Ester 5 - Ñawpaq Testamento Apurímac Llaqtanchispaq Este nisqa Lawpaq

Reytawan Amantawan huk banqueteman Ester invitasqanmanta

¹ Kinsa p'unchaw pasaruqtinmi, Esterqa *reina p'achanwan churarukuspa *reypa palacio wasinman riran. Hinaspan palaciopa ukhun lawpi kaq patioman haykuran. Chay patioqa reypa tiyasqan *tronopa ñawpaqninpin karan. Reyqa tiyanan trononpin tiyashasqa, punku haykunapa chimpanpi.

² Hinaqtinmi reyqa reina Ester patiopiña kasqanta rikuruspa, sumaqta qawariran. Hinaspan reyqa gobiernananpaq makinpi hap'isqan qorimanta varanta haywariran. Chaymi Esterqa ashuykuspa varapa puntanta tupaykuran.

³ Hinaqtinmi reyqa khaynata tapuran: —Reina Ester, ¿imataq pasaramusunkirí? ¿Imatataq mañakuwaytari munashankí? Kay gobiernasqay nacionpa kushkantaña mañakuwanki chaypas, noqaqa qosqaykin, nispa.

⁴ Hinaqtinmi Esterqa khaynata contestaran: —Reynilláy, sichus allin parecesunki chayqa, ruegakuykin, kunan p'unchaw huk banquete ruwachisqayman Amanpiwan hamunaykipaq. Noqaqa qanpaqmi huk hatun banqueteta ruwachishani, nispa.

⁵ Hinaqtinmi reyqa serviqninkunata khaynata kamachiran: —Kunanpacha Amanta waqyamuychis, reina Esterpa munasqanman hina banqueteman rinaykupaq, nispa. Chaymi reyqa Amanpiwan reina Esterpa ruwachisqan huk hatun banqueteman riran.

⁶ Vinota tomashaspanmi, reyqa reina Esterta kaqmanta khaynata tapuran: —¿Imatataq mañakuwaytari munashankí? Kay gobiernasqay nacionpa kushkantaña mañakuwanki chaypas, noqaqa qosqaykin, nispa.

⁷ Hinaqtinmi Esterqa khaynata contestaran: —Noqapa mañakuyniyqa hinallataq ruegakuyniyqa kaymi:

⁸ Sichus favorniykita mereceni hinallataq mañakusqayman hina ruwayta munanki chayqa, ruegakuykin Amanpiwan paqarin p'unchaw huk banquete ruwachisqayman kaqmanta kutimunaykipaq. Chaypiñan nisqayki imatachus munasqaytaqa, nispa.

⁹ Amanqa chay p'unchawmi ancha kusisqallaña chay banquetemanta wasinman ripuran. Ichaqa Amanqa Mardoqueotan reypa palacion punkunpi tiyashaqta rikururan. Ichaqa Mardoqueoqa manan paypa ñawpaqninpiqa sayariranchu nitaq k'umuykukuranpashchu. Chaymi Amanqa anchatapuni phiñakuran.

¹⁰ Ichaqa Amanqa ancha phiñasqa kasqantaqa sonqon ukhullapin waqaycharan. Hinaspan wasinman chayaruspa, amigonkunata hinallataq warmin Zerestawan waqyachimuran.

¹¹ Hinaspan paykunapa ñawpaqninpi Amanqa alabakuran qapaq runa kasqanmanta, ashka wawayoq kasqanmanta, tukuy imapi rey hatunchasqanmanta, kamachiq autoridadkunapa hinallataq reyta serviq runakunapa jefen kananpaq rey churasqanmantawan ima.

¹² Hinaspapas Amanqa nillarantaqmi khaynata: —Reina Esterpas reypaq ruwachisqan hatun banquetemanqa noqallatan waqyachiwaran. Saynallataqmi paqarinpas reytawan hinallataq noqallatawan huk hatun banqueteman waqyachiwashanku.

¹³ Ichaqa sichus chay Judá nacionniyoq Mardoqueota reypa palacion punkupi tiyashaqta rikullasaq chayqa, tukuy chaykuna (lograsqayqa) yanqapaqmi kanqa, nispa.

¹⁴ Hinaqtinmi warmin Zeresqa hinallataq llapallan amigonkunapas khaynata niranku: —K'aspita sayachiy ishkay chunka ishkayniyoq metro sayayniyoqta. Hinaspa paqarin p'unchaw tutallamanta reyta valekamuy, Mardoqueota chay k'aspipi seq'ochinanpaq. Saynapin qanqa reypiwan chay hatun banqueteman ancha kusisqallaña rinki, nispa. Chay nisqankuqa Amanpa agradonpaqmi karan. Chaymi payqa hatun k'aspita sayachinankupaq kamachiran, saynapi Mardoqueota warkunankupaq.