San Judas 1 - Q'eqchi Bible

Xk'eeb'al sahil ch'oolej

¹ Laa'in laj Judas, xmoos li Jesukriist ut riitz'in laj Santiago, nintz'iib'ak rik'ineb' li b'oqb'ileb', raarookeb' xb'aan li Yos Yuwa'b'ej ut xokxookeb' cho'q re li Jesukriist.

² Chiwanq taxaq eerik'in li uxtaanal, li tuqtuukilal ut li rahok chi numtajenaq.

Xyaalalil li hu

³ Ex inrahom, q'axal xink'e inch'ool chi tz'iib'ak eerik'in chirix li qakolb'al naqawotz sa' komonil; ab'an anaqwan tz'aqal xweek'a naq tento tintz'iib'aq eerik'in re xtz'aamankil naq teeyal eeq'e chi xkolb'al rix li paab'aal li kiq'axtesiik chi junwaakaj reheb' laj santil paab'anel.

⁴ Xb'aan naq wankeb' li xe'xch'ik rib' sa' eeyanq chi muqmu. Eb' a'in, chalen chaq junxil, ak xaqab'anb'il chaq li tojb'amaak sa' xb'eeneb'. Maak'a'eb' xpaab'aal; neke'xsutq'isi li rusilal li qaYos chi jo'maajo'il na'leb' ut neke'xtz'eqtaana li Jesukriist, li Qaawa' ut laj Eechal qe li jun chirib'il.

Eb' laj tzolonel aj b'alaq'

⁵ Us ta ak nekenaw chixjunil a'in ut chi junwaakaj, ab'anan toj nawaj xjultikankil cheru: yookin chi aatinak chirix li Qaawa'. A'an xb'enwa kirisi chaq li xtenamit sa' xteepal Ejiipt ut moqon chik kixsacheb' li ink'a' ke'paab'ank.

⁶ Ninjultika ajwi' cheru naq eb' li ánjel li ink'a' ke'xk'uula li loq'al k'eeb'il reheb' ut ke'xkanab' li xna'ajeb', tz'aptz'ookeb' anaqwan xb'aan li Qaawa' rub'el xwankil li aak'ab' rik'in kareen chi junelik, cho'q re li raqb'a aatin taawanq sa' li xnimal ru kutan.

⁷ Jo'kan ajwi' Sodoom, Gomoor ut eb' li tenamit li ke'wank chi xk'atq, ke'kanaak cho'q xnimal eetalil cho'q qe laa'o: anaqwan neke'xkuy li xtojb'al rix li xmaakeb' sa' li xam chi junelik xb'aan naq, kama'eb' li ánjel, ke'xmux rib' ut ke'xq'axtesi rib' chi xb'aanunkil li jo'maajo'il na'leb'.

⁸ Jo'kaneb' ajwi' li winq a'in: us ta neke'xnaw chixjunil li kik'ulmank, ab'anan neke'xmux li xtz'ejwaleb', xb'aan naq aj matk'eb'; neke'xtz'eqtaana li x'awab'ejihom li Qaawa' ut neke'xmajewaheb' li wankeb' xloq'al.

⁹ Li arkánjel Miguel, naq yo chaq chi xyalb'al xmetz'ew rik'in laj tza, naq ke'xwech'i rib' chirix li xch'och'el xsululel laj Moisés, ink'a' kixyal xraqb'al aatin sa' xb'een chi majewanb'il, ka'aj b'an wi' kixye: “Li Qaawa' chirahob'tesinq aawe”, chan.

¹⁰ A'ut eb' a'in neke'xmajewa li k'a'aq re ru li ink'a' neke'xnaw, toj reetal neke'q'aak chisa' li k'aru nareek'a li tz'ejwalej, jo'keb' li xul maak'a'eb' xna'leb'.

¹¹ Ra chaalel sa' xb'eeneb', xb'aan naq xkoheb' sa' xb'e laj Kaín. Xb'aan li tumin xe'xq'axtesi rib' sa' li kib'alaq'iik wi' laj Balaham, ut xe'oso'k sa' li xq'etb'a aatin laj Koré.

