Proverbios 1 - Ñawpaq Testamento Apurímac Llaqtanchispaq Este nisqa Lawpaq

Proverbios nisqa rimaykuna imapaqsi escribisqa kasqanmanta

¹ Yachaywan rimaykunaqa Davidpa wawan Salomonpa rimayninmi. Payqa Israel *nacionpa *reyninmi karan.

² Kaykunaqa yachayta hinallataq yachachikuyta entiendenapaqmi. Kaykunaqa yachaywan rimasqankuta yuyaymanaspa entiendenapaqmi,

³ allin yachachikuyta chashkinapaqmi; allin yachaywan imatapas ruwanapaqmi; allin kaqta imatapas ruwanapaqmi; allin justicia ruwanapaqmi; mana piman sayapakuspa imapas ruwanapaqmi;

⁴ mana experienciayoq humilde runakunata yachayniyoqman tukuchinapaqmi; jovenkunatapas allin yachayniyoqman hinallataq allin yuyayniyoqman tukuchinapaqmi.

⁵ Yachayniyoq runaqa kaykunata uyarispanmi, aswan más yachayniyoqraq kanqa. Allin yuyayniyoq runapas kaykunata uyarispanmi, aswan más yuyayniyoqraq kanqa,

⁶ saynapi yachaywan yachachikuykunata hinallataq willakuykunatapas allinta entiendenanpaq, saynallataq yachaywan rimaykunata hinallataq watuchikunatapas allinta entiendenanpaq.

⁷ Yachaypa qallariyninqa manchakuywan Señor Diosta kasukuymi. Ichaqa mana yachayniyoq runakunaqa yachayta hinallataq yachachikuytan desprecianku.

Jovenkunapaq consejokunamanta

⁸ Wawalláy, papaykipa corregisusqaykitayá allinta uyariy. Amayá mamitaykipa yachachisusqaykitapas despreciaychu.

⁹ Paykunapa yachachisusqaykiqa umaykipin huk sumaq corona hina kanqa. Kunkaykipin huk sumaq collar hina kanqa.

¹⁰ Wawalláy, sichus huchasapa runakuna engañayta munasunki chayqa, amayá paykunawanqa convencechikunkichu.

¹¹ Sichus paykuna khaynata nisunkiku: “Hakuchiyá runata wañuchimunapaq suyapakamusun. Inocente runatayá yanqapuni wañuchimusun.

¹² Imaynan sepultura millp'un, saynataraqyá kawsashaqllata millp'urparisun. Imaynan wañusqakunapa kasqan t'oqopas millp'un, saynataraqyá millp'urparisun.

¹³ Saynapin tukuy imaymanayoq qapaq kasunchis. Chay qechumusqanchiswanmi wasinchisman hunt'achisunchis.

¹⁴ Hamuy; noqaykuman juntakamuy. Qanmanmi rakiykusqaykiku tukuy ima qechumusqaykuta”, nispa nisunkiku chayqa,

¹⁵ wawalláy, amayá paykunawanqa riychu. Aswanqa paykunamanta t'aqakuspayá karunchakuy.

¹⁶ Paykunaqa mana allin ruwayllamanmi rinku. Paykunaqa apurayllamanmi runa wañuchiq rinku.

¹⁷ Llapallan pichinkukunapa rikusqanqa yanqapaqmi toqllataqa churanku.

¹⁸ Ichaqa chay runakunaqa kikillankupaqmi toqllataqa churakunku. Chay toqlla churasqankupin wañuyta tarinqaku.

¹⁹ Saynatan mana llank'asqankumanta qolqeta ganaq runakunaqa tukukunqaku. Chay nishuta munapayasqankun wañuyman apanqa.

Yachayta tarinamanta

²⁰ Yachaymi callekunapi waqyakachakushan. Yachayqa plazakunapin altota qaparishan.

²¹ Yachayqa ashka runakunapa huñunakunanpin qaparishan. Yachayqa llaqtaman haykuna punkukunapin khaynata nishan:

²² “Mana yachayniyoq roqro uma jovenkuna, ¿hayk'aqkamataq mana yachayniyoqri kankichís? ¿Hayk'aqkamataq asikuspari burlakunkichís? ¿Hayk'aqkamataq yachaytari cheqnikunkichís?

²³ Kay q'aqchaspa rimasqaykunatayá uyariwaychis. Noqaqa qankunapaqmi sonqoyta kicharisaq. Noqaqa piensasqaykunatan yachachisqaykichis.

²⁴ Noqaqa qankunatan waqyamuraykichis. Ichaqa manan qankunaqa uyariwarankichishchu. Makiyta haywarimuqtiypas, qankunaqa manan cuentatapas ruwawarankichishchu.

²⁵ Aswanmi tukuy ima consejasqaykunata rechazarankichis. Q'aqchaspa rimapayasqaykunatapas manan kasukurankichishchu.

²⁶ Chaymi noqapas qankuna ñak'ariqtiykichis asikusaq. Manchakuy chayamusuqtiykichismi qankunamanta burlakusaq.

²⁷ Parantin wayrantin hina manchakuy hamusuqtiykichismi asikusaq. Muyuriq wayra hina sasachakuy hamusuqtiykichismi kusikusaq.

²⁸ Chay p'unchawpi waqyakamuwankichis. Ichaqa manan noqaqa uyarisqaykichishchu. Tutallanmantan mashkawankichis. Ichaqa manan tariwankichishchu.

²⁹ Qankunaqa yachaytan cheqnikurankichis. Manan Señor Diosta manchakuytaqa munarankichishchu.

³⁰ Qankunaqa manan consejasqaykunataqa chashkikurankichishchu. Aswanmi q'aqchasparaq yachachisqaykunatapas despreciarankichis.

³¹ Qankunaqa ruwasqaykichisman hinan chashkinkichis. Qankunaqa mana allin ruwasqaykichiswanmi amirunkichis.

³² Mana yachayniyoq runataqa mana yachayniyoq kasqanmi wañuchinqa. Mana yuyayniyoq runataqa mana allinta piensaspa ruwasqanmi mana imaman tukuchinqa.

³³ Ichaqa noqata uyariwaqniymi hawkalla kawsakunqa. Mana allinkunata mana manchakuspanmi hawkalla kawsakunqa”, nispa.