Ester 3 - Ñawpaq Testamento Apurímac Llaqtanchispaq Este nisqa Lawpaq

Judá nacionniyoq runakunapa contranpi Amán hatarisqanmanta

¹ Huk tiempo pasaruqtinmi, *rey Asueroqa Agagpa mirayninmanta kaq Hamedata sutiyoq runapa wawan Amanta hatuncharan. Hinaspan Amantaqa llapallan kamachiq autoridadkunapa jefen kananpaq churaran.

² Chaymi palacio punkupi kaq reypa serviqninkunaqa, Amanpa ñawpaqninpi qonqorikuspanku k'umuykuranku reypa kamachisqanrayku. Ichaqa manan Mardoqueoqa qonqorikuranchu nitaq k'umuykukuranpashchu.

³ Hinaqtinmi reypa palacion punkunpi kaq serviqninkunaqa Mardoqueota khaynata tapuranku: —¿Imanaqtintaq reypa kamachikusqantari mana kasukunkichú? nispanku.

⁴ Mardoqueoqa saynata sapa p'unchaw tapuqtinkupas, manan uyariqpas tukuranchu. Chaymi Amanman willaranku, saynapi Mardoqueo hayk'aqkamas mana kasukusqanmanta yachanankupaq. Mardoqueoqa ñan paykunamanqa willaranña Judá nacionniyoq runa kasqanta.

⁵ Chayraykun Mardoqueoqa mana Amanpa ñawpaqninpiqa qonqorikuranchu nitaq humillakuranpashchu. Chayta rikuspanmi, Amanqa anchatapuni phiñakuran.

⁶ Hinaspapas Amanqa Mardoqueo Judá nacionniyoq kasqanta yacharuspanmi, wañuchiyta munaran. Ichaqa manan Mardoqueollatachu wañuchiytaqa munaran, aswanqa rey Asueropa gobiernasqan nacionpi tiyaq llapallan Judá nacionniyoq runakunatawanmi.

Judá nacionniyoq runakuna wañuchisqa kanankupaq kamachikuy decretomanta

⁷ Chaymi chunka ishkayniyoq kaq wataña *rey Asuero gobiernashaqtin, *Nisán nisqa primer kaq killapi Amanpa ñawpaqninpi sortearanku, ima killapis hinallataq ima p'unchawpis (Judá nacionniyoq runakunata wañuchinankupaq). Chaymi suerteqa lloqsiruran chunka ishkayniyoq kaq *Adar nisqa killapa chunka kinsayoq p'unchawninpi wañuchisqa kanankupaq.

⁸ Hinaqtinmi Amanqa rey Asuerota khaynata niran: —Gobiernasqayki llapallan provinciakunapin ashka runakuna ch'eqesqa hinallataq rakinasqa tiyashanku. Paykunapaqa leyninkupas sapaqmi. Manan kay nacionniyoq runakunapa leynin hinachu leyninkupas. Chay runakunaqa manan qanpa leyniykikunatapas kasukunkuchu. Reynilláy, kay gobiernasqayki nacionpi sayna runakunaqa manan allinchu kanman. ¿Imapaqñataq kawsanqakurí?

⁹ Sichus allin parecesunki chayqa, huk kamachikuy decretota qoy, saynapi chay llapallan runakuna wañuchisqa kanankupaq. Sayna kaqtinqa noqan qosaq qolqeta waqaychaq tesoreroykikunaman kinsa pachak kinsa chunka waranqa (330,000) kilo qolqeta, nispa.

¹⁰ Hinaqtinmi reyqa selloyoq anillonta orqokuran. Hinaspan Hamedata sutiyoq runapa wawan Amanman qoykuran. Amanqa Judá nacionniyoq runakunapa enemigonmi karan.

¹¹ Hinaqtinmi reyqa Amanta khaynata niran: —Chay munachiwasqayki qolqewanqa qanyá qepakuy. Hinaspa chay runakunawan munasqaykiman hina ruway, nispa.

¹² Hinaqtinmi chay watapa qallariynin killapa chunka kinsayoq kaq p'unchawninpi reypa secretarionkuna huk kamachikuyta decretota escribiranku Amanpa lliw kamachikusqanman hina. Hinaspan rey Asueropa sutinpi chay escribisqankuta reypa anillonwan sellaranku. Chay kamachikuy decreto papeltaqa enteron Persia nacionpi autoridadkunaman, llapallan llaqtakunapi gobernadorkunaman hinallataq llapallan llaqtakunapi kamachikuq jefekunaman mandanankupaqmi escribiranku. Hinaspapas chay kamachikuy decreto papeltaqa sapankama llaqtakunapa imayna escribisqankuman hina hinallataq imayna rimasqankuman hinan escribiranku.

¹³ Hinaspan chay kamachikuy decreto papelkunataqa reypa gobiernasqan llapallan provinciakunaman carta apaqkunawan apachiranku. Chay decretopin kamachiran chunka ishkayniyoq kaq *Adar nisqa killapa chunka kinsayoq huk p'unchawllapi Judá nacionniyoq runakunata lliwta wañuchinankupaq: jovenkunata, ancianokunata, wawakunata hinallataq warmikunatapas. Saynallataqmi chay decretopiqa kamachillarantaq, tukuy imankutapas qechuspa hap'ikunankupaq.

¹⁴ Sapa provinciakunamanmi chay escribisqa decretopa copiankunata aparanku, saynapi chay p'unchaw chayamuqtin, llapallan runakuna listo kanankupaq.

¹⁵ Hinaqtinmi reypa kamachisqanman hina chay escribisqa decretoqa apurayman apasqa karan. Saynallataqmi chay decretoqa Persia nacionpa capitalnin Susa llaqtapipas willachisqa karan. Hinaqtinmi chaypi tiyaq runakunaqa chayta yacharuspanku, anchapas confundisqa karanku. Ichaqa reywan hinallataq Amanwantaqmi tiyaykuspanku vinota tomaranku.