Sofonías 1 - Ñawpaq Testamento Apurímac Llaqtanchispaq Este nisqa Lawpaq

Señor Diospa castiganan p'unchawkunamanta

¹ Amonpa wawan *rey Josías Judá *nacionta gobiernashaqtinmi, Sofoniasman Señor Dios rimapayaran. Sofoniasqa karan Cusi sutiyoq runapa wawanmi. Cusipa papantaqmi karan Gedalías. Gedaliaspa papantaqmi karan Amarías. Amariaspa papantaqmi karan Ezequías.

² Señor Diosqa khaynatan rimapayaran: —Kay allpa pachapi tukuy ima kaqtan lliwta destruisaq.

³ Noqaqa destruisaqmi runakunata, animalkunata, alton phawaq animalkunata, *lamar qochapi challwakunata hinallataq malvado runakunatapas. Runakunatan kay allpa pachamanta chinkachisaq. Saynataqa noqa Señor Diosmi nini.

⁴ Noqa Señor Diosqa Judá nacionniyoq runakunatan castigasaq. Noqaqa Jerusalén llaqtapi tiyaq runakunatan castigasaq. Chay lugarmantaqa lliwtan Baal nisqa *idolotaqa chinkachisaq. Chay idolota yupaychaq runakunatapas hinallataq chay idolota serviq *sacerdotekunatapas lliwtan chinkachisaq. Saynallataqmi paykunapa sutinkupas chinkachisqa kanqa.

⁵ Destruillasaqtaqmi wasi pataman wichaspa k'umuykuspa ch'askakunata yupaychaq runakunatapas. Saynallatataqmi destruisaq noqa Señor Diospa sutiypi juraspanku Milcom nisqa diospa sutinpi juraq runakunatapas.

⁶ Noqaqa destruillasaqtaqmi noqa Señor Diosmanta karunchakuq runakunata, noqata mana mashkawaqniy runakunata hinallataq noqapa yachachisqaykunata mana yachay munaq runakunatapas, nispa.

⁷ Señor Diospa castiganan p'unchawqa chayaykamushanñan. Payqa huk *sacrificio ofrendatan prepararun. Chay sacrificioman invitasqa runakunatan ch'uyancharun. Chaymi Señor Diospa ñawpaqninpiqa upallalla kanaykichis.

⁸ Señor Diosqa khaynatan nillantaq: —Sacrificio ruwasqanku p'unchawmi castigasaq jefekunata, ñawpaq gobiernaq reypa wawankunata hinallataq noqapi mana creeq huk law nacionniyoq runakunapa p'achakusqankuman hina p'achakuqkunatapas.

⁹ Chay p'unchawpiqa castigasaqmi punkuq umbralninpa hawanta haykuq runakunata, Saynallataqmi castigasaq engañaspa hinallataq suwakuspa patronninpa wasinman tukuy imata hunt'achiq runakunatapas.

¹⁰ Chay p'unchawpiqa Challwa Punku nisqanku punkumantan yanapakuyta mashkaspa waqyakamunqaku. Mosoq Barriomantapas llakikuypaq qaparqachaymi uyarikunqa. Moqokunamantapas ancha raqaqyaymi uyarikunqa. Saynataqa noqa Señor Diosmi nini.

¹¹ Mercado nisqa Barriopi tiyaqkuna, llakikuymanta waqaychis. Chay barriopi llapallan negociota ruwaqkunan destruisqa kanqaku. Qolqewan llapa negocio ruwaq runakunan chinkachisqa kanqaku.

¹² Chay p'unchaw chayamuqtinqa lamparata hap'ispan, Jerusalén llaqtapi tiyaqkunata k'uchun-k'uchun mashkasaq. Noqaqa vinopa qonchun hina hawka tiyaq runakunatan castigasaq. Paykunaqa sonqonkupin khaynata ninku: “Señor Diosqa allintapas nitaq mana allintapas manan ruwanchu”, nispanku.

¹³ Chayraykun qapaq kayninkupas qechusqa kanqa. Wasinkupas lliw destruisqan kanqa. Wasikunata ruwakuspankupas, chaypiqa manan tiyanqakuchu. Uvaskunata plantaspankupas, vinotaqa manan tomanqakuchu, nispa.

¹⁴ Señor Diospa ancha castiganan p'unchawqa ñan chayaykamushanña. Chay p'unchawqa apurayllamanñan chayamushan. Chay p'unchawqa ancha mancharikuypaqmi kanqa. Chay p'unchawqa allin valiente soldadokunapas anchata llakikuspankun qaparinqaku.

¹⁵ Chay p'unchawqa Señor Diospa anchata phiñakusqan p'unchawmi kanqa. Chay p'unchawqa ñak'ariy, sasachakuy, thuñichisqa kay, destruisqa kay, tutayay p'unchaw, limboyay p'unchaw hinallataq yana phuyuq tapaykusqan p'unchawmi kanqa.

¹⁶ Chay p'unchawqa trompetapa waqasqanmi uyarikunqa. Soldadokunapas allin murallasqa llaqtapa contranpin qaparinqaku. Alto torrekunapa contranpi qapariymi uyarikunqa.

¹⁷ Señor Diosqa khaynatan nillantaq: —Chay p'unchawqa runakunatan ñak'arichisaq. Paykunaqa noqa Señor Diospa contraypi huchallikusqankuraykun, ñawsa hina purinqaku. Yawarninkupas allpapa polvon hinan hich'asqa kanqa. Cuerponkupas aka hinan monto-monton wikapasqa kanqa.

¹⁸ Noqa Señor Diospa phiñakuyniy p'unchawkunapiqa manan pitapas qorinqa nitaq qolqenpas salvanqachu. Phiñakuyniyqa nina hinaraqmi kay pachataqa rupharunqa. Kay pachapi tiyaq llapallan runakunaqa huk ratollapin mana imaman tukuchisqa kanqaku, nispa.