Génesis 1 - Ñawpaq Testamento Apurímac Llaqtanchispaq Este nisqa Lawpaq

Dios tukuy imaymanata unanchasqanmanta

¹ Diosqa qallariyninpin hanaq pachata hinallataq kay pachatapas unancharan.

² Qallariypiqa kay pachaqa mana formayoq hinallataq mana imayoq ch'usaqmi karan. Tutayaq ch'ak limbotaqmi pakaykuran ukhu-ukhupi unukunata. Diospa Espirituntaqmi unu hawapi kay lawman waq lawman muyuran.

³ Hinaqtinmi Diosqa niran: —¡K'anchay kachun! nispa. Chaymi k'anchay karan.

⁴ Hinaspan Diosqa qawariran chay k'anchayqa allin kasqanta. Hinaspan chay k'anchayta tutayaqmanta rakiran.

⁵ Chay k'anchaytan Diosqa suticharan “p'unchaw” nispa. Chay tutayaq limbotataqmi Diosqa suticharan “tuta” nispa. Hinaqtinmi tutayaykuran hinallataq achikhamuranpas. Chay p'unchawmi primer kaq p'unchaw karan.

⁶ Chaymantan Diosqa niran: —Unukunata rakinanpaqyá chay unukunapa chawpinpi huk ch'usaq kachun, saynapi chay unukunata chay ch'usaq rakinanpaq, nispa.

⁷ Chaymi sayna ruwasqa karan. Diosmi chay ch'usaqtaqa ruwaran. Chay ch'usaqmi unukunata rakiran, wakin unukuna altopi kananpaq, wakin unukunataq allpa hawapi kananpaq.

⁸ Diosqa chay ch'usaq unanchasqantan suticharan “cielo”, nispa. Hinaqtinmi tutayaykuran hinallataq achikhamuranpas. Chay p'unchawmi ishkay kaq p'unchaw karan.

⁹ Chaymantan Diosqa nillarantaq: —Cielopa pachanpi kaq unukuna huk hawallaman huñukuchun, saynapi ch'aki allpa rikhurinanpaq, nispa. Saynata Dios niqtinmi sayna ruwasqa karan.

¹⁰ Ch'aki kaqtan Diosqa suticharan “allpa”, nispa. Unukunapa huñukusqantataqmi suticharan “*lamar qocha” nispa. Hinaspan Diosqa qawariran chay unanchasqanqa allin kasqanta.

¹¹ Chaymantan Diosqa nillarantaq: —Tukuy clase plantakuna kay pachapi wiñachun, mukhuyoq plantakuna hinallataq rurunpi mukhuyoq sach'akunapas, nispa. Chaymi sayna ruwasqa karan.

¹² Chay allpapin wiñamuran tukuy clase plantakuna. Mukhuyoq plantakuna hinallataq rurunpi mukhuyoq sach'akunapas. Chay sach'akunaqa unanchasqa karan clasenman hinan. Hinaspan Diosqa qawariran chay unanchasqanqa allin kasqanta.

¹³ Hinaqtinmi tutayaykuran hinallataq achikhamuranpas. Chay p'unchawmi kinsa kaq p'unchaw karan.

¹⁴ Chaymantan Diosqa nillarantaq: —Cielopi k'anchaykuna kachun, p'unchawta tutamanta rakinanpaq. Chay k'anchaykunan huk señal hina kanqa, imay tiempos, imay p'unchawsi, imay watas kasqanta runakuna yachanankupaq.

¹⁵ Hinaspapas chay k'anchaykunaqa cielopiyá kachun, chaymanta allpa pachata k'anchananpaq, nispa. Chaymi sayna ruwasqa karan.

¹⁶ Diosmi ruwaran ishkay hatun k'anchaqkunata: intita p'unchawpi k'anchananpaq, killatataq tutapi k'anchananpaq. Hinaspapas Diosqa ruwallarantaqmi qoyllurkunatapas.

