Jonás 1 - Ñawpaq Testamento Apurímac Llaqtanchispaq Este nisqa Lawpaq

Jonás Señor Diosta mana kasukuspa ayqekusqanmanta

¹ Amitai sutiyoq runapa wawan Jonastan Señor Dios khaynata niran:

² —Hatariy; hinaspa hatun Nínive llaqtaman riy. Hinaspa chay llaqtapa contranpi willamuy. Paykunapa mana allinkuna ruwasqankun noqapa ñawpaqniyman chayaramun, nispa.

³ Ichaqa Jonasqa mana kasukuspan, Señor Diosmanta Tarsis llaqtaman ayqekunanpaq, Jope llaqtaman uraykuran. Payqa Tarsis llaqtaman riq barcota tariruspanmi chay barcopi viajananpaq pasajenta rantikuran, saynapi Señor Diosmanta ayqekunanpaq.

⁴ Ichaqa Señor Diosmi *lamar qochapi wayrata nishuta hatarichimuran. Hinaqtinmi nishuta wayramusqanrayku barcoqa p'akirukunanpaq hinaña karan.

⁵ Barcota manejaq marinerokunataqmi anchallataña mancharikuspanku sapankamanku qaparisparaq diosninkumanta mañakuranku. Hinaspan paykunaqa barcopi cargakunatapas manaña llasananpaq lamar qochaman wikch'uyuranku. Ichaqa Jonastaqmi barcopa cargakuna apanan ukhu lawninman haykuruspa chaypi puñukusharan.

⁶ Chaymi barcopa capitanninqa Jonasman ashuyuspa khaynata niran: —Yaw puñuysiki, ¿qanri imatataq ruwashankí? ¡Hatariy. Hinaspa Diosniykimanta mañakuy! Icharaqpas pay khuyapayaykuwasunman, saynapi ama chinkaykunanchispaq, nispa.

⁷ Hinaqtinmi barcopi marinerokunaqa paykunapura khaynata ninakuranku: —Aswanyá hamuychis; hinaspa sorteasunchis pipa huchanmantas kay mana allinkuna pasawashanchis chayta yachananchispaq, nispanku. Hinaqtinmi paykunaqa saynata ruwaranku. Chaymi chay sorteasqankuman hinaqa Jonás culpayoq rikhuriran.

⁸ Chaymi Jonastaqa khaynata tapuranku: —Kunanyá niwayku ¿imanaqtintaq kay sasachakuykunari noqanchisman hamuwashanchís? ¿Qanri imapitaq llank'ankí? ¿Maymantataq hamushankirí? ¿May nacionmantataq kankirí? ¿May llaqtamantataq kankirí? nispanku.

⁹ Hinaqtinmi Jonasqa khaynata contestaran: —Noqaqa Hebreo rimaq, Israel nacionniyoq runan kani. Hinaspapas noqaqa hanaq pacha cielota, lamar qochata hinallataq kay pachatapas unanchaq Diosta, manchaykuywan yupaychaqmi kani, nispa.

¹⁰ Hinaqtinmi chay marinero runakunaqa chay willakusqanmanta uyariruspanku anchata mancharikuranku. Hinaspan khaynata niranku: —¿Imanaqtintaq kaytari ruwarunkí? nispanku. Saynataqa tapuranku Señor Diospa ñawpaqninmanta ayqekamusqanmanta Jonás willakuqtin, yacharusqankuraykun.

¹¹ Hinaqtinmi paykunaqa lamar qocha astawanraq oqarikuqtin Jonasta khaynata tapuranku: —¿Imatataq qanwanri ruwasaqku lamar qocha thañinanpaqrí? nispanku.

¹² Chaymi Jonasqa khaynata niran: —Lamar qochaman wikch'uykuwaychis. Chaymi lamar qochaqa thañinqa. Noqaqa allintan yachani noqapa culpayrayku lamar qochapi wayra parantin qankunapa contraykichispi hatarisqanmantaqa, nispa.

¹³ Chay marinerokunaqa barcotan lamar qochapa patanpi kaq ch'aki allpaman chayachiyta munaranku. Chaymi paykunaqa tukuy kallpankuwan remaranku. Ichaqa manan ch'aki allpaman chayachiytaqa atirankuchu, lamar qocha astawanraq qalchikuspa oqarikusqanrayku.

¹⁴ Hinaqtinmi chay marinerokunaqa Señor Diosmanta mañakuspanku khaynata niranku: —Señor, kunanmi ruegakuykiku, amayá kay runapa vidanmantaqa noqaykutapas wañurachiwaykuchu. Mana huchayoq kaqtinqa amayá noqaykuqa paypa yawarninmantaqa culpayoqchu kasaqku. Señor Dios qanqa munasqaykiman hinan imatapas ruwanki, nispanku.

¹⁵ Saynata nispankun Jonastaqa hap'ispanku lamar qochaman wikch'uykuranku. Hinaqtinmi lamar qochapa phiñakuyninqa thañiran.

¹⁶ Chayta rikuspankun chay marinerokunaqa Señor Diosta anchata manchakuranku. Hinaspan paykunaqa Señor Diosman *sacrificio ofrendakunata ofreceranku. Saynallataqmi prometekuranku payta yupaychanankupaqpas.

¹⁷ Chaymi Señor Diosqa huk hatunkaray challwata kamachiran Jonasta millp'unanpaq. Hinaqtinmi Jonasqa kinsa tuta hinallataq kinsa p'unchaw ima chay challwapa wiksanpi karan.