Esdras 1 - Ñawpaq Testamento Apurímac Llaqtanchispaq Este nisqa Lawpaq

Rey Ciropa kamachisqanmanta

¹ Persia *nacionta gobiernaq *rey Ciro primer kaq watata Babilonia nacionta gobiernayta qallarishaqtinmi, Señor Diosqa rey Ciropa sonqonta tupaykuran, saynapi Diosmanta willakuq *profeta Jeremiasnintakama Señor Diospa nisqankuna cumplikunanpaq. Chaymi rey Ciroqa huk kamachikuy *decretota rimaykunawan hinallataq cartakunawan enteron gobiernasqan nacionpi khaynata willamunankupaq kamachiran:

² Persia nacionta gobiernaq rey Ciron khaynata nin: “Hanaq pachapi Señor Diosmi kay pachapi llapallan nacionkunata gobiernanaypaq qowan. Hinaspan payqa Judá nacionpi kaq Jerusalén llaqtapi templota hatarichinaypaq kamachiwan.

³ Saynaqa noqan Judá nacionmanta kaq runakunaman permisota qoni, saynapi Judá nacionninkupi kaq Jerusalén llaqtaman kutipuspanku, yupaychasqanku Señor Diospa templonta kaqmanta hatarichinankupaq. Señor Diosyá paykunataqa tukuy imapipas yanapachun.

⁴ Saynallataqmi mayqen llaqtapi tiyaq runakunatapas kamachini, Jerusalén llaqtaman kutipuq runakunata qoriwan, qolqewan, imapas kapuqninkunawan hinallataq animalninkunawanpas yanapanankupaq. Saynallataqmi paykunaqa Señor Diospa templonpaq tukuy sonqonkuwan voluntariamentella ofrendankutapas qochunku”, nispa.

Israel nacionniyoq runakuna Jerusalén llaqtaman kutinpusqankumanta

⁵ *Rey Ciropa nisqanta yacharuspankun, sonqonkuta Señor Dios tupaykusqan Judá ayllumanta jefekuna, Benjamín ayllumanta jefekuna, *sacerdotekuna hinallataq *Leví ayllumanta runakunapas, Jerusalén llaqtapi Señor Diospa *templonta hatarichiq rinankupaq alistakuranku.

⁶ Hinaqtinmi llapallan vecinonkunaqa paykunata yanaparanku qolqewan, qoriwan, tukuy ima kapuqninkuwan, animalninkuwan, valorniyoq kaq cosasninkuwan ima. Saynallataqmi paykunaqa voluntariamente qonankupaq tukuy sonqonkuwan decidisqanku ofrendakunatapas qollarankutaq.

⁷ Saynallataqmi rey Ciroqa diosninkunapa templonpi kaq serviciokunatapas orqochimuran. Chay serviciokunataqa ñawpaqtaraqmi rey Nabucodonosor Jerusalén llaqtapi Señor Diospa templonmanta apaspa, diosninkunapa templonman churachiran.

⁸ Hinaqtinmi Persia nacionpa reynin Ciroqa chay orqochimusqan serviciokunata tesoreron Mitrídates sutiyoq runaman entregaran. Chay Metridatesñataqmi chay serviciokunataqa allinta yupaspa, Judá nacionpa jefen Sesbasarman entregaran.

⁹ Chay yupasqanku serviciokunaqa kaykunan karan: qorimanta kinsa chunka tazonkuna, qolqemanta waranqa tazonkuna, ishkay chunka esqonniyoq cuchillokuna,

¹⁰ qorimanta kinsa chunka tazakuna, qolqemanta tawa pachak chunkan (410) tazakuna hinallataq waranqa tukuy clase serviciokunapas.

¹¹ Chay qorimanta hinallataq qolqemanta serviciokunaqa llapallanpiqa pishqa waranqa tawa pachakninmi (5,400) karan. Chay llapallan serviciokunatan Judá nacionpa jefen Sesbasarqa apachimuran Babilonia nacionpi preso kasqankumanta Jerusalén llaqtaman kutimuq runakunawan.