¹⁷ Hinaspan Diosqa chay ruwasqan k'anchaykunata cielopi churaran, chaymanta kay allpa pachata k'anchananpaq.

¹⁸ Diosmi chay k'anchaykunataqa churaran, p'unchawta hinallataq tutatapas k'anchaspa munaychakunanpaq hinallataq k'anchayta tutamanta rakinanpaq ima. Hinaspan Diosqa qawariran chay ruwasqanqa allinpuni kasqanta.

¹⁹ Hinaqtinmi tutayaykuran hinallataq achikhamuranpas. Chay p'unchawmi tawa kaq p'unchaw karan.

²⁰ Chaymantan Diosqa nillarantaq: —Lamar qochapi tukuy clase animalkuna kachun. Saynallataq kay pachapipas alton phawaq tukuy clase animalkuna kachun, nispa.

²¹ Diosmi unancharan lamar qochapi kawsaq hatunkaray animalkunata hinallataq lamar qochapi kawsaq tukuy clase huk animalkunatapas. Saynallataqmi Diosqa alton phawaq tukuy clase animalkunatapas unancharan. Hinaspan Diosqa qawariran chay unanchasqanqa allin kasqanta.

²² Hinaspan Diosqa chay unanchasqankunata bendeciran khaynata: —Lamar qochapi kawsaqkuna ashkaman miraychis; hinaspa lamar qochaman hunt'aychis. Saynallataq alton phawaq animalkunapas ashkaman miraspa, kay pachaman hunt'aychis, nispa.

²³ Hinaqtinmi tutayaykuran hinallataq achikhamuranpas. Chay p'unchawmi pishqa kaq p'unchaw karan.

²⁴ Chaymantan Diosqa nillarantaq: —Tukuy animalkuna clasenman hina allpa pachapi rikhurichun: salqa animalkuna, uywana animalkuna hinallataq qasqonpallan puriq animalkunapas, nispa. Chaymi sayna ruwasqa karan.

²⁵ Saynatan Diosqa ruwaran tukuy clase animalkunata: salqa animalkunata, uywana animalkunata hinallataq qasqonpallan puriq animalkunatapas. Hinaspan Diosqa qawariran chay ruwasqanqa allin kasqanta.

²⁶ Chaymantan Diosqa nillarantaq: —Runata ruwasunchis noqanchispa rikch'ayninchisman rikch'akuqta. Hinaspa chay runa dominachun lamar qochapi kawsaq llapallan animalkunata, alton phawaq animalkunata, salqa animalkunata, uywana animalkunata hinallataq qasqonpallan puriq animalkunatapas, nispa.

²⁷ Diosmi runataqa rikch'ayninman rikch'ayniyoqta unancharan. Qarita warmitan unancharan.

²⁸ Hinaspan Diosqa paykunata bendeciran khaynata: —Wawayoq kaychis; hinaspa ashkaman miraychis. Kay pachaman hunt'aychis; hinaspa tukuy unanchasqakunata gobiernaychis. Dominaychis lamar qochapi tukuy animalkunata, alton phawaq animalkunata hinallataq kay allpa pachapi tukuy clase animalkunatapas, nispa.

²⁹ Hinaspapas Diosqa nillarantaqmi: —Qankunamanmi qoykichis mukhuyoq llapallan plantakunata hinallataq rurunpi mukhuyoq llapallan sach'akunatapas. Tukuy chay plantakunamantayá mikhuychis alimentakunaykichispaq.

³⁰ Ichaqa salqa animalkunamanqa, alton phawaq animalkunamanqa hinallataq qasqonpallan puriq animalkunamanpas, tukuy kay pachapi wiñaq verde qorakunatan qoni, chaykunata mikhuspa kawsanankupaq, nispa. Chaymi sayna ruwasqa karan.

³¹ Chaymantan Diosqa tukuy unanchasqanta qawarispa niran: “ancha allinpunin”, nispa. Hinaqtinmi tutayaykuran hinallataq achikhamuranpas. Chay p'unchawmi soqta kaq p'unchaw karan.