Miqueas 1 - Ñawpaq Testamento Apurímac Llaqtanchispaq Este nisqa Lawpaq

Samaria llaqta hinallataq Jerusalén juzgasqa kananmanta

¹ Judá *nacionpin gobiernaran *rey Jotam, chaymantataq rey Acaz, chaymantañataq rey Ezequías. Chay tiempokunapin Señor Diosqa Moreset nisqa llaqtayoq Miqueasta rimapayaran. Hinaspan huk *visionpi rikuchiran Samaria llaqtata hinallataq Jerusalén llaqtatapas imas pasananmanta.

² Kay allpa pachapi llapallan tiyaq runakuna, kayta allinta uyariychis. Señor Diosqa ch'uya *templonmantapachan qankunapa contraykichispi huk testigo kanqa.

³ Señor Diosqa maypi kasqan lugarmantan lloqsimunqa. Payqa uraykamuspanmi orqonkunanta purispa hamunqa.

⁴ Purispa saruqtinmi chay orqokunaqa chullurinqa, imaynan velapas ninapi chullurin chay hinata. Qeshwa pampa uraykunapas, saruqtinmi ishkayman partekunqa, imaynan ashka unupas rispa orqokunata ishkayman rakin chay hinata.

⁵ Tukuy chaykunaqa pasanqa Jacobpa miraynin runakuna mana kasukuspa rebelakusqankuraykun hinallataq Israel nacionniyoq runakuna huchallikusqankurayku iman. ¿May lugarpitaq Jacobpa miraynin runakunapa rebelakuspa huchallikunankurí? Samaria llaqtapin. ¿May lugarpitaq Judá nacionniyoq runakuna *idolonkuta yupaychaspa huchallikunanku alto moqokunapi capillakunarí? Jerusalén llaqtapin.

⁶ Chayraykun Señor Diosqa khaynata nin: —Samaria llaqtataqa destruispaymi monto-monton allpaman tukuchisaq. Hinaspan uvasta plantananku chakramanña tukuchisaq. Ruminkunatapas qeshwa pampa uraymanmi ch'eqechisaq. Cimentacionninkunatapas alayrimanmi orqosaq.

⁷ Llapallan *idolonkunapas ñut'u ruwasqan kanqa. Chay idolonkunata yupaychananku templopi huñusqanku regalokunapas ninawan k'anasqan kanqa. Chaykunaqa ruwasqa karan qenlli vidapi puriq rabona warmikunaman pagasqankuwanmi. Sayna ganasqankuqa qenlli vidapi puriq warmikunallamantaqmi pagasqa kanqa, nispa.

Miqueaspa waqasqanmanta

⁸ Noqa Miqueasmi khaynata nirani: Noqaqa llakikuymantan qaparispa waqasaq. Hinaspan q'ala chakilla hinallataq mana p'achayoq ima purisaq. Noqaqa atoq hina chacal nisqa animal hinaraqmi awllasaq. *Avestruz animal hinaraqmi qaparqachasaq.

⁹ Samaria llaqtapa k'irinqa mana hampiy atinan. Chay k'iripa nanayninqa Judá nacionniymanraqmi chayarun. Saynallataqmi chay k'iripa nanayninqa Jerusalén llaqtaypa punkunkamaraq chayarun.

¹⁰ Chaytaqa amayá Gat llaqtapi tiyaq runakunamanqa willaychishchu; nitaqyá nishutaqa waqaychishchu. Aswanyá Bet-le-afra nisqa llaqtapa polvo allpanpi qoshpaychis.

¹¹ Safir llaqtapi tiyaq runakuna, q'alallañayá p'enqakuymanta huk lawman riychis. Zaanán llaqtapi tiyaq runakunaqa manan lloqsimunqakuchu yanapasunaykichispaqqa. Betesel llaqtapipas waqayllañan kashan; manan qankunataqa yanapasunkichishchu.

¹² Marot llaqtapi tiyaq runakunaqa nanaymanta q'ewikachakuspankun allin kayta suyakushanku. Ichaqa Señor Diosmi hatun llakita Jerusalén llaqtapa punkunkamaraq mandaramun.

¹³ Laquis llaqtapi tiyaq runakuna, caballokunamanyá carretakunata wataychis. Qankunan Sión llaqtapi tiyaq runakunataqa huchallichiyta qallarirankichis. Qankunan Israel nacionniyoq runakunataqa huchallikuyta yachachirankichis.

¹⁴ Chayraykun Moreset-gat llaqtapi tiyaq runakunamanqa despedispa regalokunata qonki. Aczib llaqtapi tiyaq runakunaqa Israel nacionpi gobiernaq *reypaqmi huk trampa hina kanku, engañaq runakuna kasqankurayku.

¹⁵ Señor Diosmi khaynata nin: —Maresa llaqtapi tiyaq runakuna, qankunata vencespa dueñochakusuqniykichis runakunatan mandamusaq. Chaymi Israel nacionpi importante kaq runakunaqa Adulam nisqa orqopi kaq mach'aykunaman pakakuq ayqekunqaku.

¹⁶ Judá nacionniyoq runakuna, qankunapa wawaykichiskunan huk law nacionman preso apasqa kanqaku. Chayraykuyá llakikuymanta barbaykichista razurakuychis; saynallataq chukchaykichistapas p'aqlay-p'aqlata rutuchikuychis.