¹² Eb' a'in xutaanal ajwi' rilb'aleb' naq wankeb' sa' eeyanq sa' leeloq'laj ninq'e: neke'wa'ak neke'uk'ak sa' eeyanq chi maak'a'eb' xxutaan, yookeb' chi xch'oolaninkileb' rib' xjuneseb'. Jo'keb' li choql li maak'a' hab' chisa', taqen kub'eneb' xb'aan li iq', chanchaneb' li che' maak'a'eb' li ru sa' xq'ehil, ka' wa kamenaqeb', mich'b'il li xxe'eb';

¹³ kama'eb' li xkaw oq li palaw, neke'risi chaq li xwoqxil li xxutaaneb', jo'keb' li chahim li yal neke'xb'eeni rib'eb', ut ak kawresinb'il cho'q reheb' xchamal li aak'ab' chi junelik.

¹⁴ Chirixeb' ajwi' a'in ak ki'aatinak chaq cho'q propeet laj Enok, li xwuq winq chirix laj Adán: “K'ehomaq reetal -chan-, kol'elq li Qaawa' rochb'eeneb' li xk'iila o'q'ob' chi santil ánjel.

¹⁵ Kol'elq chi raqok aatin sa' xb'eeneb' chixjunileb' jo' ajwi' chi xch'olob'ankil chiru chixjunileb' laj q'etol aatin eb' li xyib' aj b'aanuhomeb' ut chixjunil li xik' aj aatin xyehomeb' chirix li Qaawa' eb' laj maak a'in yib'ru xna'leb'eb'”.

¹⁶ Eb' a'in aj wech'oneleb', maak'a' nawulak chiruheb'; wankeb' jo' naraj li tz'ejwalej. Neke'aatinak re xnimob'resinkil rib'eb' ut neke'q'unb'esink yal re xk'ulb'al li k'aru neke'raj.

Xch'olob'ankil xna'leb'eb' laj paab'anel

¹⁷ A'ut laa'ex raarookex inb'aan, chinaq sa' eech'ool li aatin ke'xye chaq eb' li x'apóstol li Qaawa' Jesukriist:

¹⁸ “Sa' roso'jikeb' li kutan -chankeb' chaq eere- te'waklije'q chaq li winq li te'xse'e xaq chixjunil ut te'wanq jo' taqlanb'ileb' xb'aan li xyib' aj na'leb'”.

¹⁹ A'aneb' a'in li neke'yoob'ank jachok ib', aj raholeb' ru li ruuchich'och'il na'leb', ut maak'a' li Musiq'ej rik'ineb'.

²⁰ A'ut laa'ex raarookex inb'aan, kab'lahomaq eerib' sa' leepaab'aal li q'axal sant, ut tijonqex sa' li Santil Musiq'ej.

²¹ Kanaaqex sa' xrahom li Yos, yooqex chi royb'eninkil li ruxtaan li Qaawa' Jesukriist, cho'q re li junelik yu'am.

²² Chech'olob' xna'leb'eb' li neke'wiib'ank xch'ool.

²³ Chekoleb' li junch'ol rik'in risinkileb' sa' li xam, ut li junch'oleb' chik cheruxtaana ruheb'; ab'an chek'ehaq reetal: xik' cherilaq li raq'eb' tz'ajninb'il xb'aaneb', meeb'on eerib' rik'in li xb'aanuhomeb'.

Xraqik li hu

²⁴ A' taxaq li Yos li wank xwankil chekolb'al chiru li maak jo'wi' cheq'axtesinkil sa' li xnimal xloq'al chi maak'a'aq eemuxul ut rik'in sahil ch'oolej,

²⁵ a' li jun chi Yos aj Kolol qe, sa' xk'ab'a' li Jesukriist li Qaawa', a'an taxaq chiwanq xloq'al, li nimaak u, li x'awab'ejihom ut li xwankilal chalen chaq junxil, anaqwan ut junq'e junq'e kutan. Jo'kan taxaq.