kristu krusifikádutam, judyukunapaqqa tseqeypam trompisayananpaq i gentilkunapaqmi lókuyey;

²⁴ qayashqakunapaqqa, judyukunapaq i griegukunapaq, Kristu Dyospa podernin i Dyospa yacheynin.

²⁵ Dyospa upan niyanqanmi mas yachéyoq nunakunapita, i Dyospa kallpannaq mas kallpayoq nunakunapita.

²⁶ Rikáyey, wawqikuna, qayashqa kayanqeykita, eytsamannowqa manam atskatsu yachaq kayanki, ni atskaqtsu pwedeqkuna, ni atskaqtsu báleqkuna;

²⁷ sinowqa munduchow upatam Dyos akrarqan, yachaqkunata penqakatsinampaq; munduchow kallpannaqtam Dyos akrashqa, kallpayoqta penqakatsinampaq;

²⁸ mana munashqata i mana sirweqta Dyos akrashqa, manakaqta, ushakáratsinampaq kaqtanow,

²⁹ mana pipis peypa nowpanchow sumákunampaq.

³⁰ Peypam qamkuna keykáyanki Kristu Jesuschow, peytam Dyos rurashqa nowqantsikpaq yacheynintsik, justifikasyonnintsik, i santifikasyonnintsik i reskatashqa keynintsik;

³¹ qellqashqa keykanqannow: Sumákoqqa, Señorchow sumákutsun.