Números 1 - Ñawpaq Testamento Apurímac Llaqtanchispaq Este nisqa Lawpaq

Israelpa miraynin runakuna censasqa kasqankumanta

¹ 28 Israelpa miraynin runakuna Egipto nacionmanta lloqsimusqankupa ishkay wata qallarisqan, ishkay kaq killa qallariynin p'unchawpin Señor Diosqa Moisesta rimapayamuran. Chaytaqa rimapayamuran Sinaí nisqa ch'inñeq desierto lugarpin *tabernáculo templo ukhupin. Hinaspan khaynata niran:

² —Israelpa miraynin llapallan runakunata censaspa yupay ayllunkuman hina, familiankuman hina, saynapi hayk'as llapallan qarikuna kasqanta hinallataq sutinkutapas yachanaykipaq.

³ Qanqa Aaronpiwan kushkan yupankichis ishkay chunka watayoqmanta wichayman guerrapi peleanankupaq hina kaq qarikunata. Hinaspan paykunataqa pertenecesqanku grupoman hina padronankichis.

⁴ Kay censopi runakunata yupanaykichispaqqa sapankama *ayllumantan huk familiapa jefen yanapasunkichis.

⁵ Kay runakunan censopi yupaytaqa yanapasunkichis: Rubén ayllumanta: Sedeur sutiyoq runapa wawan Elisur;

⁶ Simeón ayllumanta: Zurisadai sutiyoq runapa wawan Selumiel;

⁷ Judá ayllumanta: Aminadab sutiyoq runapa wawan Naasón;

⁸ Isacar ayllumanta: Zuar sutiyoq runapa wawan Natanael;

⁹ Zabulón ayllumanta: Helón sutiyoq runapa wawan Eliab;

¹⁰ Joseypa wawan Efraín ayllumanta: Amiud sutiyoq runapa wawan Elisama; Joseypa wawan Manasés ayllumanta: Pedasur sutiyoq runapa wawan Gamaliel;

¹¹ Benjamín ayllumanta: Gedeoni sutiyoq runapa wawan Abidán;

¹² Dan ayllumanta: Amisadai sutiyoq runapa wawan Ahiezer;

¹³ Aser ayllumanta: Ocrán sutiyoq runapa wawan Pagiel;

¹⁴ Gad ayllumanta: Deuel sutiyoq runapa wawan Eliasaf;

¹⁵ Neftalí ayllumanta: Enán sutiyoq runapa wawan Ahira, nispa.

¹⁶ Chay runakunan Israelpa miraynin runakunamanta akllasqa jefekunaqa karanku. Paykunaqa sapankamankun ayllunkupi jefe karanku. Hinaspapas paykunaqa gruponkupi ashka runakunata kamachiqkunan karanku.

¹⁷ Chay akllasqan runakunatan Moisesqa Aaronpiwan huñuranku, paykunata yupayta yanapanankupaq.

¹⁸ Hinaspan huñuranku Israelpa miraynin llapallan runakunata ishkay kaq killapa qallariynin p'unchawpi. Hinaspan Israelpa miraynin runakunaqa ch'ulla-ch'ullallamanta padronasqa karanku ayllunkuman hina hinallataq familiankuman hina. Llapallan qarikunapa sutinkun padronasqa karan, ishkay chunka watankumanta wichayman.

¹⁹ Moisesqa Señor Diospa kamachisqanman hinan, chay censotaqa ruwaran Sinaí nisqa ch'inñeq desierto lugarpi.

²⁰ Chay censopi yupasqankuqa khaynan karan: Israelpa kurak kaq qari wawan Rubenpa ayllunmantan yupasqa karanku mirayninkuman hina hinallataq familiankuman hina. Llapallan qarikunan sutinkuman hina ch'ulla-ch'ullallamanta padronasqa karanku, ishkay chunka watankumanta wichayman guerraman rinankupaq hina kaq qarikuna.

²¹ Rubén ayllumantan 46,500 qarikuna karanku.

²² Simeonpa ayllunmantan yupasqa karanku mirayninkuman hina hinallataq familiankuman hina. Llapallan qarikunan sutinkuman hina ch'ulla-ch'ullallamanta padronasqa karanku, ishkay chunka watankumanta wichayman guerraman rinankupaq hina kaq qarikuna.

²³ Simeón ayllumantan 59,300 qarikuna karanku.

²⁴ Gadpa ayllunmantan yupasqa karanku mirayninkuman hina hinallataq familiankuman hina. Llapallan qarikunan sutinkuman hina ch'ulla-ch'ullallamanta padronasqa karanku, ishkay chunka watankumanta wichayman guerraman rinankupaq hina kaq qarikuna.

²⁵ Gad ayllumantan 45,650 qarikuna karanku.

²⁶ Judapa ayllunmantan yupasqa karanku mirayninkuman hina hinallataq familiankuman hina. Llapallan qarikunan sutinkuman hina ch'ulla-ch'ullallamanta padronasqa karanku, ishkay chunka watankumanta wichayman guerraman rinankupaq hina kaq qarikuna.

²⁷ Judá ayllumantan 74,600 qarikuna karanku.

²⁸ Isacarpa ayllunmantan yupasqa karanku mirayninkuman hina hinallataq familiankuman hina. Llapallan qarikunan sutinkuman hina ch'ulla-ch'ullallamanta padronasqa karanku, ishkay chunka watankumanta wichayman guerraman rinankupaq hina kaq qarikuna.

²⁹ Isacar ayllumantan 54,400 qarikuna karanku.

