Ester 4 - Ñawpaq Testamento Apurímac Llaqtanchispaq Este nisqa Lawpaq

Mardoqueo Esterwan acuerdota ruwasqankumanta

¹ Mardoqueoqa tukuy chaykuna pasasqanta yacharuspanmi, p'achanta llik'ikuspa, qashqa p'achawan churakuran, ancha llakisqallaña kasqanrayku. Hinaspan umanman ushpawan hich'arukuspa, altota qaparispa llaqtapi puriran.

² Sayna p'achawan p'achasqan *reypa gobiernasqan palacio wasipa punkukama chayaran. Ichaqa manan palacio ukhumanqa haykuyta atiranchu, sayna qashqa p'achawan palacio wasinman haykunanpaq mana permitisqa kasqanrayku.

³ Sapankama provinciapi tiyaq Judá nacionniyoq runakunaqa, reypa kamachisqan decretota yacharuspankun, anchata llakikuranku, ayunaranku, waqaranku hinallataq qapariranku. Saynallataqmi ashka runakunapas qashqa p'achakunawan churakuspanku, ushpa hawakunapi puñuranku.

⁴ Chaykuna pasasqantan *reina Esterta serviq warmikunaqa hinallataq *eunuco nisqa sirviente qarikunapas Esterman willaranku. Chaymi payqa anchata llakikuspa, Mardoqueoman p'achata apachiran, chay qashqa p'achata ch'utikuspa cambiakunanpaq. Ichaqa Mardoqueoqa manan cambiakuyta munaranchu.

⁵ Hinaqtinmi reina Esterqa serviqnin eunuco Hatacta waqyachimuran. Reymi Hatactaqa ñawpaqtaraq churaran, reina Esterta serviq runan kananpaq. Hinaspan payta mandaran Mardoqueota khaynata tapumunanpaq: —¿Imataq pasarunrí? ¿Imanaqtintaq kaytari ruwashankí? nispa.

⁶ Hinaqtinmi Hatacqa Mardoqueota tapumunanpaq riran. Mardoqueoqa reypa gobiernanan palacio wasinpa punkunpa chimpan plazapin kasharan.

⁷ Hinaqtinmi Mardoqueoqa eunuco Hatacman willaran tukuy pasasqanmanta. Saynallataqmi willallarantaq Judá nacionniyoq runakuna wañuchisqa kanankupaq, hayk'a qolqetas Amán reypa tesoreronman qoy munasqantapas.

⁸ Saynallataqmi payqa Judá nacionniyoq runakuna llapallan wañuchisqa kanankupaq Susa llaqtapi entregasqanku decretopa huk copiantapas reina Esterman apachiran, saynapi tukuy ima pasasqanmanta allinta yachananpaq, saynapi reypa kasqanman rispa, llaqtamasin Judá nacionniyoq runakuna ama wañuchisqa kananpaq ruegakamunanpaq.

⁹ Hinaqtinmi eunuco Hatacqa reina Esterpa kasqanman kutispa, Mardoqueopa nisqankunata willaran.

¹⁰ Chaymi reina Esterqa Hatacta Mardoqueoman mandaran, khaynata nimunanpaq:

¹¹ “Reyta serviq runakunaqa hinallataq llapallan provinciakunapi tiyaq runakunapas allintan yachanku reypa kamachisqan leykunataqa. Chay leypiqa khaynatan nishan: ‘Pi qaripas otaq pi warmipas reypa mana waqyachisqan kashaspa, reypa palacio wasinpa pationman haykuspa, reyman ashuykuqqa wañuchisqan kanan’, nispa. Ichaqa rey khuyapayaspa qori varanta haywariqtillanñan, chay qaripas otaq warmipas mana wañuchisqachu kanqa. Hinaspapas reyqa kinsa chunka p'unchawñan noqataqa mana waqyachimuwanchu, paypa kasqanman presentakunaypaqqa”, nispa.

¹² Reina Esterpa nisqanta Mardoqueoman eunuco runa willaqtinmi,

¹³ Mardoqueoqa Esterman khaynata kutichiran: —¿Reypa palacio wasinpi tiyasqaykiraykuchu piensashanki, Judá nacionniyoq llaqtamasiyki runakuna wañuchisqa kaqtinku, qanlla mana wañuchisqa kanaykipaq?

¹⁴ Sichus qan upallalla kunan kanki chayqa, hukmi Judá nacionniyoq runakunataqa librawanqaku. Ichaqa qantaqmi papaykipa familiankunapiwan wañuchisqa kankichis. Icha qanqa khayna sasachakuykunapi kaqtiyku yanapawanaykikupaq reina kashanki, nispa.

¹⁵ Hinaqtinmi reina Esterqa Mardoqueoman khaynata willachimuran:

¹⁶ “Susa llaqtapi tiyaq Judá nacionniyoq runakunata huñumuy. Hinaspa noqapaq ayunankichis kinsa p'unchaw hinallataq kinsa tuta. Aman imatapas mikhunkichishchu nitaq tomankichispashchu. Saynallataqmi noqapas noqata serviq sipaskunapiwan ayunasaqku. Hinaspan chaymantaña reyman presentakusaq, kay nacionpi leyman hina reyman presentakunapaq mana permitisqa kashaqtinpas, wañuchiwanankuña kaqtinpas, saynapichá wañusaq”, nispa.

¹⁷ Hinaqtinmi Mardoqueoqa ripuspa, reina Esterpa kamachisqanman hina ruwaran.