Daniel 1 - Ñawpaq Testamento Apurímac Llaqtanchispaq Este nisqa Lawpaq

Daniel Babilonia nacionpi kasqanmanta

¹ *Rey Joacim Judá *nacionta kinsa wataña gobiernashaqtinmi, Babilonia nacionta gobiernaq rey Nabucodonosor Jerusalén llaqtaman hamuran. Hinaspan chay llaqtata atacananpaq ejército tropankunawan muyuriykuran.

² Señor Diosmi permitiran rey Nabucodonosor Jerusalén llaqtata atacaspa rey Joacimta presochananpaq. Hinaspan rey Nabucodonosorqa rey Joacimta Babilonia nacionman aparan. Saynallataqmi rey Nabucodonosorqa Jerusalén *templopi kaq utensiliokunatapas Babilonia nacionman aparan. Hinaspan diosninkunapa templonpi kaq tukuy ima valorniyoq kaqkunata waqaychananku wasiman churaykuran.

³ Chaymantan rey Nabucodonosorqa palacio wasinpi serviqnin runakunapa jefen Aspenaz sutiyoq runata kamachiran, paypa ñawpaqninman Israel nacionta gobiernaq reypa mirayninmanta hinallataq reqsisqa kaqkunamanta wakin jovenkunatawan apamunanpaq.

⁴ Chay jovenkunaqa khaynan kananku karan: sumaq buenmozokuna, mana ima defectoyoqkuna, allin respetoyoqkuna, imatapas yachachisqa apurayman yachaqkuna, allin yuyayniyoqkuna hinallataq reypa palacio wasinpi servinankupaq hina kaqkuna. Paykunamanmi Aspenaz sutiyoq jefeqa Caldea runakunapa rimayninta hinallataq escribiynintapas yachachinan karan.

⁵ Rey Nabucodonosorqa kamachillarantaqmi chay jovenkuna reypaq wayk'usqanku mikhunata mikhunankupaq hinallataq reypa tomanan vinotapas tomanankupaq. Hinaspapas reyqa kamachillarantaqmi chay jovenkunaman kinsa wata yachachinankupaq, saynapi reypa palacionpi servinankupaq.

Danielta amigonkunantinta reypa palacionman apasqankumanta

⁶ Chay akllasqa jovenkunawan kushkan kasharanku Judá ayllumanta kay jovenkunapas: Daniel, Ananías, Misael hinallataq Azaríaspas.

⁷ Chay jovenkunatan *reypa palacio wasinpi serviqkunapa jefenqa suticharan Danielta Beltsasarwan, Ananiastataq Sadracwan, Misaeltataq Mesacwan, Azariastañataq Abed-negowan.

⁸ Ichaqa Danielqa sonqonpin tanteakuran reypa mikhunanwan hinallataq tomanan vinowanpas mana qenllichakunanpaq. Chaymi Danielqa reypa palacionpi serviq runakunapa jefenta valekuran, reypa mikhunanta hinallataq reypa tomanan vinotapas ama qonankupaq.

⁹ Señor Diosmi chay jefepa sonqonta llamp'uyachiran, Danielta khuyapayaspa sumaqta tratananpaq.

¹⁰ Ichaqa chay jefeqa khaynatan niran: —Noqaqa reytan manchakushani. Payqa señorniymi. Paymi imata mikhunaykichispaq hinallataq imata tomanaykichispaqpas kamachiwaran. Sichus jovenmasiykichiskunapa uyankumanta aswan más q'elluta uyaykichista rikuspaqa, reyqa qankunapa culpaykichispin wañurachiwanqa, nispa.

¹¹ Hinaqtinmi Danielqa mayordomowan parlaran. Chay mayordomoqa reypa palacionpi serviq runakunapa jefen Aspenazpa nombrasqanmi karan. Paymi Danielta, Ananiasta, Misaelta hinallataq Azariastawan cuidaran.

¹² Chay mayordomotan Danielqa khaynata niran: —Valekuykin pruebaman churaykuwanaykikupaq. Chunka p'unchawyá verdurallata mikhunaykupaq qowayku. Saynallataqyá tomanaykupaqpas unullata qowayku.

¹³ Hinaspa uyaykuta comparanki reypa mikhunanmanta mikhuq jovenkunapa uyanwan. Chaymantayá imayna uyayku kasqanta rikuspaña, piensasqaykiman hina noqaykuwanqa ruwanki, nispa.

¹⁴ Chaymi chay mayordomoqa Danielpa mañakusqanta uyariran. Hinaspan chunka p'unchaw chay jovenkunata pruebaman churaran.

¹⁵ Chunka p'unchaw pasaruqtintaqmi chay jovenkunapa uyankuqa aswan más allinraq karan, reypa mikhunan mikhuq jovenkunapa uyankumantaqa.

¹⁶ Chaymi chay mayordomoqa chay jovenkunapaq sapaqchasqa mikhunataqa hinallataq vinotapas manaña paykunamanqa qoranñachu. Aswanmi paykunamanqa verdurakunallataña mikhunankupaq qoran.

¹⁷ Chay tawantin jovenkunamanqa Señor Diosmi yachayta hinallataq allin yuyayniyoq kayta qoran, saynapi tukuy clase librokunata hinallataq tukuy ima leesqankuta entiendenankupaq. Danielqa tukuy clase visionkunata hinallataq sueñokunatapas allintan entienderan.

¹⁸ Jovenkunata presentanankupaq reypa fijasqan p'unchaw chayaramuqtinmi, reypa palacionpi serviq runakunapa jefenqa chay jovenkunata rey Nabucodonosorpa ñawpaqninman pusaran.

¹⁹ Hinaqtinmi reyqa chay jovenkunawan parlaran, allintachus icha manachus yachanku, chayta yachananpaq. Ichaqa manan llapallan jovenkuna ukhupiqa ni ch'ullallatapas tariranchu Danielta, Ananiasta, Misaelta hinallataq Azariasta hinaqa. Chaymi chay tawantin jovenkunaqa reypa palacionpi servinankupaq qepakuranku.

²⁰ Reyqa imapas yachaymanta entiendeyta munaspaqa paykunata tapuspanmi, paykunapi chunka kuti más yachayniyoqta tariran, nacionpi layqakunamanta hinallataq watuqkunamantapas.

²¹ Saynapin Danielqa Babilonia nacionpi qepakuran, Persia nacionniyoq rey Ciro gobiernayta qallarisqan primer kaq watakama.