Sofonías 3 - Ñawpaq Testamento Apurímac Llaqtanchispaq Este nisqa Lawpaq

Jerusalén llaqta castigasqa kananmanta

¹ ¡Ay, imaynaraq Jerusalén llaqtayoq runakunaqa kanqaku! Paykunaqa rebelde runakunan kanku. Paykunapa llaqtankuqa anchapas qenllichasqan kashan. Paykunaqa runamasinkuta ñak'arichiqmi kanku.

² Paykunaqa manan Señor Diospa rimapayasqantaqa uyarirankuchu. Paykunaqa manan q'aqchaspa corregisqa kaytaqa munarankuchu. Paykunaqa manan Señor Diostaqa mashkarankuchu nitaqmi paypiqa confiarankuchu.

³ Paykunapa kamachiqnin autoridadkunaqa qaparishaq leonkuna hinaraqmi kanku. Imaynan *lobo nisqa animalkunapas presanta tuta mikhuruspa paqarisnin p'unchawpaqqa manaña tulluntapas saqenñachu, chay hinaraqmi juezninkunapas kanku.

⁴ *Profetankupas paytukusqan kanku. Paykunaqa runakuna engañaytan yachanku. *Sacerdotenkunapas Señor Diospa templontan qenllichanku. Saynallataqmi paykunaqa kamachikuy leykunamantapas llullakuspa yachachinku.

⁵ Señor Diosqa justo kasqanraykun, paykuna ukhupi kaspa allin kaqkunata ruwan. Payqa manan ima mana allintapas ruwanchu. Payqa sapa achikhamuytan cheqaq justiciata ruwan. Payqa sapa p'unchawmi allin kaqtapuni ruwan. Ichaqa millay mana allinkunata ruwaq runaqa, manaña p'enqakuyniyoqmi kanku.

⁶ Señor Diosmi khaynata nin: —Noqaqa ashka nacionkunatan chinkachirani. Paykunapa tiyasqanku alto torrekunaqa destruisqan kashan. Noqan callenkutapas ch'inñeqman tukuchirani, saynapi chayninta manaña pipas purinanpaq. Llaqtankutapas purmachiranin. Chayraykun llaqtankupiqa manaña ni ch'ulla runallapas qeparanchu.

⁷ Chaymi noqaqa khaynata piensarani: “Kay Jerusalén llaqtayoq runakunaqa manchakuwanqakun. Paykunaqa saynata corregiqtiymi kasukuyta yachanqaku. Saynapin noqaqa paykunapa wasinkutaqa manaña destruisaqñachu”, nispay. Ichaqa paykunaqa mana allinkunata ruwaspankun astawanraq huchallikuranku.

⁸ Chayraykun noqaqa khaynata nini: qankunaqa hatarimuspa juzganay p'unchawkamayá suyaykuwaychis. Noqaqa llapallan nacionkunata hinallataq hatun llaqtakunata huñuykuspaymi ancha phiñakuyniywan paykunataqa juzgasaq. Noqapa ancha phiñakuyniyqa kay pachapi llapallantan nina hinaraq rupharunqa, nispa.

⁹ Señor Diosqa khaynatan nillarantaq: —Chay p'unchawkuna chayamuqtinmi chay nacionkunapa rimayninta ch'uyanchasaq. Hinaqtinmi paykunaqa noqa Señor Diosllataña yupaychamuwanqaku. Hinaspan ch'ulla runa hinallaña noqa Señor Diosta serviwanqaku.

¹⁰ Hinaqtinmi noqapa akllakusqay runakunaqa ch'eqesqa kasqankumanta Etiopía nacionpi mayukunapa chimpankunamantaraq hamunqaku noqata yupaychawanankupaq. Hinaspan paykunaqa ofrendakunata apamuspa ofrecemuwanqaku.

¹¹ Jerusalén llaqtayoq runakuna, chay p'unchaw chayamuqtinqa manañan p'enqakunkichishñachu noqapa contraypi rebelakusqaykichismantaqa. Noqaqa qankuna ukhumantan chinkachisaq paytukusqa kasqaykichismanta kusikuqkunata. Saynapin qankunaqa manaña ni hayk'aqpas noqapa ch'uyanchasqay moqopiqa paytukusqa kankichishñachu.

¹² Noqan qankuna ukhupiqa qepachisaq humilde runakunata hinallataq wakcha runakunatapas. Paykunan cheqaqtapuni noqa Señor Diospi confianqaku.

¹³ Israel nacionpi puchuq runakunaqa manañan mana allin kaqkunataqa ruwanqakuñachu. Nitaqmi paykunaqa llullakunqakuñachu. Paykuna ukhupiqa manañan engañaq runakunapas kanqañachu. Noqan paykunataqa ovejata michiq hina cuidasaq. Saynapin paykunaqa hawkallaña samakunqaku, paykunataqa manañan pipas manchachinqañachu, nispa.

Jerusalén llaqtapaq kusikuywan takisqankumanta

¹⁴ Israel *nacionpi Sión nisqa Jerusalén llaqtayoq runakuna, tukuy sonqoykichiswan kusikuymanta qapariychis. Jerusalén llaqtayoq runakuna, tukuy sonqoykichiswan kusikuychis.

¹⁵ Señor Diosqa manañan castigasunkichishñachu. Payqa qankuna ukhumantan enemigoykichista qarqorun. Señor Diosmi qankuna Israel *nacionniyoq runakunapa reyniykichisqa. Paymi qankunapa chawpiykichispiqa kashan. Qankuna ukhupiqa manañan hayk'aqpas mana allin ruwaykunataqa rikunkichishñachu.

¹⁶ Chay p'unchawkuna chayamuqtinmi, Jerusalén llaqtamanta khaynata ninqaku: —Sión llaqtapi tiyaq runakuna, qankunaqa amayá manchakuychishñachu. Qankunaqa amayá hukmanyaychishñachu.

¹⁷ Qankuna ukhupiqa Señor Diosmi kashan. Payqa Tukuy Atiyniyoqmi; paymi atiyninwan salvasunkichis. Qankunamantan Señor Diosqa anchatapuni kusikunqa. Qankunata khuyakususqaykichisraykun upallakunqa. Qankunaraykun payqa takikunata takispa kusikunqa, nispanku.

¹⁸ Señor Diosqa khaynatan nillarantaq: —Noqaqa fiesta p'unchawpi hinan qankunataqa kaqmanta huñusqaykichis. Qankunaqa ñan unay tiempoñan llakikuypi karankichis. Ichaqa noqan chay p'enqaypaq llakikuyniykichistaqa chinkachisaq.

¹⁹ Chay p'unchawkuna chayamuqtinmi, noqaqa ñak'arichisuqniykichis runakunata anchata castigasaq. Wist'u kaq ovejakunatan noqaqa salvasaq. Noqaqa chinkasqa ovejakunata mashkamuspan huñumusaq. Qankunaqa p'enqaypi kasqaykichis nacionkunapin ancha respetasqa hinallataq ancha reqsisqa kankichis.

²⁰ Chay tiempo chayamuqtinqa noqan qankunataqa kutichikanpusqaykichis. Chay tiempo chayamuqtinqa noqan qankunataqa huñukanpusqaykichis. Chay ñak'arichisqa kasqaykichismanta kutichimuspaymi qankunataqa kay pachapi llapallan runakunamanta aswan más importante reqsisqa runakunaman tukuchisqaykichis. Saynataqa noqa Señor Diosmi nini, nispa.