³⁰ Zabulonpa ayllunmantan yupasqa karanku mirayninkuman hina hinallataq familiankuman hina. Llapallan qarikunan sutinkuman hina ch'ulla-ch'ullallamanta padronasqa karanku, ishkay chunka watankumanta wichayman guerraman rinankupaq hina kaq qarikuna.

³¹ Zabulón ayllumantan 57,400 qarikuna karanku.

³² Joseypa wawankunan ishkay karanku. Joseypa sullk'a kaq wawan Efrainpa ayllunmantan yupasqa karanku mirayninkuman hina hinallataq familiankuman hina. Llapallan qarikunan sutinkuman hina ch'ulla-ch'ullallamanta padronasqa karanku, ishkay chunka watankumanta wichayman guerraman rinankupaq hina kaq qarikuna.

³³ Efraín ayllumantan 40,500 qarikuna karanku.

³⁴ Joseypa kurak kaq wawan Manasespa ayllunmantan yupasqa karanku mirayninkuman hina hinallataq familiankuman hina. Llapallan qarikunan sutinkuman hina ch'ulla-ch'ullallamanta padronasqa karanku, ishkay chunka watankumanta wichayman guerraman rinankupaq hina kaq qarikuna.

³⁵ Manasés ayllumantan 32,200 qarikuna karanku.

³⁶ Benjaminpa ayllunmantan yupasqa karanku mirayninkuman hina hinallataq familiankuman hina. Llapallan qarikunan sutinkuman hina ch'ulla-ch'ullallamanta padronasqa karanku, ishkay chunka watankumanta wichayman guerraman rinankupaq hina kaq qarikuna.

³⁷ Benjamín ayllumantan 35,400 qarikuna karanku.

³⁸ Danpa ayllunmantan yupasqa karanku mirayninkuman hina hinallataq familiankuman hina. Llapallan qarikunan sutinkuman hina ch'ulla-ch'ullallamanta padronasqa karanku, ishkay chunka watankumanta wichayman guerraman rinankupaq hina kaq qarikuna.

³⁹ Dan ayllumantan 62,700 qarikuna karanku.

⁴⁰ Aserpa ayllunmantan yupasqa karanku mirayninkuman hina hinallataq familiankuman hina. Llapallan qarikunan sutinkuman hina ch'ulla-ch'ullallamanta padronasqa karanku, ishkay chunka watankumanta wichayman guerraman rinankupaq hina kaq qarikuna.

⁴¹ Aser ayllumantan 41,500 qarikuna karanku.

⁴² Neftalipa ayllunmantan yupasqa karanku mirayninkuman hina hinallataq familiankuman hina. Llapallan qarikunan sutinkuman hina ch'ulla-ch'ullallamanta padronasqa karanku, ishkay chunka watankumanta wichayman guerraman rinankupaq hina kaq qarikuna.

⁴³ Neftalí ayllumantan 53,400 qarikuna karanku.

⁴⁴ Kay llapallan runakunatan Moisesqa Aaronpiwan hinallataq Israelpa miraynin ayllukunamanta akllasqanku chunka ishkayniyoq jefekunapiwan censaspa yuparanku.

⁴⁵ Israelpa mirayninmanta runakunaqa llapallankun yupasqa karanku ayllunkuman hina hinallataq familiankuman hina. Llapallan qarikunan sutinkuman hina padronasqa karanku, ishkay chunka watankumanta wichayman guerraman rinankupaq hina kaq qarikuna.

⁴⁶ Israelpa mirayninmanta llapallanpiqa 603,550 qarikunan karanku.

Leví ayllu runakunaqa mana yupasqa kasqankumanta

⁴⁷ Leví ayllumanta kaq runakunaqa manan wakin ayllukunawan kushkachu yupasqa karan.

⁴⁸ Moisesta Señor Dios khaynata nisqanrayku:

⁴⁹ —Israelpa miraynin runakunata censaspaqa, aman Leví ayllutaqa yupankichishchu.

⁵⁰ Aswanmi paykunataqa churanki *tabernáculo templota hinallataq chaypi tukuy ima kaqkunatapas cuidaspa waqaychanankupaq. Paykunan tabernáculo templota hinallataq chay templopi tukuy ima kaqkunatapas astanqaku. Paykunaqa tabernáculo templota cuidaspankun noqa Señor Diosta serviwanqaku. Hinaspapas chay tabernáculo templopa muyuriqninpin paykunaqa carpankutapas armakunqaku.

⁵¹ Tabernáculo templota astana kaqtinqa, Leví ayllumanta runakunan pashkaspa astanqaku. Saynallataqmi maypi samaqtiykichispas, paykunan tabernáculo templotaqa armanqaku. Sichus pipas, mana Leví ayllumanta kashaspa, tabernáculo temploman ashuyunqa chayqa, chay runaqa wañuchisqan kanqa.

⁵² Ichaqa Israelpa mirayninmanta kaq wakin ayllukunaqa sapankamankun campamentonkupi samanqaku. Paykunaqa mayqen grupoman pertenecesqankuman hinan banderankupa kasqanpi kanqaku.

⁵³ Ichaqa Leví ayllumanta kaq runakunaqa tabernáculo templopa muyuriqninpin carpankuta armanqaku. Hinaspan paykunaqa tabernáculo templota cuidanqaku. Saynapin Señor Diosninchisqa Israelpa miraynin runakunapaqqa mana phiñakunqachu, nispa.

⁵⁴ Hinaqtinmi Israelpa miraynin runakunaqa Moisesman Señor Diospa kamachisqanman hina ruwaranku.