Ester 6 - Ñawpaq Testamento Apurímac Llaqtanchispaq Este nisqa Lawpaq

Mardoqueoq ñawpaqninpi Amán humillasqa kasqanmanta

¹ *Rey Asueroqa chay tutan mana puñuyta atiranchu. Chayraykun kamachiran gobiernasqan nacionpi tukuy imakuna pasasqanmanta escribisqa kaq librota apamunankupaq, hinaspa chay librota ñawpaqninpi leenankupaq.

² Hinaspan chay libropi tariranku imaynatas reypa palacion punkuta cuidaq eunuco Bigtán hinallataq Teres sutiyoq eunuco runapas, rey Asueropa contranpi hatarispanku, wañuchiyta munasqankumanta hinallataq Mardoqueo chaykunamanta willasqantapas.

³ Chaymi reyqa khaynata tapuran: —¿Mardoqueomanri imatataq chay ruwasqanmantari qorankú? ¿Yaqachu paytari imallawanpas hatuncharankú? nispa. Hinaqtinmi reyta serviq autoridadkunaqa contestaranku: —Manan ni imatapas paymanqa qorankuchu, nispanku.

⁴ Chay ratopin Amanqa Mardoqueota seq'ochinanpaq reymanta autorizacionta mañakuq riran. Hinaspan reypa palacionpa hawa pationpi kashaqtin reyqa serviqninkunata khaynata tapuran: —¿Pitaq palaciopa pationpiri purishan? nispa.

⁵ Hinaqtinmi reypa serviqninkunaqa khaynata contestaranku: —Amanmi patiopiqa purishan, nispanku. Chaymi reyqa niran: —Haykumuchun, nispa.

⁶ Amán haykuramuqtinmi, reyqa khaynata tapuran: —Noqan huk runata hatunchayta munani. ¿Imata ruwaspataq hatunchaymanrí? nispa. Chaymi Amanqa sonqonpi piensaran khaynata: —Reyqa noqatan hatunchawayta munashan. ¿Pitaq kanman noqamanta aswan más importante runarí? nispa.

⁷ Chaymi Amanqa reyta khaynata niran: —Reypa hatunchay munasqan runapaqqa,

⁸ apachimuy reypa p'achankunata. Hatunchay munasqayki runaqa reypa sillakusqan caballonpiyá montachisqa kachun. Saynallataqyá paymanqa reypa umanpi kaq coronatapas churachunku.

⁹ Servisuqniyki runakunamanta aswan más importante kaq runamanyá reypa p'achankunata hinallataq caballotapas entregachunku. Hinaspa reypa hatunchay munasqan runata chay p'achawan p'achachispa hinallataq sillasqa caballopi montayukusqata llaqtapa plaza muyuriqninta aysachun. Runakunataqyá qepanta rispanku, khaynata qaparichunku: “¡Reyqa khaynatan hatunchan, hatunchay munasqan runataqa!”, nispa.

¹⁰ Chaymi reyqa Amán runata khaynata niran: —Apuraymanyá churakunay p'achakunata orqomuy; hinallataq caballoytapas apurayman alistamuy. Hinaspa nisqaykiman hina ruwamuy palaciopa punkunpi tiyaq Judá nacionniyoq Mardoqueowan. Aman qonqankichu tukuy imapas nisqaykiman hina ruwaytaqa, nispa.

¹¹ Hinaqtinmi Amanqa reypa p'achakunan p'achakunawan Mardoqueota p'achachiran. Saynallataqmi reypa caballontapas sillaspa Mardoqueota montachiran. Hinaspan Amanqa llaqtapa plazanta muyuchimuspa, ñawpaqninta runakunata khaynata qaparichistin riran: —Reyqa khaynatan hatunchan, hatunchay munasqan runataqa, nispa.

¹² Chaymantan Mardoqueoqa reypa palacionpa punkunman kutinpuran. Ichaqa Amantaqmi ancha p'enqasqallaña uyanta pakarukuspa apurayllamanña wasinman kutipuran.

¹³ Hinaspan Amanqa chaykuna pasasqanmanta Zeres sutiyoq warminman hinallataq llapallan amigonkunamanpas willakuran. Chaymi Zeresqa hinallataq Amanpa serviqnin autoridadkunapas khaynata niranku: —Sichus chay Mardoqueo Judá nacionmanta kashan chayqa, manan paytaqa venceytaqa atinkichu. Hinaspapas atiyniyoq kasqaykiqa, ñan paypa ñawpaqninpiqa pisichakuyta qallarirunña. Aswanmi kunanqa cheqaqtapuni vencesqa kaspayki urmallankiña, nispa.

¹⁴ Saynata rimallashaqtinkuraqmi, reypa serviqnin eunuco runakunaqa apurayllaña chayaramuranku. Hinaspan Amantaqa reina Esterpa ruwachisqan banqueteman pusaranku.