Ester 1 - Ñawpaq Testamento Apurímac Llaqtanchispaq Este nisqa Lawpaq

Rey Asuero hatun fiestata ruwasqanmanta

¹ *Rey Asueron India lawmanta qallarispa asta Etiopía nisqa lawkama gobiernaran. Payqa gobiernaran pachak ishkay chunka qanchisniyoq (127) provinciakunatan.

² Rey Asueroqa Persia *nacionpa capitalnin Susa llaqtapi trononmantan ancha hatun Persia nacionta gobiernaran.

³ Rey Asueroqa kinsa wataña gobiernashaspanmi, huk hatun fiestata ruwaran. Chay fiestapaqmi invitamuran payta yanapaq autoridadkunata, consejeronkunata, Media nacionmanta, Persia nacionmanta ejército tropankunapa jefenkunata hinallataq ashka provinciakunapi gobiernasqan autoridadkunatawan ima.

⁴ Hinaspan rey Asueroqa pachak pusaq chunka (180) p'unchaw chay fiestataqa ruwachiran. Saynapin payqa ancha qapaq kayninta, gobiernasqanpas ancha hatun kasqanta hinallataq ancha atiyniyoq kasqanta rikuchiran.

⁵ Chay fiesta ruwasqan tukuruqtinmi, rey Asueroqa huk fiestata ruwachillarantaq wasinpa pationpa jardinninpi. Chay fiestapaqmi invitamuran chay tiyasqan Susa llaqtapi tiyaq llapallan importante runakunata hinallataq mana importante kaq runakunatapas. Chay fiesta ruwachisqanqa qanchis p'unchawmi duraran.

⁶ Chay patioqa yuraq color hinallataq azul color fino telamanta ruwasqa cortinawanmi churasqa karan. Chay cortinakunaqa *mármol nisqa rumikunamanta ruwasqa pilarkunamanmi watasqa karan, fino linomanta morado watukunawan. Chay watukunataqmi qolqemanta ruwasqa argollapa ukhunta pasachisqa karan. Chay patiopi tiyaspa samanankupaqpas qorimanta, qolqemanta ruwasqa sumaq asientokunan churasqa karan. Pampapas sumaq adornasqan karan mármol nisqa yuraq, yana rumikunawan hinallataq ancha valorniyoq sumaqllaña rumichakunawan ima.

⁷ Chay fiestapin vinotapas tomaranku qorimanta tukuy claseman rikch'aq vasokunapi. Hinaspapas vinoqa tomanankupaq ancha ashkallañan karan, allin runa rey kasqanrayku.

⁸ Sayna kashaqtinpas reymi palacio wasinpi sirvientekunata kamachiran, mana tomay munaqkunataqa ama obliganankupaq, aswanpas munasqankuman hinalla sapankamanku tomanankupaq.

⁹ Saynallataqmi reina Vastipas warmikunapaq ruwallarantaq huk fiestata qosan rey Asueropa hatun palacio wasinpi.

¹⁰ Fiestata ruwasqanku qanchis kaq p'unchawpin rey Asueroqa, vinota tomaspa, ancha kusisqalla kasharan. Chaymi payqa qanchis *eunuco nisqa sirvienten runakunata waqyachimuran. Paykunan karanku: Mehuman, Bizta, Harbona, Bigta, Abagta, Zetar hinallataq Carcaspiwan ima.

¹¹ Hinaspan chay eunuco runakunata kamachiran, reina Vastita umanpi sumaq coronayoqta reypa kasqanman pusamunankupaq, saynapi autoridadkunaman, jefekunaman hinallataq llapallan runakunamanpas sumaq buenamoza warmi kasqanta qawachinanpaq. Reina Vastiqa anchapas sumaq buenamoza warmin karan.

¹² Ichaqa reina Vastiqa rey Asueropa kamachisqantaqa manan kasuranchu chay eunuco runakuna payman willaqtinkuqa. Chaymi rey Asueroqa anchata phiñakuran. Saynallataqmi uyanpas hukniraymanraq tukuran.

¹³ Hinaspan rey Asueroqa kasqan ratolla leykunamanta yachaq runakunata waqyachimuran. Saynataqa waqyachimuran costumbrenman hina, sasachakuypi kaspaqa chay leykunamanta yachaq runakunata tapunanpaqmi.

¹⁴ Rey Asueropa confiasqan runakunamanta allinta leykunamanta yachaqkunaqa kaykunan karan: Carsena, Setar, Admata, Tarsis, Meres, Marsena hinallataq Memucán ima. Paykunaqa karanku Persia nacionpi hinallataq Media nisqa nacionpi gobiernaq jefekunan. Paykunataqa manan pipas hark'aranchu reypa ñawpaqninman haykunankutaqa. Hinaspapas chay runakunaqa reypa gobiernasqan nacionpiqa ancha importante cargokunatan ocuparanku.

¹⁵ Chay waqyachimusqan importante jefekuna rey Asueropa kasqanman hamuruqtinkun, reyqa paykunata khaynata tapuran: —Kamachikuy leyman hinari, ¿imatataq reina Vastitari ruwasunman? Payqa sirvientey eunuco runakunantakama hamunanpaq kamachisqaytaqa manan kasukamunchu, nispa.

¹⁶ Hinaqtinmi Memucán sutiyoq jefeqa rey Asueropa hinallataq chaypi kaq importante jefekunapa ñawpaqninpi khaynata niran: —Reina Vastiqa manan reypa contrallanpichu huchallirukun. Aswanmi payqa gobiernasqayki nacionpi kaq gobiernaq jefekunapa contranpi hinallataq llapallan llaqtakunapi kaq qarikunapa contranpi huchallirukun.

¹⁷ Kunanqa reina Vastipa sayna ruwasqanta llapallan warmikuna yacharuspankuqa, qosankutan khaynata rimaspankun desprecianqaku: “Rey Asueropa kamachisqantaqa manan reina Vastiqa kasuranchu, ¿chaychu noqanchispas qosanchista kasukusunman?” nispanku.

¹⁸ Saynallataqmi reina Vastipa sayna ruwasqanta Media lawpi hinallataq Persia lawpi jefekunapa warminkupas yacharuspanku, qosankupa contranpi sayarispa desprecianqaku. Chaymi reypa gobiernasqan provinciakunapi jefekunaqa warminku contrankupi kaqtin renegaykunapi tarikunqaku.

¹⁹ Saynaqa reynilláy, sichus qanman allin parecesunki chayqa, huk decretota ruwaspayá Persia nacionpa hinallataq Media nacionpa leyninkunaq archivonkunapi escribichiy, saynapi chay decreto ama cambiasqa kananpaq. Chay decretopiqa kamachillaytaq khaynata: “Vastiqa amaña ni hayk'aqpas noqa rey Asueropa ñawpaqniymanqa presentakamuchunñachu”, nispa. Saynallataqmi Memucanqa nillarantaq khaynata: —Aswanyá paypa rantintaqa, paymanta aswan más allin warmiñataq reina kananpaq churasqa kachun.

²⁰ Saynapin reypa kamachisqan decretomanta kay enteron gobiernasqayki nacionpi yachaspanku, llapallan warmikunaqa qapaqña kaspapas otaq wakchaña kaspapas qosankuta allinta respetanqaku, nispa.

²¹ Hinaqtinmi Memucanpa nisqanqa rey Asueropaq hinallataq chaypi kaq jefekunapaqpas allin karan. Chayraykun reyqa Memucanpa nisqanman hina ruwaran.

²² Chaymi chay kamachikuy decretotaqa reypa gobiernasqan nacionpi llapallan llaqtakunaman apachiran, sapankama provinciapi imayna escribisqankuman hina hinallataq imayna rimasqankuman hina. Chay decretopin kamachisqa karan, llapallan qosakuna wasinkupi kamachiq kanankupaq.